વૃશ્ચિક રાશિ / વિક્રમ સંવત 2076નું વાર્ષિક રાશિફળ

Scorpio yearly horoscope of vikram samvat 2076 Vrishchik Rashifal in Gujarati
X
Scorpio yearly horoscope of vikram samvat 2076 Vrishchik Rashifal in Gujarati

Divyabhaskar.com

Oct 28, 2019, 12:30 AM IST

ધર્મ ડેસ્કઃ વિક્રમ સંવત 2076 શરૂ થવા જઈ રહ્યું છે. ત્યારે આગામી વર્ષ તમારા માટે કેવું રહેશે, સ્વાસ્થ્ય, વ્યવસાય, નોકરી, પારિવારિક, આર્થિક વગેરે દ્રષ્ટિએ આવનારું વર્ષ તમારું કેવું રહેશે તેના વિશે અમે અહીં જણાવીશું. કારતક સુદ એકમથી શરૂ થતું ગુજરાતી બેસતું વર્ષ 28 ઓક્ટોબર 2019થી શરૂ થઈ રહ્યું છે જે આસો વદ, 14 નવેમ્બર 2020ના રોજ પૂર્ણ થશે. જાણો તમને નવું વર્ષ કેટલું ફળદાયી રહેશે?

શુભાશુભ તારીખોઃ-

માસ    સાનુકૂળ તારીખ    પ્રતિકૂળ તારીખ
નવેમ્બર    10,11,18,21,25,28,29    9,10,14,15,19,26,28
ડિસેમ્બર    3,5,12,14,19,20,27,30    1,2,8,10,11,15,17,29
જાન્યુઆરી    6,7,8,15,18,20,26,30    5,9,11,17,19,21,29,31
ફેબ્રુઆરી    1,2,3,5,9,10,17,21,27    4,6,8,11,15,18,19,25
માર્ચ    4,8,11,19,20,22,27,31    3,5,10,12,21,23,25,28
એપ્રિલ    5,7,10,12,21,23,27,30    1,3,11,13,18,20,26,29
મે    1,3,5,7,11,15,19,26,31    2,6,10,12,14,20,25,27
જૂન    3,9,10,12,16,20,25,26    1,5,13,19,21,22,24,27
જુલાઇ    8,11,15,17,19,21,27,28    2,3,5,9,12,20,22,25
ઓગસ્ટ    2,3,10,12,18,23,25,26    1,7,8,9,11,15,20,24,28
સપ્ટેમ્બર    1,2,6,8,11,17,22,28,30    3,7,10,16,18,21,23,25
ઓક્ટોબર    8,10,12,15,19,21,27,28    1,2,3,5,11,13,18,20,30

વૃશ્ચિક રાશિના જાતકોએ કરવાના ઉપાયઃ- 

  • રાશિનો મંત્ર : શ્રી રામચંદ્રાય નમઃ|
  • અનુકુળ દેવતા : શ્રીરામ
  • અનુકુળ વ્યવસાય : સમારકામ સબંધિત   
  • અનુકુળ રત્ન : મોતી, પોખરાજ  
  • અનુકુળ ગ્રહ : સૂર્ય, મંગળ, ગુરુ
  • શુભ રંગ : જાંબલી , કેસરિયો  
  • શુભ અંક : 3, 8  
  • શુભ વાર : મંગળ, ગુરુ  
  • શુભ દિશા : દક્ષિણ
  • મિત્ર રાશિ : ધન, કુંભ  
  • શત્રુ રાશિ: મકર, મીન

સંપૂર્ણ વર્ષમાં કેટલો લાભ થશે?

1. ગુરુ ગ્રહનું વર્ષફળ

આ વર્ષે ગુરુ મહરાજ આપની રાશિમાં જ ભ્રમણ કરે છે. જેથી આપને સામાન્ય માનસિક તાણની અનુભૂતિ થઇ શકે છે. ગુરુની દૃષ્ટિએ આપનું વર્ષ બહુ લાભ નહિ કે બહુ નુકસાન નહિ તેવું જાય. વર્ષના ઉત્તરાર્ધ દરમિયાન ગુરુની રાશિ બદલાતા ધીરે-ધીરે ધન પ્રાપ્ત કરતા હોવ તેમ લાગે. દરેક ક્ષેત્રોમાં સારામાં સારી તક પ્રાપ્ત કરી શકો.

