કિચન ગાર્ડન:14 મહિલાઓ સોસાયટીમાં કિચન વેસ્ટનું ઑર્ગેનિક ખાતર બનાવે છે

પ્રહલાદનગર સફલ પરમ સોસાયટીની 14 મહિલાઓ કિચન વેસ્ટનો ઉપયોગ કરીને ડિકમ્પોઝ્ડ ખાતર બનાવે છે. આ મહિલાઓએ પોતાના ઘરના કિચન વેસ્ટનો ઉપયોગ ઘરના બાલ્કની ગાર્ડન અને કિચન ગાર્ડનમાં ખાતર તરીકે કરીને 100 જેટલા ઓર્ગેનિક શાકભાજી પણ ઉગાડ્યાં છે. ઘરના કિચનમાંથી નીકળતા કિચન વેસ્ટ જેમકે ચાના કૂચાં, શાકભાજીનો વધેલો કચરો, તેમજ સડેલાં ફ્રુટ, વાસી ખોરાક જેવા કચરાનો ઉપયોગ કરીને તેમાંથી ડિકમ્પોઝ્ડ ખાતર બનાવ્યું છે. હાલમાં ઘરમાં જગ્યા નાની હોવાથી સોસાયટી કમ્પાઉન્ડમાં બે યુનિટ બનાવીને તેમાં 50 ઘરના કચરામાંથી ખાતર તૈયાર કરવાનો પ્રયોગ ચાલુ કર્યો છે.

સોસાયટીમાં બે ખાડામાં કિચન વેસ્ટ ભેગો થાય છે
આ વિશે વાત કરતાં સંજીતા નેગીએ કહ્યું હતું કે- અમારી સોસાયટીમાં અમે 14 મહિલાઓએ નક્કી કર્યું કે સોસાયટીમાં થતાં આ કિચન વેસ્ટનો ઘરમાંજ ઉપયોગ કરાય તો તેનાથી કચરો પણ ઘટશે અને ઓર્ગેનિક શાકભાજી પણ ઘરઆંગણે ઉગાડી શકાશે. તે માટે પ્રાયોગિક ધોરણે આ ચાલુ કર્યું છે. -સંજીતા નેગી- ગૃહિણી

ઘરના બાળકો, વડીલો પણ સહકાર આપે છે
અમે સોસાયટી કંપાઉન્ડમાં જ બે કમ્પોઝ્ડ ખાતર યુનિટ બનાવ્યાં છે. કેપિસિટી મુજબ એક ખાડો 15થી 20 દિવસમાં ભરાય છે. તેને 7 દિવસ ઢાંકી રાખ્યાં બાદ 10 દિવસમાં ખાતર તૈયાર થઇ જાય છે.
ઘરના વડીલો અને બાળકો પણ સહકાર આપે છે. - જાગૃતિ પટેલ, સોસાયટી મેમ્બર