કાર્યવાહી:ઘોરામાં પત્ની સાથેના આડા સંબંધના વ્હેમમાં માર માર્યો, ઉમરેઠ પોલીસે ગુનો નોંધી કાર્યવાહી હાથ ધરી

ઉમરેઠમાં બે દિવસ અગાઉ પત્ની સાથેના આડા સંબંધના વ્હેમમાં માર મારતા સમગ્ર મામલો ઉમરેઠ પોલીસ સ્ટેશને પહોંચ્યો હતો. ઉમરેઠના ઘોરા પ્રાથમિક શાળા પાસે રહેતા હરપાલસિંહ મહીડાએ ઉમરેઠ પોલીસ સ્ટેશને નોંધાવેલી ફરિયાદમાં જણાવ્યું હતું કે, તેના કાકા અશોકસિંહ મહીડા ઘોરા પ્રાથમિક શાળા પાસે બેઠા હતા. દરમિયાન એ સમયે ગામમાં રહેતો નિકુલસિંહ મહીડા તેમની પાસે આવ્યો હતો અને તેણે અશોકસિંહને તું મારી પત્ની સાથે કેમ આડો સંબંધ રાખે છે તેમ કહી કોદાળીના લાકડાનો હાથો મારી દીધો હતો. જેને પગલે તેમને કપાળના ભાગે ઈજા પહોંચી હતી. આ બનાવને પગલે લોકોના ટોળાં એકઠાં થતાં જતાં-જતાં તે આજે તો તુ બચી ગયો છે, ફરી જાનથી મારી નાંખીશ તેમ ધમકી આપી જતો રહ્યો હતો. ઉમરેઠ પોલીસે શખ્સ વિરૂદ્ધ ફરિયાદ નોંધી હતી.