ક્રિએટિવિટી:પશ્ચિમ બંગાળમાં એક દુકાનદારે લોકોને મત આપવા પ્રોત્સાહિત કરવા નેતાઓનાં મીઠાઈનાં પૂતળાં બનાવ્યાં, મમતા બેનર્જીને વ્હીલ ચેરમાં પ્રચાર કરતા દેખાડ્યાં

પશ્ચિમ બંગાળમાં વિધાનસભાની ચૂંટણીનો અનોખો નજારો હાવડાની એક મીઠાઈની દુકાન પર જોવા મળ્યો. આ દુકાનમાં ચૂંટણીમાં ઊભા રહેલા ત્રણ પ્રમુખ દળના નેતાના પૂતળા મીઠાઈમાંથી બનાવ્યા છે. તેમાં વડાપ્રધાન નરેન્દ્ર મોદી, મમતા બેનર્જી સહિત અન્ય નેતાઓના પૂતળા સામેલ છે. આ મીઠાઈ બનાવવામાં હલવાઈએ તેની ક્રિએટિવિટીનો ભરપૂર ઉપયોગ કર્યો. નેતાના કપડાં, તેમની બેસવાની રીત અને હેરસ્ટાઈલનું ખાસ ધ્યાન રાખીને બનાવ્યા છે.

આ વખતે ચૂંટણીમાં મમતા બેનર્જીને પગમાં ઈજા થવાને લીધે તેઓ વ્હીલ ચેર પર બેસીને પ્રચાર કરી રહ્યા છે. મીઠાઈમાં પણ મમતા બેનર્જીને વ્હીલ ચેર પર બેસાડ્યા છે. વડાપ્રધાન નરેન્દ્ર મોદીને હાફ કુર્તો પહેરાવ્યો છે.

ન્યૂઝ એજન્સી ANI સાથે વાતચીત દરમિયાન દુકાનનાં માલિકે જણાવ્યું, આ મીઠાઈના પૂતળાને 6 મહિના સુધી કઈ નહિ થાય. તેના આકારમાં કોઈ ચેન્જ નહિ આવે. મીઠાઈના માધ્યમથી લોકોને વોટ આપવાનો સંદેશ આપ્યો છે. તમે ભલે ગમે તે રાજકીય પાર્ટી માટે વોટ કરો, પરંતુ મતદાનની પ્રક્રિયા શાંતિથી થવી જોઈએ. અહીં ગમે તે સરકાર આવે, તે યોગ્ય વિકાસ કરે એવી આશા છે.