કાર્યવાહી:ખંભાતની મહિલાનો મોબાઈલ નંબર ટીકટોક પર વાઈરલ કર્યો, સાઈબર સેલને જાણ કરતાં કાર્યવાહી કરી

ખંભાતની મહિલાનો મોબાઈલ નંબર ટીકટોક પર વાઈરલ કરાયાની જાણ સાઈબર સેલને કરવામાં આવતા સાઈબર સેલે ટીકટોક એકાઉન્ટ બંધ કર્યુ હતુ. ખંભાતમાં રહેતી એક પરિણીતાનો મોબાઈલ નંબર એક શખ્સે ટીકટોક પર નાંખી તેને વાઈરલ કર્યો હતો. દરમિયાન બીજી તરફ મોબાઈલ નંબરને લઈને પરિણીતાને ફોન કરીને કેટલાંય શખ્સો દ્વારા હેરાનગતિ કરવામાં આવતી હતી. જેને પગલે કંટાળેલી પરિણીતાએ આખરે આ સંદર્ભે સાઈબર સેલમાં ફરિયાદ કરી હતી. સાઈબર સેલ દ્વારા તુરંત જ કંપનીમાં ફોન કરવામાં આવ્યો હતો અને કંપનીને એકાઉન્ટમાં મહિલાનો નંબર લખી વાઈરલ કરી તેને હેરાનગતિ કરવામાં આવતી હોવાની જાણ કરી હતી. જેને પગલે કંપનીએ પણ વિડિયો વાઈરલ કરનારા એકાઉન્ટ ધારકનું એકાઉન્ટ બ્લોક કરી દીધું હતું.