હેલ્થ ટિપ્સ:બાળકોમાં ફેલાતા ‘ટોમેટો ફ્લૂ’ અંગે ડૉક્ટરોએ આપી ચેતવણી, જાણો તેના લક્ષણો અને સારવાર

ભારતમાં તબીબી નિષ્ણાતો દેશમાં વધુ એક ‘ટોમેટો ફ્લૂ’ વાઈરસના ફેલાવા સામે લડી રહ્યા છે. શનિવારના રોજ જાહેર કરાયેલા લેન્સેટ અભ્યાસ મુજબ, ભારતમાં 6 મેના રોજ કેરળમાં પ્રથમ વખત આ વાઈરસ નોંધાયો અને ત્યારથી ભારતમાં આ ફ્લૂનાં 82 જેટલા કેસ નોંધાયા છે. અભ્યાસ મુજબ આ સામાન્ય ચેપી રોગ મોટાભાગે 1 થી 5 વર્ષની વયના બાળકો અને રોગપ્રતિકારક શક્તિ ધરાવતા પુખ્ત વયના લોકોને લક્ષ્ય બનાવે છે.

‘ટોમેટો ફ્લૂ’ એટલે શું?
6 મે, 2022ના રોજ કેરળના કોલ્લમ જિલ્લામાં ‘ટોમેટો ફ્લૂ’ની ઓળખ સૌપ્રથમવાર કરવામાં આવી હતી. અભ્યાસમાં એવું જણાવાયું છે કે, ટોમેટા ફ્લૂના વાઈરસમાં કોવિડ-19 જેવા જ લક્ષણો જોવા મળે છે, પરંતુ આ વાઈરસ SARS-CoV-2 સાથે સંબંધિત નથી. વાઇરલ ઇન્ફેક્શનને બદલે ‘ટોમેટો ફલૂ’એ બાળકોમાં ચિકનગુનિયા અથવા ડેન્ગ્યુ તાવ પછીની અસર હોઈ શકે છે. આખા શરીરમાં લાલ અને પીડાદાયક ફોલ્લીઓ નીકળે છે અને તે ધીમે-ધીમે ટામેટાના કદ જેટલી મોટી થાય છે. આ કારણોસર ફલૂને ‘ટોમેટો ફ્લૂ’ નામ આપવામાં આવ્યું હતું.

લક્ષણો શું છે?
ટોમેટો ફ્લૂ ધરાવતાં બાળકોમાં જોવા મળતાં પ્રાથમિક લક્ષણો ચિકનગુનિયા જેવા જ હોય છે, જેમાં ઉંચો તાવ, લાલ અને પીડાદાયક ફોલ્લીઓ અને સાંધામાં તીવ્ર દુખાવાનો સમાવેશ થાય છે. તેના કેટલાક લક્ષણો જેમ કે શરીરમાં દુખાવો, તાવ અને થાક કોવિડ -19 દર્દીઓ દ્વારા અનુભવાયેલા લક્ષણો જેવા જ છે. આ સિવાયના લક્ષણોમાં સાંધાનો સોજો, ઉબકા, ઝાડા, ડિહાઇડ્રેશન, સાંધામાં દુખાવો અને તાવનો સમાવેશ થાય છે.

સારવાર
આરોગ્ય નિષ્ણાતો કહે છે કે, આ બીમારીની સારવાર માટે કોઈ ચોક્કસ દવા અસ્તિત્વમાં નથી. ડૉક્ટર સાથે વાત કરતા તેઓએ ચેતવણી પણ આપી હતી કે, આ ચેપ ‘ખૂબ જ ચેપી’ છે. ટોમેટો ફ્લૂની સારવાર ચિકનગુનિયા, ડેન્ગ્યુની સારવાર જેવી જ છે. તાવ અને શરીરના દુખાવા માટે પેરાસિટામોલ સહાયક ઉપચાર તરીકે ઉપયોગમાં લઈ શકો. ટોમેટો ફલૂની અસરકારક સારવાર વિકસાવવા માટે બીમારીનાં લક્ષણોનું કાળજીપૂર્વક નિરીક્ષણ કરવું જોઈએ.