ડિમોલિશન:AMC દ્વારા સરખેજમાં નિશાન કારના કોમર્શિયલ શેડનું ગેરકાયદે કરવામાં આવેલું બાંધકામ તોડી પડાયું

અમદાવાદમાં મ્યુનિસિપલ કોર્પોરેશન દ્વારા ગેરકાયદે બાંધકામ દૂર કરવાની કામગીરી હાથ ધરાઈ છે. શહેરમાં દક્ષિણ પશ્ચિમ ઝોનના એસ્ટેટ અને ટી.ડી.ઓ વિભાગ દ્વારા સરખેજમાં ગેરકાયદે ઉભા કરવામાં આવેલા નિશાન કારના શેડનું બાંધકામ દૂર કરવામાં આવ્યું હતું અને આશરે 3 હજાર ચોરસ ફૂટ જેટલી જગ્યા ખુલ્લી કરવામાં આવી હતી.

3 હજાર ચો,ફૂટ જેટલી જગ્યા ખુલ્લી કરાઈ
પ્રાપ્ત વિગતો પ્રમાણે દક્ષિણ પશ્ચિમ વિસ્તારમાં સરખેજ વોર્ડમાં સમાવિષ્ટ ડ્રાફ્ટ ટી.પી. સ્કીમ નંબર 89 મંજુર થતાં અમદાવાદ મ્યુનિસિપલ કોર્પોરેશનને સંપ્રાપ્ત થતા પ્રપોઝ પ્લોટ નં.94 જેનો હેતુ ગાર્ડનનો હતો. તેની પર નિશાન કારના કોમર્શિયલ શેડ પ્રકારનું બાંધકામ કરવામાં આવ્યું હતું. ઉજાલા સર્કલ પાસેના આ પ્લોટમાં આશરે 3 હજારથી વધુ ચો. ફૂટ જમીનમાં આ બાંધકામ કરવામાં આવ્યું હતું. ત્યારે અમદાવાદ કોર્પોરેશનના એસ્ટેટ અને ટીડીઓ વિભાગ દ્વારા આ દબાણને દૂર કરવાની કામગીરી હાથ ધરવામાં આવી હતી.