2. શનિ ગ્રહનું વર્ષફળ

શનિ મહારાજ આપની રાશિથી આ વર્ષ દરમિયાન ધનસ્થાનમાં રહેશે. આર્થિક સમસ્યા અને નાણાકીય કટોકટી રહેશે. વિરોધી, શત્રુ ક્ષેત્ર લોકોની અસરને કારણે તકલીફોનો સામનો કરવો પડે. કોઈ પણ સ્થાને ઉઘરાણીની રકમ લેવા જતા નાણાકીય મુશ્કેલીનો સામનો કરવો પડે. સાથી કર્મીઓના અસહકારથી મુશ્કેલીઓમાં વધારો થઇ શકે છે.

3. રાહુ ગ્રહનું વર્ષફળ

રાહુ મહારાજ આ વર્ષ દરમિયાન આપની રાશિથી દુઃખસ્થાને ભ્રમણ કરશે. આ કારણોસર આપને જીવનમાં ઘણાબધા ચડાવ-ઊતર જોવા પડે. આંખ, નાક, કાન, ગાળાની મુશ્કેલીઓ થઈ શકે છે. આ વર્ષ દરમિયાન એલર્જિક તેમજ ચેપી રોગોથી સાવધાન રહેવું. વર્ષના મધ્ય ભાગ પછી જીવનમાં થોડી સ્થિરતા આવતી જણાય.

4. લગ્નજીવન અને દાંપત્ય

આ વર્ષ દરમિયાન લગ્નજીવનમાં અણધાર્યાં પરિણામ આવે. પતિ કે પત્ની ધર્મ પરત્વેનો વિશ્વાસ ડગુમગુ થતો જોવા મળે. દાંપત્યજીવનમાં નાના-નાના કૌટુંબિક પ્રશ્નો આવે, પરંતુ તેનું શાંતિથી નિરાકરણ લાવવું. આપ સંયુક્ત કુટુંબમાં રહેતા હોવ તો બધાનો સારો સહયોગ પ્રાપ્ત થાય. લગ્ન કરવા માટે ઈચ્છુક છે તેવા જાતકોનાં લગ્ન થવાથી મન પ્રસન્ન રહે. આ વર્ષના ઉતરાર્ધમાં એવો પણ સમય આવી શકે છે કે સગાઇ કે સંબંધ કર્યો હોય તો વ્યવહાર કે અન્ય કારણોસર સગાઇ તૂટી શકે છે.

5. આરોગ્ય અને પ્રવાસ

શનિની ત્રીજા પાયાની પનોતી આપને ચાલે છે, પણ તેનાથી ગભરાવાની જરૂર નથી. જે જાતકો હૃદયરોગી હોય અથવા તો હૃદય સંબંધિત દવા લેતા હોય તો પોતાનું મેડિકલ ચેકઅપ સમયાંતરે કરાવતા રહેવું. શ્વાસ તેમજ બ્લડપ્રેશરના રોગથી સાવધાન રહેવું. આ વર્ષે પ્રવાસનાં જુદાં જુદાં માધ્યમો આપને મળશે. વિશેષ કરીને ફરવા-હરવા માટે કે આનંદ કરવાનાં સ્થળોએ આપ જઈ શકો છો. પરિવાર સાથેની આપની યાત્રા આપને લાભ કરાવે. આખા વર્ષ દરમિયાન વ્યવસાય અર્થે નાની-નાની યાત્રા વારંવાર કરવી પડે.

6. સંતાન અને અભ્યાસ

આપના ગોચર દૃષ્ટિકોણમાં ગ્રહોની એટલી માથાકૂટ નથી, પરંતુ શક્યતઃ જન્મકુંડળીના અશુભ યોગોને કારણે સંતાન સંબંધિત પ્રશ્નો આપને વિલંબ કરાવે. વર્ષના ઉતરાર્ધમાં બની શકે છે કે આપને સારા સમાચાર પ્રાપ્ત થાય. અભ્યાસમાં મહેનત કરવા છતાં ભાગ્ય સાથ આપતું ન હોય તેવું લાગે. ખરેખર પરીક્ષાલક્ષી તૈયારી આપના જ્ઞાનને સંકુચિત બનાવશે. એમાં પણ ગણિત અને નામનાં મૂળતત્ત્વો જેવા વિષયોમાં છીછરું જ્ઞાન આગળ જતા આપના માટે મુશ્કેલી પેદા કરી શકે છે. રાહુને કારણે આ વર્ષે નવી વિદ્યા શીખવાના યોગ પણ બને છે.

