લાલચમાં રૂપિયા ગુમાવ્યા:અમદાવાદના વેપારીએ મર્સિડીઝ ખરીદવામાં ₹ 20 લાખનું ડિસ્કાઉન્ટ લેવા જતાં ₹ 45 લાખ ગુમાવ્યા

અમદાવાદ3 દિવસ પહેલા
  • કૉપી લિંક
અમદાવાદ ક્રાઇમ બ્રાન્ચ - Divya Bhaskar
અમદાવાદ ક્રાઇમ બ્રાન્ચ
  • હાઈકોર્ટ વકીલના ગ્રુપમાં એક મેસેજ આવ્યો કે રૂ. 20 લાખ ડિસ્કાઉન્ટથી કાર મળશે
  • વેપારીએ મર્સિડીસ ઇ-ક્લાસ બુક કરાવવા માટે નક્કી કરેલી ચૂકવણી એકાઉન્ટમાં કરી
  • અમદાવાદના શીલજમાં રહેતા વેપારી મશીનરી બનાવવાનો બિઝનેસ કરે છે

અમદાવાદમાં વેપારીને ₹ 20 લાખ ડિસ્કાઉન્ટમાં કાર લેવી મોંઘી પડી છે. કારણ કે ડિસ્કાઉન્ટ અપાવવાની વાત કરતા વ્યકિતએ ન કાર આપી કે ન રૂપિયા. ₹ 45 લાખ ભેજાબાજે ઘર ભેગા કરીને વેપારી સાથે છેતરપિંડી કરી છે. આ બનાવ અગેં આખરે વેપારીએ અમદાવાદ ક્રાઇમ બ્રાન્ચને જાણ કરી હતી. જે સંદર્ભે પોલીસે ગુનો નોંધી તપાસ હાથ ધરી છે.

મોટાભાઈ માટે વેપારીને કાર ખરીદવી હતી
પોલીસ સૂત્રો પાસેથી મળતી માહિતી પ્રમાણે અમદાવાદના શીલજ વિસ્તારમાં રહેતા ભગવત વિઠ્ઠલભાઇ શાહ મશીનરી બનાવવાનો બિઝનેસ કરે છે. તેમને તેમના મોટાભાઇ માટે મર્સિડીસ કાર ખરીદવી હતી. જે માટે ભગવતભાઇએ તેમના વકીલ મિત્રને જાણ કરી હતી. તેમના હાઇકોર્ટ વકીલના ગ્રુપમાં એક મેસેજ આવ્યો હતો કે, ₹20 લાખ ડિસ્કાઉન્ટથી કાર મળશે જેની ઓન રોડ પ્રાઇઝ વિશે પણ ઉલ્લેખ કર્યો હતો.

કંપનીમાં ડાયરેક્ટ કાર બુક કરાવતી હોવાનું વેપારીને કહ્યું
આ વાત ભગવતભાઇને તેમના વકીલ મિત્રએ કરી ત્યારબાદ તે નંબર પર સંપર્ક કર્યો હતો. જેમાં સામેવાળા વ્યક્તિએ જણાવ્યુ કે, અમે ડીલરના ત્યાં નહીં પણ ડાયરેક્ટ કપનીમાં કાર બુક કરાવીએ છીએ.

કારની ડિલિવરી અને રૂપિયા માટે ગલ્લાં-તલ્લાં કર્યા
આ વાત થયા બાદ ભગવતભાઇએ તેમને મર્સિડીસ ઇ-ક્લાસ બુક કરાવવા માટે વાત કરી અને રૂપિયાની ચૂકવણી નક્કી કરેલા એકાઉન્ટમાં કરી હતી. પરંતુ આ દરમિયાન દિલીપસિંહ જાડેજા ( રહે- સિદ્ધિવિનાયક સોસાયટી, જામનગર) નામના વ્યક્તિએ તેમાંથી ₹ 45 લાખ રૂપિયા યેનકેન પ્રકારે મેળવી લીધા હતા. પરંતુ ત્યારબાદ દિલીપસિંહ કાર અંગે ડિલિવરી અને રૂપિયા અંગે ગલ્લાં-તલ્લાં કરવા લાગ્યો હતો. આખરે વેપારીએ આ અંગેની જાણ અમદાવાદ ક્રાઇમ બ્રાન્ચને કરાતા ક્રાઇમ બ્રાન્ચે દિલીપસિંહ સામે ગુનો નોંધી તપાસ હાથ ધરી છે.