કાર્યવાહી:નોટિસ આપવા ગયેલા કોન્સ્ટેબલની ફેંટ પકડનારા બૂટલેગરની ધરપકડ

સોલા પોલીસે અગાઉ ચાણક્યપુરીમાંથી દારૂની 24 બોટલ સાથે ચિરાગ દરબારને ઝડપ્યો હતો. ચિરાગની પૂછપરછમાં તેને દારૂનો જથ્થો તેના ભાઈ અજયસિંહ (ગણેશ આઇકોન, વૈષ્ણોદેવી સર્કલ પાસે)એ આપ્યાનું કબૂલ્યું હતું. આથી સોલા પોલીસે અજયસિંહને પોલીસ સ્ટેશન હાજર થવા નોટિસ આપી હતી, પરંતુ અજયસિંહ હાઈકોર્ટમાંથી આગોતરા જામીનનો ઓર્ડર લઈ આવ્યો હતો. તેમ છતાં તપાસ માટે સોલા પોલીસ તેને પોલીસ સ્ટેશન હાજર થવા નોટિસ આપવા તેના ઘરે ગઈ હતી.

અજયસિંહને એએસઆઈ ગોપાલિસંહ વાઘેલાએ નોટિસ આપી હતી, જેને અજયસિંહે ફાડી દઈ કહ્યું કે, ‘હું હાઈકોર્ટમાંથી જામીન લઈને આવ્યો છું.’ તેણે ગોપાલસિંહની ફેંટ પકડીને તેમની સાથેના પોલીસ કર્મચારીઓ સાથે ઝપાઝપી કરી હતી. એએસઆઈ ગોપાલસિંહની ફરિયાદના આધારે પોલીસે અજયસિંહ વિરુદ્ધ ગુનો નોંધી તેની ધરપકડ કરી હતી.