મહામારીમાં નવો આઈડિયા:બેલ્જિયમનું એક રેસ્ટોરાં કેમ્પર વૅનમાં ગ્રાહકોને ભોજન સર્વ કરે છે, સોશિયલ ડિસ્ટન્સનું પાલન કરવા સ્પેશિયલ આ રીત શોધી

મહામારી દરમિયાન લોકો પોતાનો બિઝનેસ ચલાવવા માટે નવી-નવી ટેક્નિક અપનાવી રહ્યા છે. આ દરમિયાન બેલ્જિયમમાં આવેલુ રેસ્ટોરાં તેમના ગ્રાહકોને કેમ્પર વૅનના ભોજન સર્વ કરી રહ્યું છે. આ રેસ્ટોરાંનું નામ મિઠીયાઝ એન્ડ સી છે. અહિ લોકો કેમ્પર વૅનમાં બેસીને ભોજન કરે છે. આ બધી વૅન રેસ્ટોરાંના પાર્કિંગમાં છે. રેસ્ટોરાંના સ્ટાફ મેમ્બર્સ માસ્ક પહેરીને કસ્ટમરને ભોજન સર્વ કરે છે.

કોરોનાવાઈરસને લીધે દુનિયામાં ઘણા એવા રેસ્ટોરાં છે જ્યાં ઇન્ડોર ડાઈનિંગ પર પ્રતિબંધ છે. આથી ઘણા રેસ્ટોરાં હોમ ડિલિવરીથી કસ્ટમરને જમવાનું આપી રહ્યા છે. આ રેસ્ટોરાંના માલિક માટ્ટીયા કોલુએ જણાવ્યું કે, કેમ્પર વૅનનો આઈડિયા મને હોમ ડિલિવરીના ઓર્ડર લેતી વખતે આવ્યો હતો. મેં અત્યાર સુધી ઘણી સારી કેમ્પર વૅન જોઈ છે. રેસ્ટોરાંનું ભોજન ઘરમાં કરવાને બદલે કેમ્પર કારમાં કરવાની મજા આવે છે. અમારા રેસ્ટોરાંની બહાર પાર્કિંગની પણ પૂરતી જગ્યા છે. કસ્ટર અહિ આવીને કેમ્પર વૅનમાં બેસીને ભોજન ઓર્ડર કરી શકે છે.

આ રેસ્ટોરાંમાં આવતી એક કસ્ટમરે કહ્યું કે, માતા-પિતા વગર આવેલા બાળકો પણ અહિ આરામથી જમી શકે છે. આ જગ્યા સાચે બહુ સારી છે. બેલ્જિયમમાં 13 ડિસેમ્બર સુધી લોકડાઉન છે. પરંતુ ધીમે-ધીમે અમુક દુકાનો ખુલી રહી છે. આ સ્થિતિ જોઈને કહી શકાય કે અહિ જાન્યુઆરી સુધી રેસ્ટોરાં બંધ રહેશે.