ક્રાઇમ:પતિ-પત્નીના ઝઘડામાં દખલગીરી કરતા સંબંધી પર 3 લોકોએ છરીથી હુમલો કર્યો

દાણીલીમડામાં પતિ-પત્ની વચ્ચે ચાલતા ઝઘડામાં દરમિયાનગીરી કરનારા સંબંધીની સાથે ત્રણ વ્યક્તિઓએ ‘તું અમારા ઘરના ઝઘડામાં દખલગીરી કેમ કરે છે તેમ કહીને ઝઘડો કરી તીક્ષ્ણ હથિયારથી હુમલો કર્યો હતો. જેમાં સંબંધીને ગંભીર ઇજા થઈ હતી. આ અંગે ત્રણ વ્યકિતઓ વિરુદ્ધ દાણીલીમડા પોલીસ સ્ટેશનમાં ફરિયાદ નોંધાવી આવી છે.

વટવામાં એઝાઝનગર સોસાયટીમાં રહેતા કુતબૂદ્દીન મોહંમદ શફી શેખના મોટાભાઈની દીકરી સનાના લગ્ન બે વર્ષ પહેલા સલમાન શેખ(રહે.બહેરામપુરા) સાથે થયા હતા. આ બંને પતિ-પત્ની વચ્ચે અવારનવાર ઘરકંકાસ થતો હોવાથી કુતબૂદ્દીન આ બંનેને સમજાવતા હતા. જોકે ચાર દિવસ પહેલા પતિ-પત્ની વચ્ચે ફરી ઝઘડો થતા તેમને ઠપકો આપ્યો હતો.

દરમિયાન રવિવારે રાત્રે કુતબૂદ્દીન મોટાભાઈ બાબાભાઈના ઘરે ગયા હતા. જયાં હાજર ભત્રીજા જમાઈ સલમાન તેના ભાઈ સોહિલ અને જાવિદ નામની વ્યકિતએ ઝઘડો કર્યો હતો અને સલમાને ‘તું કેમ અમારા ઘરના ઝઘડામાં દખલગીરી કરે છે‘ તેમ કહી ગાળો બોલી મારામારી કરી હતી. દરમિયાન સોહિલે ચપ્પુ વડે હુમલો કરી કુતબૂદ્દીનને છાતીના જમણી બાજુ ઘા માર્યા હતા. જોકે બૂમાબૂમ થતા આરોપીઓ ત્યાંથી ભાગ્યા હતા. કુતબુદ્દીનને સારવાર માટે હોસ્પિટલ જઈ જવાયા હતા. જયાં તેમણે પોલીસ ફરિયાદ નોંધાવી હતી.