સમસ્યા:માંડલમાં શટલિયા ચાલકો વધુ ભાડું વસૂલતાં રોષ, માંડલ-વિરમગામ વચ્ચે દોડતા શટલિયા

માંડલમાં માંડલથી વિરમગામ માર્ગ પર રોજિંદા મુસાફરો અવર-જવર કરાવતા શટલિયા વાહનો એસ.ટી.બસ કરતા વધુ ભાડુ લેતા હોવાનું મુસાફરો દ્વારા જાણવા મળ્યું છે. ત્યારે માંડલથી ફુલકીનું ભાડુ બસમાં રૂ. 13 ચાલે છે. ત્યારે માડલના શટલીયા વાહનો રૂપિયા 20 લે છે અને માંડલથી વિરમગામનું ભાડું બસમાં રૂપિયા 19 ચાલે છે. ત્યારે શટલીયા વાહનો રૂપિયા 30 રૂપિયા લે છે. આમ શટલીયા વાહન ચાલકો ખુલ્લેઆમ પોલીસ આરટીઓના ડર વિના ગાડીમાં ઘેટા બકરાની જેમ મુસાફરો બેસાડી અવરજવર કરાવેછે અને ભાડુ દોઢ ગણુ વઘારે લઇ રહ્યા છે.

તેમછતા પોલીસ તંત્ર અને આરટીઓ આંખે હપ્તાના પાટા બાંધી તમાશો જોતા હોય તેમ લાગે છે. આવા શટલીયા વાહનો સામે લિમિટ કરતાં વધુ મુસાફરો ભરી ફરતા હોવા છતાં કોઇ કાર્યવાહી કરાતી નથી. ત્યારે ગુજરાતી એસટી તંત્રના વાકે મુસાફરોને ના છૂટકે વધુ ભાડું ખર્ચી ખાનગી શટલિયા વાહનોમાં ઘેટા બકરાની જેમ બેસી મુસાફરી કરવી પડે છે.

ત્યારે ગુજરાત એસટી તંત્ર દ્વારા માંડલ વિરમગામ અમદાવાદ રૂટ પર ફરતી મોટાભાગની લોકલ બસોને એક્સપ્રેસ કરી દેવામાં આવી છે. જેના લીધે માંડલ વિરમગામ અમદાવાદ વચ્ચેના ગ્રામ્ય વિસ્તારના લોકોને ખાનગી વાહનોમાં મુસાફરી કરવી પડે છે અને બપોરે 12 વાગ્યાથી 5:00 વાગ્યા સુધીમાં માડલથી અમદાવાદ જવા માટે એક પણ લોકલ બસની સુવિધા નથી. જેથી એસટી ડેપો દ્વારા બપોરની બસ શરૂ કરવા માગ છે.