પહેલ:રાંચીની દેવિકાએ ઓટિઝ્મ પેશન્ટ માટે ઓટ્રિટ વેલનેસ સેન્ટરની શરુઆત કરી, પોતાની 3 વર્ષની દીકરીની બીમારીમાંથી પ્રેરણા મળી

ઝારખંડમાં રાંચીમાં રહેતી દેવિકા ભાદુડીને જ્યારે ખબર પડી કે ઓટિઝ્મ સ્પેક્ટ્રમ ડિસઓર્ડરથી પીડિત તેની ત્રણ વર્ષની દીકરી માટે કોઈ મેડિકલ સુવિધા નથી, ત્યારે મનોમન નક્કી કર્યું કે તે ઓટિઝ્મ પીડિત બાળકો માટે કંઈક કરશે. થોડા સમયમાં તેણે પોતાના પ્રયત્નોથી ઓટ્રિટ વેલનેસ સેન્ટરની શરુઆત કરી. આ ઓટિઝ્મ દર્દીઓ માટે ઓક્યુપેશનલ અને સ્પીચ થેરપી એડ્સ છે.

દેવિકાએ કહ્યું, 2008માં મારી દીકરીને ઓટિઝ્મ બીમારી થઇ ત્યારે તેને ઘણી બધી તકલીફોનો સામનો કરવો પડ્યો કારણકે રાંચીમાં આવા બાળકો માટે મેડિકલ સુવિધા ઓછી છે. ત્યારે હું મારી દીકરીને કોલકાતા, વેલ્લોર અને બેંગલુરુ લઇ ગઈ. ત્યાં તેની થેરપી અને ટ્રીટમેન્ટ થઇ. પોતે ભોગવેલી તકલીફ જોઇને દેવિકા અને તેના પતિએ વિચાર્યું કે, એક એવા વેલનેસ સેન્ટરની શરુઆત કરવામાં આવે જ્યાં બધી સુવિધાઓ એકસાથે મળી શકે. ઓટિઝ્મથી પીડિત બાળકોના માતા-પિતાને પણ કોઈ તકલીફનો સામનો ના કરવો પડે. જો કે, આ કામ માટે તેમને વધારે રૂપિયાની જરૂર હતી.

દેવિકા અને તેના પતિએ પૈસાની વ્યવસ્થા કરી અને આ સેન્ટરની સ્થાપના કરી. અહીં ઓટિઝ્મના દર્દીઓને પહેલાં નહોતી મળતી તે બધી સુવિધાઓ મળી રહી છે. તેમને ખુશી છે કે, હવે ઓટિઝ્મના દર્દીઓને લઈને શહેરની બહાર સારવાર કરાવવા નહીં લઇ જવા પડે.