મદદ:લોકડાઉનમાં બેકાર શેરડીના કોલાવાળાને નાણાં પરત કરાયા

આણંદ શહેરના વિવિધ વિસ્તારોમાં કુલ 39 શેરડીના રસના કોલાવાળા પરપ્રાંતીયોને પાંચ હજારનું ભાડુ અને વીજકંપનીએ સાત હજારની ડિપોઝીટ પરત કરી હતી. આ ઉપરાંત બિલના નાણાં માફ કર્યા હતા. જેના કારણે પરપ્રાંતીયોને અંદાજે 12 હજાર જેટલી રકમ પરત આપતા શ્રમજીવીઓને વતન પરત જવા માટેની વ્યવસ્થા થઇ જતાં ખુશીની લહેર ફરી વળી હતી. આણંદ નગરપાલિકાના દબાણ શાખાના રઝાકભાઈએ જણાવ્યું હતું કે, રેલવે સ્ટેશન, નવા અને જૂના એસટી બસ સ્ટેન્ડ, વ્યાયામશાળા, ટાઉનહોલ અને વિદ્યાનગર રોડ સહિત કુલ 39 જણાંને ઉનાળામાં શેરડીના રસ શરૂ કરવા પરવાનગી  આપવામાં આવી છે. જેમાં તેમણે ઉચ્ચકભાડા પેટે પાંચ હજાર રૂપિયાાની પાવતી આપવામાં આવે છે. કોરોનાને કારણે લોકડાઉનની જાહેરાત થતા હોળી બાદ આવીને શેરડીના રસ કોલા શરૂ કર્યાને ધંધો બંધ થઇ ગયો હતો. આશરે દોઢ મહિના સુધી બેકાર બનેલા શ્રમજીવોઓ માટે આણંદ નગરપાલિકા દ્વારા સાઇબાબા મંદિરના ટ્રસ્ટમાં નામ અને સરનામા આપતા તેમને બંને ટાઇમ ગરમ ભોજનની સુવિધા આપવામાં આવી હતી. હવે ટ્રેન શરૂ થતા પરપ્રાંતીયો જવા માટે વિચારી રહ્યાં હતાં. ત્યારે આણંદ નગરપાલિકાના પ્રમુખ કાંતિભાઈ ચાવડાએ તેમનો ધંધો બંધ રહ્યો હોવાથી તેમનું પાંચ હજાર રૂપિયાનું ભાડુ પરત કર્યુ હતું.