તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

કોર્પોરેટરની દાદાગીરી:અમદાવાદના ભાજપના યુવા કોર્પોરેટર ચેતન પરમારની વેપારીને ધમકી, હું ભાજપનો કોર્પોરેટર છું, તું મારુ કશું બગાડી શકવાનો નથી

અમદાવાદએક મહિનો પહેલા
સીલ મારવાની વાતને જોડવામાં આવી છેઃ ચેતન પરમાર
  • યુવા કોર્પોરેટરનાં માણસોએ દુકાને આવીને ચેતન પરમારને મળવા કહ્યું
  • કોર્પોરેટર ચેતન પરમારે ભાડૂઆત દુકાન ખાલી નહિ કરે અને મારે દુકાન લેવાની છે તેવી ધમકી આપીઃ વેપારી
  • ભાડૂઆત દુકાન ખાલી ન કરતો હોવાથી વેપારી અને ભાડૂઆત વચ્ચે વિવાદ ચાલે છે

અમદાવાદના વેપારીઓ દ્વારા કેટલાક ખંડણીખોર તત્વો ધાકધમકી આપી અને ખંડણી ઉઘરાવતા હોવાની ફરિયાદ ગઈકાલે જ ગૃહમંત્રી પ્રદીપસિંહ જાડેજાને કરવામાં આવી હતી. જેની વચ્ચે આજે અમદાવાદના ખોખરા વિસ્તારમાં રહેતા અને ફર્નિચરનો વેપાર કરતા વેપારીને ખોખરા વોર્ડના ભાજપના યુવા કોર્પોરેટર ચેતન પરમારે હાથ પગ ભાંગી નાંખવાની અને દુકાન સીલ કરી દેવાની તેમજ હું ભાજપનો કોર્પોરેટર છું, તું મારુ કશું બગાડી શકવાનો નથી તેવી ધમકી આપી હતી. આ મામલે વેપારીએ પોલીસ કમિશનર, સેકટર 2 જેસીપી અને અમરાઈવાડી પોલીસ સ્ટેશનના પીઆઇને લેખિતમાં ફરિયાદ કરી છે. પોલીસ પાસે તેઓએ રક્ષણ માંગ્યું છે.

ચેતન પરમારે તેમની ઓફિસમાં ગાળાગાળી કરીઃ વેપારી
આ મામલે વેપારી અશોકભાઈ સુથારે DivyaBhaskar સાથેની વાતચીતમાં જણાવ્યું હતું કે મારી રાધે મોલમાં આવેલી દુકાન એક વ્યક્તિને ભાડે આપી હતી. જે છેલ્લા 15 મહિનાથી ખાલી ન કરતા હું ચેતન પરમાર પાસે ગયો હતો. ત્યારે તેઓએ મને મારી આ મેટર સોલ્વ કરી આપવાનું કહ્યું હતું. પરંતુ રક્ષાબંધનના દિવસે મને ચેતન પરમારે ફોન કરી અને મળવા કહ્યું હતું. પરંતુ રક્ષાબંધન હોય હું પછી આવીશ તેમ કહ્યું હતું. 23 ઓગસ્ટના રોજ તેમના ત્રણ માણસો ગાડી લઇ દુકાને આવ્યા હતા. ચેતનભાઈ બોલાવે છે તેમ કહેતા હું ત્યાં ગયો હતો. જ્યાં ચેતન પરમારે તેમની ઓફિસમાં ગાળાગાળી કરી અને દુકાન સીલ મરાવી દઈશ. ચાર દિવસમાં તારી હવા કાઢી નાખીશ તેવી ધમકીઓ આપી હતી. આ મામલે પોલીસમાં લેખિતમાં ફરિયાદ કરી છે.

આ રાજકીય રીતે મને ફસાવવાનો સ્ટંટ છેઃ ચેતન પરમાર
આ રાજકીય રીતે મને ફસાવવાનો સ્ટંટ છેઃ ચેતન પરમાર

હું સામેવાળી પાર્ટીને ઓળખતો જ નથીઃ ચેતન પરમાર
જ્યારે ખોખરાના ભાજપના યુવા કોર્પોરેટર ચેતન પરમારે DivyaBhaskar સાથેની વાતચીતમાં જણાવ્યું હતું કે હું સામેવાળી પાર્ટીને ઓળખતો જ નથી. કાલે મારો મિત્ર ત્યાંથી નીકળતો હતો એટલે મેં કહ્યું પેલા સુથારને બોલાવજે ઓફિસમાં ફર્નિચરનું કામ છે અને તેની દુકાનની મેટર છે તે બાબતે સોલ્યુશન લાવી દઈએ. સીલ મારવાની વાતને જોડવામાં આવી છે. આ રાજકીય રીતે મને ફસાવવાનો સ્ટંટ છે.

માનસિક ત્રાસ અને જાનથી મારી નાખવાની ધમકી આપીઃ વેપારી
ફરિયાદી વેપારી અશોક સુથાર ખોખરા હાઉસિંગ બોર્ડના મકાનમાં રહેતા અને કે.કા શાસ્ત્રી કોલેજ પાસે ફર્નિચરની દુકાન ધરાવી વેપાર કરે છે. બીજી દુકાન રાધે મોલમાં શાસ્ત્રી દિપક કુમારને ભાડે આપી હતી. ભાડા કરાર પૂરો થતાં તેઓને ફરી ભાડા કરાર કરવાનું કહેતા તેઓએ કર્યો ન હતો. ભાડા કરાર માટે તેઓ સમય કાઢે છે અને દુકાન ખાલી નથી કરતા જે મામલે અમરાઈવાડી પોલીસ સ્ટેશનમાં પોલીસ ફરિયાદ કરી છે.

છેલ્લા એક અઠવાડિયાથી ખોખરા વોર્ડના ભાજપના કોર્પોરેટર ચેતન પરમાર મને માનસિક ત્રાસ અને જાનથી મારી નાખવાની ધમકી આપે છે. 22 ઓગસ્ટના રોજ ચેતન પરમારે ફોન કરી ધમકી આપી હતી કે દિપક શાસ્ત્રી દુકાન ખાલી નહિ કરે દુકાન તારે મને વેચી દેવાની છે. બીજા દિવસે તેમના ત્રણ માણસો દુકાને આવી ધમકી આપી હતી કે દુકાન સીલ કરાવી દઈશું અને ચેતન પરમારની ઓફિસે મળવા બોલાવ્યો હતો.

ફરિયાદ પાછી લઈ લેજે નહિ તો હાથ પગ તોડી નાખીશઃ વેપારીનો આક્ષેપ
ચેતન પરમારની ઓફિસે જતાં તેમને મને ગંદી ગાળો બોલવા લાગ્યા હતા અને બિભત્સ વર્તન કરી તારી દુકાન દિપક ખાલી નથી કરવાનો તેમ કહ્યું હતું. પોલીસમાંથી ફરિયાદ પાછી લઈ લેજે નહિ તો તારા હાથ પગ તોડી નાખીશ. તારી દુકાન મારે વેચાણ લેવાની છે. બંને દુકાન સીલ કરાવી દઈશ. તારો વેપાર ધંધો બંધ કરાવી દઈશ. હું ભાજપનો કોર્પોરેટર છું તું મારુ કશું બગાડી શકવાનો નથી તેવી ધમકી આપી હતી. જેથી તેઓને પોલીસ રક્ષણ આપવામાં આવે અને દિપક તેમજ ચેતન પરમાર દુકાનમાં કબજો જમાવી બેઠા હોય કબજો પરત અપાવવા વિનંતિ છે.