વિચિત્ર ગામ:આ ગામમાં ક્યારેય સાંજ પડતી નથી, અહીં સૂરજ મોડો ઉગે છે અને વહેલો આથમે છે

સામાન્ય રીતે 12 કલાકમાં દિવસ, બપોર, સાંજ અને રાતનો સમાવેશ થાય છે. પરંતુ ભારતમાં એક એવું ગામ છે જ્યાં સાંજ ક્યારે પણ થતી નથી. આ ગામ તેલંગાણાના પેડ્ડા જિલ્લામાં આવેલું કોડૂરુપકા ગામ. એક સમયે તે નિઝામ શાસકો માટે હરવા-ફરવાનું સ્થળ માનવામાં આવતું હતું. હાલમાં જ ફરી એક વાર આ ગામ લોકોમાં આકર્ષણનું કેન્દ્ર બન્યું છે. આ ગામમાં ક્યારે પણ સાંજ નથી થતી. અહીં 24 કલાકમાં ફક્ત સવાર, બપોર અને રાત જ થાય છે.

બીબીસી તેલુગૂના રિપોર્ટ અનુસાર, આ ગામની ચારે તરફ પહાડો જ છે. આ ગામમાં હરિયાળી બહુ જ હોય જેના કારણે વાતાવરણ આહલાદક હોય છે. આ ગામ હાલ તો પ્રવાસીઓમાં આકર્ષણનું કેન્દ્ર બની રહ્યું છે.

આખા ગામની ચારે બાજુ છે પહાડ
કોડૂરુપકા ગામમાં સૂરજ મોડો ઉગે છે અને સાંજે જલ્દી જ આથમી જાય છે. આ ગામની ચારેબાજુ પહાડો છે. આ ગામમાં પૂર્વમાં ગોલા ગુટ્ટા, પશ્ચિમમાં રંગનાયકુલા ગુટ્ટા, દક્ષિણમાં પામુબંદા ગુટ્ટા અને ઉત્તરમાં નામ્બુલાદારી સ્વામી ગુટ્ટા પર્વતો છે. આ કારણોસર સૂર્યની ઉગવાનો અને આથમવાના સમયને પ્રભાવિત કરે છે.

નિજામ સાશન દરમિયાન આ ગામનું નામ પોડાલપકા હતું, બાદમાં નામ બદલીને કોડૂરુપકા કરવામાં આવ્યું હતું. આ વિસ્તારમાં ચોખાની ખેતી મુખ્ય છે, કપાસ અને મકાઈની પણ ખેતી કરવામાં આવે છે.