7. નોકરી અને ધંધો

નોકરીમાં આ વર્ષે આપને વિશેષ લાભ મળી શકે. કેટલાય સમયથી અટકેલી ફાઈલો કે રજૂઆતોનો અંત આવતા નોકરીમાં પ્રમોશન થઇ શકે છે. આપના પર જવાબદારીનો બોજો વધી શકે છે. સરકારી નોકરી સંબંધિત પરીક્ષાઓમાં સફળ થવાના પ્રબળ યોગ છે. સ્વતંત્ર વ્યવસાયથી આપ ઘણું બધું પ્રાપ્ત કરી શકો છો. વ્યવસાયને પ્રતાપે આપ નામ અને નાણાં બંને કમાઈ શકશો. સરકારી કામકાજોમાં ટેન્ડર પાસ થવાથી આપનો ધંધો વધે. એકંદરે વર્ષ વેપાર કરવા માટે સારું રહે.

8. જમીન–મકાન–સંપત્તિ

સ્થાવર અને જંગમ મિલકતમાં જેટલી સાવધાની રાખશો તેટલો ફાયદો આપને થશે. આ વર્ષ દરમિયાન જમીનમાં ક્યાંય કશું ખોટું ન થાય તેની કાળજી લેશો. જે મકાન વેચવા માટેની માથાકૂટ આપ કરી રહ્યા છો તેના વેચાણથી આપને આનંદ થાય. પત્ની કે પુત્રવધૂ માટે સોના-ચાંદીના દાગીના બનાવી શકાય. શેરબજાર કે અન્ય સ્થાનોનું રોકાણ આપની સંપત્તિમાં વધારો કરશે. અગાઉ શેરબજારમાં રોકેલાં નાણાંનો ફાયદો થતા વિશેષ આનંદ પ્રાપ્ત થાય.

9. શત્રુ–કોર્ટ–કચેરી

આપને છેલ્લા કેટલાય સમયથી શત્રુઓ સાથે ઘર્ષણ અને વાદવિવાદ થાય. સંવત ૨૦૭૫નું વર્ષ આપના દરેક શત્રુઓનો ઉપદ્રવ શાંત કરશે. ગુસ્સેથી બોલી જવાના, બદલો લેવાના, ઈર્ષ્યા કરવાના સ્વભાવને કારણે આપની મુશ્કેલીમાં વધારો થઇ શકે છે. કોઈ પણ આકસ્મિક કોર્ટ-કચેરીના ધક્કા ખાવાથી આપનું મન વધુ તકલીફમાં આવી શકે છે. ક્યારેક એવું લાગે કે સામસામે કેસ કરવા કરતાં શાંતિથી જીવવું વધારે ગમે. આપની નીતિ સ્પષ્ટ હશે તો ચોક્કસ વિજય મળશે માટે આત્મવિશ્વાસથી આગળ વધવું.

10. મહિલા વર્ગ

બહેનો માટે આવનારું વર્ષ ઘણું સુખ-શાંતિ અને ઉન્નતિકારક બને. આપના દ્વારા થયેલી તમામ પ્રવૃત્તિઓમાં આપની માનસિક હાજરીથી મનોબળમાં વૃદ્ધિ થાય. જે બહેનો વ્યવસાય કરે છે કે નોકરી કરે છે તે બહેનોને આર્થિક રીતે ફાયદો થઇ શકે છે. સામાજિક ક્ષેત્રમાં પોતાના યોગદાનને કારણે સમાજમાં પદ-પ્રતિષ્ઠા અને મોભો પ્રાપ્ત થાય. વધુ પડતા કાર્યભારને કારણે આપના સ્વાસ્થ્ય પર તેની અસર થઇ શકે છે. આર્થિક અને સામાજિક મુશ્કેલીઓ વધતા આપનું મન વધુ વિચલિત થઇ શકે. વર્કિંગ મહિલાઓને સાથી કર્મચારીઓની મદદ મળી રહે.

