વતન વાપસીનો આનંદ:ખેડા જિલ્લામાં અટવાયેલા1600 શ્રમિકોને લઇ ટ્રેન બિહાર રવાના

વૈશ્વિક મહામારી કોરોના વાઇરસના સંક્રમણને ખાળવા માટે લોકડાઉનની કડક અમલવારીના કારણે સૌથી વધુ હેરાનપરેશાન મજૂર લોકો થઇ રહ્યાં છે. ખાસ કરીને ઉત્તરપ્રદેશ, મધ્યપ્રદેશ, બિહાર સહિતના રાજ્યોમાંથી મજૂરીકામે ખેડા જિલ્લામાં આવેલાં શ્રમિકો રોજીરોટી વગર દયાજનક હાલતમાં મુકાઇ ગયા છે. સરકારના આદેશના પગલે ખેડા પંથકમાંથી આશરે 1600 જેટલાં શ્રમજીવીઓને બિહાર વતન પહોંચાડવા માટે નડિયાદ રેલવે સ્ટેશનથી સ્પેશ્યલ ટ્રેન રવાના કરવામાં આવી હતી. પ્લેટફોર્મ પર ટ્રેન આવતાં કોચમાં બેસતાં પહેલાં ભારતીય સંસ્કૃતિ અને હિન્દુ સંસ્કારથી છલોછલ એવા ઘણાં પરપ્રાંતિય શ્રમિકોએ કોચના પગથિયાને નમન કર્યા હતા, તો વળી એક મુસાફરે આગળ વધી ડબાને ચુંબન કરી લાગણી વ્યક્ત કરી હતી.