યાદગાર અનુભવ:કેરળનાં કપલે પોતાની કારમાં ભારતનાં 13 રાજ્યોનો પ્રવાસ કર્યો, ઉદયપુર પેલેસથી લઇ ધોબીઘાટ સુધી મન ભરીને ફર્યાં

કેરળના ત્રિશૂર શહેરમાં રહેતા એક કપલે પોતાનું ભારત ફરવાનું સપનું પૂરું કર્યું. 23 વર્ષની લક્ષ્મી કૃષ્ણ અને 31 વર્ષીય હરિકૃષ્ણ જે. એ પોતાની કારમાં ભારતનાં 13 રાજ્યોની સફર કરી. આ પ્રવાસ પહેલાં તેમણે 4000 રૂપિયા આપીને કારને રિફર્બીશ્ડ કરાવી. તેમણે કાર રહેવા અને ઊંઘવાલાયક બનાવી. છેલ્લા બે મહિનામાં કપલે કર્ણાટક, મહારાષ્ટ્ર, ગુજરાત અને રાજસ્થાનનો પ્રવાસ કર્યો.

કારમાં કપલે ભોજનની સામગ્રી અને એક સ્ટવ પણ રાખ્યો જેથી જરૂર પડે જાતે રસોઈ બનાવી શકાય. જો કે, મહામારી દરમિયાન પ્રવાસ કરવો સરળ તો નહોતો. તેમણે રાજસ્થાનના ઉદયપુર પેલેસથી મુંબઈના ઘોબીઘાટની ગલીઓ જોઈ. પ્રવાસ દરમિયાન અનેક અજાણ્યા લોકોને મળ્યા, કોઈકે કાર પાર્ક કરવા જગ્યા આપી તો કોઈકે ફાર્મ હાઉસમાં રહેવા આશરો આપ્યો. લક્ષ્મી અને હરિકૃષ્ણ પંજાબ, જમ્મુ-કાશ્મીર, હિમાચાલ પ્રદેશ, ઉત્તરાખંડ, ઉત્તર પ્રદેશ, મધ્ય પ્રદેશ, આંધ્ર પ્રદેશ, તેલંગાણા અને તમિલનાડુ પણ ફર્યાં.