ડિમોલેશન:નેહા ફ્લેટનું 30,988 ચો. ફૂટ ગેરકાયદે બાંધકામ દૂર કરાયું

અમદાવાદ મ્યુનિસિપલ કોર્પોરેશન દ્વારા દક્ષિણ-પશ્ચિમ ઝોનના સરખેજ વોર્ડમાં સોનલ રોડ પર આવેલા નેહા ફ્લેટના 30,988 ચો. ફૂટના ગેરકાયદે બાંધકામ દૂર કરવાની કામગીરી શુક્રવારના રોજ પૂર્ણ થઇ હતી. આ કામગીરીમાં એસ્ટેટ વિભાગના સ્ટાફ ઉપરાંત દબાણની ગાડી, જેસીબી મશીન, આરસીસી બ્રેકર, ગેસ કટર અને ફાયર બ્રિગેડના સ્ટાફને સાથે રખાયો હતો.

સાબરમતીમાં ટીપી સ્કીમ નંબર 46 ખાતે ફાઇનલ પ્લોટ નંબર 217 માં (સેલ ફોર રેસિડેન્સિયલ)13,000 ચો.મી.ના પ્લોટમાં 22 જેટલાં ઝૂંપડાંનું દબાણ હતું, જે દૂર કરી દેવાયું છે. આ પ્લોટની બજાર કિંમત અંદાજે 65 કરોડ છે. આ ઉપરાંત એલ.ડી કોલેજ અને પાંજરાપોળ પાસે રોડ તેમજ ફૂટપાથ પરથી લારીઓનું અડચણરૂપ દબાણ પણ દૂર કરાયું હતું. આગામી દિવસોમાં ગેરકાયદે બાંધકામ, દબાણો, બોર્ડ તેમજ બેનરો દૂર કરવાની કાર્યવાહી હાથ ધરવામાં આવશે.