અમદાવાદનું પ્રથમ સ્માર્ટ પાર્કિંગ:રિવરફ્રન્ટ પર 1 હજાર કાર પાર્ક થઈ શકે તેવું 8 માળનું પાર્કિંગ, ઈવેન્ટ સેન્ટર જવા પાર્કિંગમાંથી જ વોક-વે, એપ્રિલમાં શરૂ

અમદાવાદ6 મહિનો પહેલા
  • કૉપી લિંક
પાર્કિંગનું કામ હજુ ચાલુ છે - Divya Bhaskar
પાર્કિંગનું કામ હજુ ચાલુ છે

પાર્કિંગની મુશ્કેલી નિવારવા કોર્પોરેશને એસવીપી હોસ્પિટલ નજીક રિવરફ્રન્ટ રોડ ઉપર 60 કરોડના ખર્ચે તૈયાર કરેલું 8 માળનું પાર્કિંગ એપ્રિલના પહેલાં સપ્તાહમાં લોકો માટે ખૂલ્લું મુકાશે. આ પાર્કિંગ માટે ઘરે બેઠાં બેઠાં સ્લોટ બુક કરાવી શકાશે. આ પાર્કિંગમાં 1 હજાર કાર પાર્ક થઈ શકશે.

માર્ચ-2019માં પાર્કિંગ બિલ્ડિંગ બનવાની શરૂઆત થઈ હતી. જોકે કોવિડના કારણે લગભગ એક વર્ષથી વધારે સમય માટે તેનું નિર્માણ બંધ રહ્યું હતું. સાબરમતી નદી ઉપર તૈયાર થયેલા સૌથી આકર્ષક ફૂટ ઓવર બ્રિજ સુધી પહોંચવા પાર્કિંગ બિલ્ડિંગને જોડતો વોક વે બ્રિજ તૈયાર થઈ રહ્યો છે. પાર્કિંગમાં કાર પાર્ક કરીને લોકો ફ્લાવર ગાર્ડન અને ઈવેન્ટ સેન્ટરમાં સીધી એન્ટ્રી મેળવી શકશે. આ ઉપરાંત પાર્કિંગના મુખ્ય પ્રવેશ દ્વાર ઉપર મોટા સ્ક્રીન ઉપર ખાલી સ્લોટની માહિતી મળશે.

એસવીપી અને વીએસ હોસ્પિટલના ડૉક્ટર્સ અને દર્દીઓ માટે વિશેષ એન્ટ્રી આપવામાં આવેલી છે. ગ્રાઉન્ડ ફ્લોર ઉપર વિશાળ જગ્યામાં મોલ સાઈઝની દુકાનો પણ છે. મ્યુનિ. તેને વેચાણ અથવા ભાડેથી આપશે. ડેપ્યુટી મ્યુનિ. કમિશનર આર.કે.મહેતાએ જણાવ્યું કે, મોટાભાગના વિકસિત દેશોમાં એપ્લિકેશન બેઝ પાર્કિંગની સુવિધા હોવાથી આ લેટેસ્ટ પાર્કિંગમાં તેની વ્યવસ્થા કરાઈ છે. મ્યુનિ. સ્ટેન્ડિંગ કમિટી ચેરમેન હિતેષ બારોટે જણાવ્યું કે, શહેરમાં પાર્કિંગની સમસ્યાને જોતાં પ્રહલાદનગર, સિંધુ ભવન રોડ અને ચાંદલોડિયામાં પણ મલ્ટિલેવલ પાર્કિંગ તૈયાર કર્યા છે જે, 6 મહિનામાં શરૂ કરાશે.

પાર્કિંગની વિશેષતાઓ - ઘરે બેઠા જ પાર્કિંગ સ્લોટ બુક થશે

  • બેઝમેન્ટ-ટેરેસ સહિત આઠ માળનું પાર્કિંગ.
  • પ્રવેશ દ્વાર પર મોટા સ્ક્રીન મુકાશે જેમાં કયા ફ્લોર પરના ખાલી સ્લોટ જોઈ શકાશે.
  • એન્ટ્રી પોઈન્ટ પર એન્ટ્રી યુનિટ, એએનપીઆર કેમેરા અને બુમ બેરિયર.
  • બટન દબાવાની સાથે જ પાર્કિંગ માટેની ટિકિટ ઓટોમેટિક જનરેટ થઈ જશે.
  • ટિકિટ જનરેટ થયા બાદ બુમ બેરિયર ઓટોમેટિક ખુલશે.
  • દરેક માળ ઉપર ઈન્ડોર ડિસ્પ્લે હશે જેમાં ફ્લોર ઉપરના ખાલી સ્લોટ દર્શાવાશે.
  • ડ્રાઈવરને માર્ગદર્શન આપવા માટે એલઈડી લાઈટ સાથે અલ્ટ્રાસોનિક સેન્સર મૂકાશે.
  • અલ્ટ્રાસોનિક સેન્સરથી વિશાળ પાર્કિંગમાં તમારી કારનું લોકેશન જાણી શકાશે.
  • રોકડ, ઓનલાઈન અને એપ્લિકેશનથી કલાક પ્રમાણે પેમેન્ટ ચૂકવી શકાશે.
  • પાર્કિંગ બિલ્ડિંગમાં 13 ઈન્ડોર ડિસ્પલે અને ત્રણ આઉટ ડોર ડિસ્પ્લે મૂકાશે.
  • એએનપીઆર કેમેરા અને બુમ બેરિયર સાથે બે એન્ટ્રી પોઈન્ટ રહેશે.
  • બહાર નીકળવા ત્રણ એક્ઝિટ યુનિટ બુમ બેરિયર મૂકાશે. એક ઓટોમેટિક અને બે મેન્યુઅલ કેશિયર રહેશે.
અન્ય સમાચારો પણ છે...