મેરેજ મેકઓવર:તમિલનાડુના કપલે લગ્નમાં મહેમાનોને ભોજનની હોમ ડિલિવરી કરી, ચાર સુંદર બાસ્કેટમાં ભોજન જોઇને લોકો ખુશ થઈ ગયા

કોરોનાટાઈમમાં યોજાનારા લગ્નમાં નતનવા ફેરફાર જોવા મળી રહ્યા છે. ઘણા લોકો બધા ફંક્શન એક જ દિવસમાં પૂરા કરી રહ્યા છે તો ઘણી જગ્યાએ દુલ્હા-દુલ્હન વીડિયો કોલ દ્વારા મહેમાનોના આશીર્વાદ લઇ રહ્યા છે. આ દરમિયાન તમિલનાડુના એક કપલના લગ્નની સ્પેશિયલ અરેન્જમેન્ટ સોશિયલ મીડિયામાં વાઈરલ થઇ રહી છે.

આ કપલે મહેમાનો માટે માત્ર વેબકાસ્ટ જ નહિ પણ મહેમાનોના ઘરે ફૂડ ડિલિવરીનું પણ આયોજન કર્યું. એક યુઝરે હાલમાં જ આ લગ્નની કંકોત્રી પણ સોશિયલ મીડિયા પર પોસ્ટ કરી છે. લગ્નના મેન્યુની ડિટેલ્સ પણ કાર્ડમાં લખી છે. દરેક મહેમાનોને ચાર રંગબેરંગી અને સુંદર બાસ્કેટ મોકલ્યા.

સોશિયલ મીડિયા યુઝર્સને લગ્નનો આ આઈડિયા સૌથી વધારે ગમ્યો છે. એક યુઝરે કહ્યું, આ મસ્ત આઈડિયા છે. બીજા યુઝરે લખ્યું, જો લગ્નમાં ભોજનનો બગાડ અટકાવવો હોય તો કોરોનાટાઈમ પછી પણ આ આઈડિયા અમલમાં મૂકવો જોઈએ. કપલે ડિલિવર કરેલા ફૂડમાં એ પણ જણાવ્યું કે પેક કરેલા કેળના પાન પર કઈ વસ્તુ કઈ જગ્યા પર છે.