SOGની કાર્યવાહી:કાલુપુર રેલવે સ્ટેશન પર 1.23 લાખના ગાંજાના જથ્થા સાથે એક યુવકની ધરપકડ

રેલવે એસઓજી(સ્પેશિયલ ઓપરેશન ગ્રૂપ) પોલીસની ટીમે કાલુપુર રેલવે સ્ટેશન પરથી 12 કિલો ગાંજાના જથ્થા સાથે મૂળ દિલ્હીના એક યુવકની ધરપકડ કરી છે.

માહિતીના આધારે તપાસ કરતા પોલીસને પ્લેટફોર્મ નંબર 6-7 પરથી કાલુપુર યાર્ડ તરફ જતી એક વ્યકિતના થેલામાંથી અલગ-અલગ પેકેટ મળી કુલ 1.23 લાખનો ગાંજો મળી આવ્યો હતો.

એસઓજી પોલીસે તેની પૂછપરછ કરતા યુવકે પોતાનું નામ રાજા સોની અને મૂળ દિલ્હીનો રહેવાસી હોવાનું કબૂલાત કરી હતી. આ અંગે વધુ તપાસ કરતા પોલીસે આરોપી પાસેથી 1.23 લાખનો ગાંજો, મોબાઈલ ફોન, રોકડ રકમ સહિત દોઢ લાખનો મુદ્દામાલ કબ્જે કરી, આ ગાંજો ક્યાંથી લાવ્યો અને કોને આપવાનો હતો તે બાબતે હવે પોલીસ પૂછપરછ કરી રહી છે.