કાર્યવાહી:કોમી વૈમનસ્ય સર્જાય તેવો મેસેજ વાઈરલ કરનારા શખ્સ સામે ફરિયાદ, આણંદ શહેર પોલીસે શખ્સની અટકાયત કરી

આણંદમાં ઈન્દિરા ગાંધી સ્ટેચ્યુ પાસેથી હિદું-મુસ્લિમ કોમ વચ્ચે વૈમનસ્ય સર્જાય તેવો મેસેજ સોશ્યલ મીડિયા પર વાઈરલ કરતાં આણંદ શહેર પોલીસ દ્વારા તે શખ્સ વિરૂદ્ધ ગુનો નોંધી તેને ઝડપી પાડી આગળની કાર્યવાહી હાથ ધરાઈ છે. આણંદ શહેર પોલીસ ઈન્દિરા ગાંધી સ્ટેચ્યુ પાસે પેટ્રોલિંગ કરી રહી હતી. દરમિયાન ઈન્દિરા ગાંધી સ્ટેચ્યુ પાસેથી પસાર થનારા જોળ ગામ સ્થિત દૂધની ડેરી પાસે રહેતા ચિંતનકુમાર જિતેન્દ્ર ભોઈના મોબાઈલ ફોનની તપાસમાં તેના મોબાઈલમાં હિદું-મુસ્લિમ વચ્ચે તનાવ ઊભો થાય તેવો મેસેજ હતો. જે તેણે તેના મોબાઈલથી વાઈરલ કર્યો હતો. આ મેસેજમાં છત્રપતિ શિવાજીનો ફોટો હતો અને તેમાં મુસ્લિમ કોમની લાગણી દુભાય તેવો મેસેજ હતો. જેને પગલે પોલીસે તેની અટકાયત કરી આગળની પૂછપરછ હાથ ધરી છે.