કાર્યવાહી:‘લોકડાઉનમાં અમે ફરી રહ્યાં છીએ’ કહેતો વીડિયો વાયરલ થતા, સરખેજ પોલીસે પિતા-પુત્રની ધરપકડ કરી

શહેરમાં કોરોના વાઇરસના ફેલાવાને રોકવા લોકડાઉનનો કડક અમલ કરાવવામાં આવી રહ્યો છે. છતાં કેટલાક લોકો લોકડાઉનમાં ઘરની બહાર ફરવા નીકળી પડે છે. જુઓ આ વીડિયો અમદાવાદનો છે. લોકડાઉનમાં અમે બાપ દીકરો આખું અમદાવાદ ફર્યા છીએ કહી વીડિયો ઉતારી અને લોકડાઉનમાં કાર લઈ બહાર ફરવા નીકળેલા પિતા-પુત્રની સરખેજ પોલીસે ધરપકડ કરી છે. પિતાએ કારમાં બેસી પુત્ર સાથે વીડિયો ઉતાર્યો હતો, જે પોલીસ પાસે આવતા જ પોલીસે બંને પિતા-પુત્ર સામે ગુનો નોંધી કાર્યવાહી કરી હતી.
લોકડાઉનમાં ફરવા નીકળ્યા હતા
સરખેજમાં રહેતા અકબરભાઈ અને તેનો પુત્ર સિકંદર કાર લઈ અને લોકડાઉનમાં ફરવા નીકળ્યા હતાં. અકબર કારમાં બેસી વીડિયો ઉતારી બોલતા હતા કે, આ અમદાવાદનો સીન છે અમે બાપ દીકરો લોકડાઉનમાં ફરી રહ્યા છીએ. બેય બાપ દીકરો લોકડાઉનમાં ફરી રહ્યા છીએ જુઓ આ જુઓ અમદાવાદ. આ વીડિયો સરખેજ પોલીસ પાસે પહોંચતા જ પોલીસે બંને સામે ગુનો નોંધી કાર્યવાહી કરી હતી.