પ્રોપર્ટી ટેક્સ ભર્યો નથી:અમદાવાદમાં પ્રોપર્ટી ટેક્સ નહીં ચૂકવતી 17 મિલકતની હરાજી કરાશે

શહેરમાં જુદા જુદા વિસ્તારમાં 17 મિલકતધારકો દ્વારા લાંબા સમયથી પ્રોપર્ટી ટેક્સની રકમ ચૂકવવામાં આવતી નથી ત્યારે મ્યુનિ. દ્વારા આવી મિલકતોને નોટિસ આપી જો 7 દિવસમાં બાકી ટેક્સની રકમ નહીં ચૂકવે તો તેમની મિલકતોની જાહેર હરાજી કરીને નાણાં વસૂલવાની ચીમકી આપી છે. આ 17 મિલકતો પાસેથી મ્યુનિ.ને કુલ 5.32 કરોડથી વધારેની રકમ લેણી નીકળે છે.

મ્યુનિ. ટેક્સ વિભાગે જણાવ્યું છે કે, 10થી 92 લાખ રકમ નહીં ભરતી આ 17 મિલકતોના માલિકને વારંવાર નોટિસ આપવા છતાં પણ તેમના દ્વારા યોગ્ય પગલાં લેવામાં આવ્યા ન હતા. તેમજ હાલ મ્યુનિ.એ ટેક્સ માફીની યોજના ચાલુ હોવા છતાં પણ લાભ મેળવવા કોઇ પ્રયાસ કરાયો ન હતો.

બે સિનેમાગૃહ, જીઆઇડીસી વિસ્તારની કેટલીક મિલકતો, ટેક્સટાઈલની જૂની મિલકતો સહિત માટી સંખ્યામાં મિલકતોનો સમાવેશ થાય છે. ઓઢવમાં આવેલી ન્યુ જગત ટેક્સટાઈલનો સૌથી વધુ રૂ.92 લાખ પ્રોપર્ટી ટેક્સ બાકી નીકળી છે.