લીલી હળદર શરદી-ઉધરસમાં ફાયદાકારક:આર્થરાઇટિસના દુખાવામાં આપશે રાહત તો શિયાળામાં શરીરને ગરમ રાખશે

શિયાળામાં લીલી હળદર મોટા પ્રમાણમાં મળે છે. હળદર સ્વાસ્થ્ય માટે કેટલી ગુણકારી છે એ વાત તો લગભગ બધાં જ જાણતા હશે. પણ શિયાળામાં મળતી લીલી હળદરના ફાયદા કદાચ તમે નહીં જાણતા હો. લીલી હળદર, સૂકી હળદર કરતાં પણ બહુ જ લાભકારી છે. લીલી હળદર અનેક બીમારી સામે લડવામાં મદદ કરે છે.

બાપુ નેચર ક્યોર હોસ્પિટલના આયુર્વેદ વિભાગના એચઓડી ડો. રશ્મિ ચતુર્વેદી લીલી હળદરના ફાયદા વિશે જણાવે છે કે, કાચી હળદર લોહીને શુદ્ધ કરે છે. આ સાથે જ ચામડીના રોગો, શરદી-ખાંસી અને દુખાવામાં દવાની જેમ કામ કરે છે. શિયાળામાં રોગપ્રતિકારક શક્તિ વધારવા અને રોગોથી બચવા માટે ડાયટમાં કાચી હળદરનો ચોક્કસપણે સમાવેશ કરી શકો છો.

ઈન્ફેક્શન અને શરદી-ખાંસીથી છુટકારો મળશે
હળદરમાં વિટામિન C અને K ઉપરાંત પોટેશિયમ, પ્રોટીન, કોપર, ઝિંક, ફોસ્ફરસ સહિત અનેક મિનરલ્સ મળી આવે છે. જેમાં એન્ટી બેક્ટેરિયલ અને એન્ટી ફંગલ ત્તત્વો પણ હોય છે. કાચી હળદરને પાણીમાં ઉકાળીને તેમાં કાળા મરી નાખીને પીવાથી શરદી, ઉધરસ અને ઈન્ફેક્શન જેવી સમસ્યાઓથી રાહત મળે છે. જો તમે ગળાના દુખાવા અને ઉધરસથી પરેશાન છો તો કાચી હળદરને દૂધમાં ઉકાળીને દરરોજ સવાર-સાંજ પીવાથી રાહત રહેશે.

આર્થરાઈટીસના દુખાવાથી રાહત મળશે
જે લોકોને સંધિવા કે સાંધાનો દુખાવો હોય તો કાચી હળદરનું સેવન કરી શકે છે. હળદરમાં જોવા મળતું કર્ક્યુમિનમાં એન્ટીઑકિસડન્ટ છે, જે શરીરમાં સોજાને દૂર કરે છે અને પીડાને દૂર કરવામાં મદદ કરે છે. દુખાવા અને સોજાથી છુટકારો મેળવવા માટે કાચી હળદરને દૂધમાં ઉકાળીને પીવો અથવા કાચી હળદરને પાણીમાં ઉકાળીને તેમાં કાળા મરી નાખીને પીવો.જ્યારે પાણી અડધુ રહી જાય ત્યારે તેને પીવો.

પેટની સમસ્યાથી મળશે છુટકારો
હળદરમાં એન્ટી-ઇન્ફેલેમટરી, એન્ટી-ઓક્સીડેન્ટ ગુણ હોય છે, જે પેટ અને પાચન સંબંધી સમસ્યાઓમાં રાહત આપે છે. શિયાળામાં પાણી ઓછું પીવાથી પાચન સંબંધી સમસ્યાઓ થાય છે. આ માટે કાચી હળદરને લીંબુમાં મિક્સ કરીને ખાઓ. ઝાડા, અપચો અને ગેસ જેવી સમસ્યાઓથી છુટકારો મેળવવા માટે કાચી હળદરને પાણીમાં ઉકાળીને પીવો. કાચી હળદરને ઉકાળીને તેમાં સમાન માત્રામાં લસણ અને એક ચમચી ઘી ભેળવીને પીવાથી અપચોની સમસ્યા દૂર થાય છે.

પાયરિયા માટે પણ અસરકારક
હળદરમાં એન્ટીબેક્ટેરિયલ અને એન્ટિસેપ્ટિક ગુણ હોય છે, જેના કારણે તે દાંતમાં રહેતા કીટાણુઓ સામે લડવામાં મદદ કરે છે. પાયોરિયાના કિસ્સામાં હળદરમાં સરસવનું તેલ ભેળવીને સવાર-સાંજ પેઢામાં માલિશ કરો અને પછી ગરમ પાણીથી ધોઈ લો.તે પાયોરિયાને કારણે થતા દાંતના દુખાવામાં રાહત આપે છે.

શિયાળામાં મારવાડની કાચી હળદરનું શાક
મારવાડમાં લોકો શિયાળામાં કાચી હળદરનું શાક ખાય છે. રાજસ્થાનમાં લોકો હળદરના શાકને સુપરફૂડ પણ કહે છે. કાચી હળદરની સિઝન આવતા જ આ શાક દરેક ઘરમાં તૈયાર કરીને ખાવામાં આવે છે. એવું માનવામાં આવે છે કે તેને ખાવાથી બીમારીઓ દૂર રહે છે. હવે તે માત્ર ઘરોમાં જ નહીં પરંતુ રાજસ્થાનની ઘણી ફાઇવ સ્ટાર હોટલોમાં પણ પીરસવામાં આવે છે.