SVPI એરપોર્ટે વિક્રમ સર્જ્યો:એક જ દિવસમાં 32 હજાર લોકોએ મુસાફરી કર્યાનો આંક વટાવ્યો, 1164 નોન-શિડ્યુલ ફ્લાઈટ અને VIPની અવરજવરનો રેકોર્ડ

અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટે નોન-શિડ્યુલ ફ્લાઈટ અને VIPની અવરજવરમાં વિક્રમ સર્જ્યો છે. એરપોર્ટે ગત મહિનામાં 1164 નોન-શિડ્યુલ ફ્લાઈટની મૂવમેન્ટ ઓપરેટ કરીને નવો રેકોર્ડ બનાવ્યો છે. જ્યારે એક જ દિવસમાં 32000 લોકોએ મુસાફરી કર્યાનો આંક વટાવ્યો છે. SVPI એરપોર્ટે વધારેલી અસંખ્ય માળખાકીય સુવિધાઓને કારણે ટ્રાફિકમાં વધારા સાથે પસંદગીનું એરપોર્ટ બન્યુ છે.

નોન-શિડ્યુલ્ડ પેસેન્જર્સની સંખ્યામાં સતત વધારો નોંધાયો
​​​​​​​છેલ્લા 1 મહિનામાં એક જ દિવસમાં સૌથી વધુ 58 મુવમેન્ટ સાથે 1100થી વધુ નોન-શિડ્યુલ ફ્લાઇટની મુવમેન્ટ થઈ છે. 10 નવેમ્બરથી 10 ડિસેમ્બર સુધીના સમયગાળામાં SVPI એરપોર્ટે 1164 નોન-શિડ્યુલ ફ્લાઇટનો રેકોર્ડ કર્યો છે. જેમાં અનેક VIP ફ્લાઇટનો પણ સમાવેશ થાય છે. નોન-શિડ્યુલ્ડ ડોમેસ્ટિક તેમજ ઈન્ટરનેશનલ હિલચાલ માટે ખાસ બનાવેલા નવા જનરલ એવિએશન ટર્મિનલના કારણે નોન-શિડ્યુલ્ડ પેસેન્જર્સની સંખ્યામાં સતત વધારો નોંધાયો છે. સ્થાનિક સત્તાધિશો અને હિતધારકોનાં સંકલન દ્વારા મુસાફરીમાં બને એટલી સગવડો સુનિશ્ચિત કરવા એરપોર્ટ દ્વારા સમર્પિત પ્રયાસો હાથ ધરવામાં આવ્યા હતા. છેલ્લા મહિનામાં અનેક રાષ્ટ્રીય મહાનુભાવોએ SVPI એરપોર્ટની મુલાકાત લીધી હતી. જેમાં વિવિધ રાજ્યોના મુખ્યપ્રધાનો, કેન્દ્રીય પ્રધાનો અને વડાપ્રધાનનો સમાવેશ થાય છે.

SVPI એરપોર્ટ દેશના મોટા એરપોર્ટ દ્વારા નિર્ધારિત ઉચ્ચ ધોરણોની સમકક્ષ
SVPI એરપોર્ટની ટીમે સ્થાનિક સત્તાધિશો અને CISFના સહયોગથી તેમના સરળ ટ્રાન્સફરની ખાતરી કરી હતી. SVPI એરપોર્ટ ઉદ્યોગો અને દેશના મોટા એરપોર્ટ દ્વારા નિર્ધારિત ઉચ્ચ ધોરણોની સમકક્ષ છે. આ સુવિધા બિઝનેસ જેટ અને ચાર્ટર્ડ એરક્રાફ્ટનું ઝડપી ટર્નરાઉન્ડ સુનિશ્ચિત કરે છે. તે મુસાફરોને જનરલ પેસેન્જર ટર્મિનલ્સમાં કોમર્શિયલ ફ્લાઇટ સાથેના ટેક્સિંગ સ્લોટથી અલગ કરે છે. આ સુવિધાથી દેશમાં સામાન્ય ઉડ્ડયન ક્ષેત્રના વિકાસનો માર્ગ મોકળો થયો છે. GA ટર્મિનલ માટે 4500 ચોરસ ફૂટના ટર્મિનલ બિલ્ડિંગમાં 12000 ચોરસ ફૂટમાં સુંદર ડિઝાઇન કરેલ સમર્પિત પ્રવેશદ્વાર છે. તેના નિયંત્રણ માટે ખાનગી સુરક્ષા વ્યવસ્થા રાખવામાં આવી છે અને તે 24x7 ઓપરેશન કંટ્રોલ સેન્ટર ધરાવે છે.