ચોર બેફામ:માંડલના નવાગામ અને રીબડી સીમમાંથી વીજવાયરની ચોરી

માંડલ તાલુકાના નવાગામ એજી ફીડર અને રીબડી નાના ઉભડા કેનાલ તરફના વીજ થાંભલા પરથી વાયર ચોરી ગયા અંગેની પોલીસ ફરિયાદ માંડલ પોલીસ સ્ટેશનમાં વીજ કંપનીના ઇજનેરે નોંધાવી છે.

માંડલ તરફના માર્ગ પર આવેલી વેરા વેરહાઉસની બાજુમાંથી પસાર થતી વીજ થાંભલાના 33 ગાળાના વીજવાયર અને એડલા ચોકડીથી રીબડી તરફના વીજ થાંભલાના 21 ગાળાના વીજવાયર, રીબડી કેનાલથી નાના ઉભડા કેનાલ સુધીના વીજ થાંભલાના આશરે 24 ગાળા, 11 કેવી નવાગામ એજી ફીડર બાય ફરગેસન થાંભલાના 45 ગાળા સાથે કુલ 78 ગાળાના વીજ વાયર જેની બજાર કિંમત અંદાજે રૂ.2.70.000ના મુદ્દામાલની અજાણ્યા શખ્સોએ ચોરી કર્યા અંગેની ફરિયાદ પોલીસ સ્ટેશનમાં નોંધાવવામાં આવી છે. આ અંગેની વધુ તપાસ માંડલ પોલીસ સ્ટેશનના નીતીશકુમાર મકવાણા એ .એસ.આઈ. કરી રહ્યા છે. ઉલ્લેખનીય છે કે, ચૂંવાળ પંથકમાં તસ્કરોની ટોળકી સક્રિય બની છે. તેઓ મકાન ઉપરાંત સરકારી મિલકતને પણ નુકસાન કરી રહ્યા છે. 2.70 લાખની કિંમતના વીજવાયરો ચોરાતા તંત્રમાં દોડધામ મચી છે. ખેતરોમાંથી વાયરોની ચોરી થતાં ખેડૂતોમાં પણ ચીંતા પ્રસરી ગઇ છે. રાતના સમયે પોલીસના પેટ્રોલિંગમાં વધારો કરવા કાં હોમગાર્ડના પોઇન્ટ વધારવા માગ ઉઠી છે.