• Gujarati News
  • Lifestyle
  • Health
  • Patients With Uncontrolled Diabetes Have An Increased Risk Of Black Fungus After Recovery From Corona; Find Out Which People Are Most At Risk

બ્લેક ફંગસનું વધતું જોખમ:અનિયંત્રિત ડાયાબિટીસનો સામનો કરી રહેલા દર્દીઓમાં કોરોનાથી રિકવરી બાદ બ્લેક ફંગસનું જોખમ વધારે; જાણો કયા લોકોને તેનું જોખમ વધારે છે

2 વર્ષ પહેલા
  • કૉપી લિંક

કોરોનાથી રિકવર થયા બાદ અનિયંત્રિત ડાયાબિટીસનો સામનો કરી રહેલા દર્દીઓમાં બ્લેક ફંગસનું જોખમ વધારે છે. આવા દર્દીઓને અલર્ટ રહેવાની જરૂર છે. આ વાત સંજય ગાંધી પોસ્ટ ગ્રેજ્યુએટ ઈન્સ્ટિટ્યુટ ઓફ મેડિકલ સાયન્સની ઓનલાઈન કોન્ફરન્સમાં પ્રો. આર.કે ધીમાને જણાવ્યું હતું. પ્રો. ધીમાનના અનુસાર, બ્લેક ફંગસ એટલે કે મ્યુકરમાઈકોસિસ એવા દર્દીઓમાં જોવા મળી રહ્યો છે જેમની બીમારીઓ સામે લડવાની ક્ષમતા ઓછી છે. ડાયાબિટીસ કંટ્રોલ નથી રહેતું તો આ બીમારીનું જોખમ વધારે છે.

પ્રો. ધીમાનના જણાવ્યા પ્રમાણે, બ્લેક ફંગસના કણ હવા અને માટીમાં રહે છે. શ્વાસ દ્વારા પ્રદૂષિત હવા દ્વારા તે શરીરમાં પ્રવેશે છે. કોરોનાનાં દર્દીઓ જેમને સ્ટેરોઇડ આપવામાં આવી રહી છે તે આ ફંગસના હાઈ રિસ્કમાં છે. તેની સારવાર માઈક્રોબાયોલોજિસ્ટ, ENT સ્પેશ્યાલિસ્ટ, ઓપ્થેલેમોલોજિસ્ટ અને ડાયાબિટોલોજિસ્ટની મદદથી કરવામાં આવે છે.

શું છે બ્લેક ફંગસ
આ એક ફંગલ ડિસીઝ છે. જે મ્યુકરમાયકોસિસ નામના ફંગસથી થાય છે. તે મોટાભાગે તે લોકોને થાય છે, જેમને પહેલાથી જ કોઈ બીમારી હોય અથવા એવી મેડિસિન લઈ રહ્યા હોય જે ઈમ્યુનિટીને ઘટાડતી હોય અથવા શરીરની બીજી બીમારીઓનો સામનો કરવાની ક્ષમતા ઘટાડતી હોય.

તે શરીરમાં કેવી રીતે પહોંચે છે?
વાતાવરણમાં હાજર મોટાભાગના ફંગસ શ્વાસ દ્વારા આપણા શરીરમાં પ્રવેશે છે. જો શરીરમાં કોઈ પ્રકારનો ઘા છે અથવા શરીર બળી ગયું છે તો ત્યાંથી પણ આ ઈન્ફેક્શન શરીરમાં ફેલાઈ શકે છે. જો શરૂઆતના તબક્કામાં તેનું નિદાન કરવામાં ન આવે તો આંખોની રોશની જઈ શકે છે અથના શરીરના જે ભાગમાં આ ફંગસ ફેલાયું છે, તે ભાગ સડી શકે છે.

બ્લેક ફંગસ ક્યાં જોવા મળે છે?
આ ફંગસ વાતાવરણમાં ગમે ત્યાં રહી શકે છે, ખાસ કરીને જમીન અને સડી જતાં ઓર્ગેનિક મેટર્સમાં. જેમ કે, પાંદડાઓ, સડેલી લાકડીઓ અને કમ્પોસ્ટ ખાતરમાં તે જોવા મળે છે.

તેના લક્ષણો શું છે?
શરીરના જે ભાગમાં ઈન્ફેક્શન છે, તેના પર આ બીમારીના લક્ષણ નિર્ભર રાખે છે. ચહેરાની એક બાજુ સોજો, માથામાં દુખાવો, નાક બંધ થઈ જવું, ઉલ્ટી થવી, તાવ આવવો, છાતીમાં દુખાવો, સાઈનસ કન્ઝેશન, મોંની ઉપરનો ભાગ અથવા નાકમાં કાળા ઘા થવા, જે ઝડપથી ગંભીર થઈ જાય છે.

આ ઈન્ફેક્શન કયા લોકોને થાય છે?
તે એ લોકોને થાય છે જે ડાયાબિટિક છે, જેમને કેન્સર છે, જેમના ઓર્ગન ટ્રાન્સપ્લાન્ટ થયા હોય, જે લાંબા સમયથી સ્ટેરોઈડનો ઉપયોગ કરી રહ્યા હોય, જેમને કોઈ સ્કિનની ઈજા થઈ હોય, પ્રિમેચ્યોર બેબીને પણ આ થઈ શકે છે. જે લોકોને કોરોના થઈ રહ્યો છે, તેમની પણ ઈમ્યુન સિસ્ટમ કમજોર થઈ જાય છે. જો કોઈ હાઈ ડાયાબિટિક દર્દીને કોરોના થઈ જાય છે તો તેની ઈમ્યુન સિસ્ટમ વધારે કમજોર થઈ જાય છે. આવા લોકોમાં બ્લેક ફંગસ ઈન્ફેક્શન ફેલાવવાની આશંકા વધારે રહે છે.

આ ફંગસ કેટલું જોખમકારક છે?
આ ફંગસ એકથી બીજા દર્દીમાં નથી ફેલાતું, પરંતુ તે કેટલું જોખમકારક છે તેનો અંદાજ તેના પરથી લગાવી શકાય છે કે તેના 54% દર્દીઓનું મૃત્યુ થઈ જાય છે. આ ફંગસ જે એરિયામાં ડેવલપ થાય છે, તેને નષ્ટ કરી દે છે. સમયસર સારવાર કરાવવાથી તેનાથી બચી શકાય છે.

તેનાથી કેવી રીતે બચવું?
કન્સ્ટ્રક્શન સાઈટ અથના ડસ્ટવાળા એરિયામાં ન જવું, ગાર્ડનિંગ અથવા ખેતી કરતાં સમયે ફૂલ સ્લીવ્ઝની સાથે ગ્લવ્ઝ પહેરવા, માસ્ક પહેરવો, તે જગ્યાએ જવાનું ટાળવું, જ્યાંથી પાણી લિકેજ થઈ રહ્યું હોય, જ્યાં ડ્રેનેજનું પાણી ભરાયેલું હોય. જેમને કોરોના થઈ ચૂક્યો હોય, તેમને પોઝિટિવ અપ્રોચ રાખવો જોઈએ. કોરોનાથી સાજા થયા બાદ પણ રેગ્યુલર ચેકઅપ કરાવતા રહેવું. જો ફંગસના કોઈપણ લક્ષણ દેખાય તો તાત્કાલિક ડૉક્ટરની પાસે જવું જોઈએ. તેનાથી આ ફંગસ શરૂઆતના તબક્કામાં પકડમાં આવી જશે અને તેની સમયસર સારવાર કરી શકાશે.