કાર્યવાહી:કાવીઠામાંથી વિદેશી દારૂની 30 બોટલો સાથે બુટલેગર ઝબ્બે, પોલીસે ગુનો નોંધી વધુ તપાસ હાથ ધરી

બાવળા તાલુકામાં અને શહેરમાં તહેવારો ઉપર વિદેશી અને દેશી દારૂનું ધૂમ વેચાણ વધી જવા પામે છે. ત્યારે બાવળા પોલીસ તહેવારોને લઇને કોઇ અનિચ્છનીય બનાવ ના બને અને અસામાજિક તત્વો ઉપર વોચ રાખવા માટે પેટ્રોલિંગ કરી રહી હતી. તે દરમિયાન બાવળા પોલીસને બાતમી મળી હતી કે તાલુકાનાં કાવીઠા ગામમાં રહેતો ગંભીરસિંહ વિક્રમભાઇ રાઠોડ ગામની સીમમાં આવેલી ગવારીયા વાળી નેળમાં બાવળની ઝાડીમાં વિદેશી દારૂનો જથ્થો સંતાડીને વેચાણ કરી રહ્યો છે.

બાતમીનાં આધારે બાવળા પોલીસે બાતમી મુજબની જગ્યાએ દરોડો પાડતાં બાવળની ઝાડી પાસે બુટલેગર ગંભીરસિહ હાજર હતો અને તે પોલીસને જોઇને ભાગવા લાગ્યો હતો પરંતુ પોલીસે પીછો કરીને તેને પકડી લીધો હતો. અને બાવળની ઝાડીમાં તપાસ કરતાં ખાખી કલરના પુંઠાના બે બોક્સ મળી આવ્યા હતાં. બોક્સમાં તપાસ કરતાં તેની અંદરથી વિદેશી દારૂની 30 બોટલો મળી આવી હતી જેથી પોલીસે 15000 રૂપિયાનો વિદેશી દારૂ જપ્ત કરીને બુટલેગરને જેલના સળીયા પાછળ ધકેલી દઈને તેની વિરૂદ્ધ પ્રોહિબીશન એક્ટ હેઠળ ગુનો નોંધી કાયદેસરની કાર્યવાહી હાથ ધરી છે. પોલીસે દારૂની બદીને અટકાવવા ચક્રો ગતિમાન કર્યા છે.