11. પ્રેમ સંબંધ

આ વર્ષે પ્રેમમાં વહેમનાં વમળો ઉપસ્થિત થતા હોય તેમ લાગશે. પ્રેમમાં શંકા અને કુશંકાને કારણે ગમે તેટલો જૂનો સંબંધ હશે તો પણ તે તૂટી શકે છે. જેને ખરેખર ચાહો છો તે વ્યક્તિ પ્રાપ્ત થયા પછી વાસ્તવિકતાની એટલે કે સામેવાળાના સ્વભાવની ખબર પડવાને કારણે સંબંધમાં પૂર્ણવિરામ આવી શકે છે. એકંદરે આ વર્ષે સાચો પ્રેમ મળવો આપના માટે થોડોક મુશ્કેલ બની શકે તેમ છે. જો આપ પરિણીત હોવ અને અન્ય સાથે પ્રેમ સંબંધ હોય તો તે ઘાતક સાબિત થઈ શકે છે માટે આપના જીવનસાથીને દગો ન આપશો.

12. વિદેશ યોગ

આ વર્ષની શરૂઆત આપને ખૂબ સારા સમાચારથી પ્રાપ્ત થઇ શકે છે. જેના માટે કેટલાય સમયથી મહેનત કરો છો તે મહેનતનું પરિણામ પ્રાપ્ત થશે. ભારતમાં આપને લાભ છે જ, પરંતુ વિદેશમાં પોતાના વ્યવસાય અર્થે જવાથી વિશેષ લાભ મળશે. વિદ્યાર્થી મિત્રો જે વિદેશમાં અભ્યાસ કરવા ઇચ્છે છે તેમના માટે વિદેશગમનનો માર્ગ મોકળો થશે. વિદેશથી સામાન ખરીદવો અને અન્ય દેશોમાં વેચવો વધુ સાનુકૂળ રહેશે. પ્રવાસ-યાત્રા માટે વિદેશ વિશેષ લાભદાયી રહેશે.

13. નડતર નિવારણ

આપની તમામ મુશ્કેલી દૂર કરવા માટે શ્રીયંત્રની પૂજા કરવી. જો શક્ય હોય તો આપના ઘરે પારદનું શ્રીયંત્ર લાવી પ્રસ્થાપિત કરશો તો લાભ થશે. અન્યથા કોઈ પણ શ્રીયંત્રનું માતા લક્ષ્મીનું સ્મરણ કરતા પંચામૃતથી રોજ અભિષેક, પૂજન-અર્ચન કરવાથી લાભની પ્રાપ્તિ થશે અને જીવનમાં સુખ-શાંતિ આવશે. સુદ અને વદ પક્ષની આઠમના દિવસે ચંડીપાઠ કરવો લાભદાયક રહેશે. ‘ૐ વરણ્યાય નમ:|’ મંત્રનો રોજ 3 માળાજાપ કરવો.

14. માનસિક સ્થિતિ

આપની સમસ્યાઓ હજી ઉકેલાઈ નથી એટલા માટે આપને તણાવ અને ચિંતાનો અનુભવ થાય. પોતાના મનનું ધાર્યું કાર્ય ન થવાથી મુશ્કેલીઓમાં વધારો થાય. એકંદરે માનસિક દૃષ્ટિકોણથી આપનું આવનારું વર્ષ મધ્યમ ફળદાયી બને. સ્વજનોને મળવાથી તેમજ મિત્રોને પોતાની હૈયાવરાળ કહેવાથી મન પરનો બોજો હળવો થાય.

15. નાણાકીય સ્થિતિ

ધનસ્થાનમાં શનિ આખું વર્ષ રહેશે. ધન એટલે કે ગુરુની રાશિનો શનિ હોવાને કારણે સ્થાનની વૃદ્ધિ કરશે. જેના પરિણામે નાણાકીય મુશ્કેલી ઓછી ભોગવવી પડે. આપની કુંડળીમાં ગુરુની સ્થિતિ બળવાન હશે તો આર્થિક રીતે વિશેષ લાભ થઇ શકે તેમ છે. કોઈની આર્થિક મદદથી વાહન વસાવી શકશો.

(વાર્ષિક ભવિષ્યફળ રજૂ કરી રહ્યા છે જ્યોતિષાચાર્ય ડૉ. જલ્પેશ મહેતા. [email protected])

COMMENT

Next Stories

    ની  સંપૂર્ણ વાંચનસામગ્રી