વિક્રમ સંવત 2076નું વાર્ષિક રાશિફળ

ધર્મ ડેસ્કઃ વિક્રમ સંવત 2076 શરૂ થવા જઈ રહ્યું છે. ત્યારે આગામી વર્ષ તમારા માટે કેવું રહેશે, સ્વાસ્થ્ય, વ્યવસાય, નોકરી, પારિવારિક, આર્થિક વગેરે દ્રષ્ટિએ આવનારું વર્ષ તમારું કેવું રહેશે તેના વિશે અમે અહીં જણાવીશું. કારતક સુદ એકમથી શરૂ થતું ગુજરાતી બેસતું વર્ષ 28 ઓક્ટોબર 2019થી શરૂ થઈ રહ્યું છે જે આસો વદ, 14 નવેમ્બર 2020ના રોજ પૂર્ણ થશે. જાણો તમને નવું વર્ષ કેટલું ફળદાયી રહેશે?

શુભાશુભ તારીખોઃ-

કુંભ રાશિના જાતકોએ કરવાના ઉપાયઃ-

1) સંપૂર્ણ વર્ષમાં કેટલો લાભ થશે?

ગુરુ આપની રાશિથી કર્મસ્થાને રહેશે. દસમા સ્થાનમાં હોવાથી બળવાન તે બની રહેશે. આ વર્ષનો સમયગાળો આપના માટે અત્યાર સુધીનો સૌથી શ્રેષ્ઠ સમય બની રહેશે. આપનું કાર્ય ધાર્યા કરતાં વધુ પ્રગતિમાં થતું રહેશે. કૌટુંબિક કાર્યમાં આપને યશ મળે. એકંદરે ગુરુ મહરાજની કૃપા આ વર્ષ દરમિયાન આપના પર રહેશે.

સંવત ૨૦૭૫નું શનિ મહરાજનું ગ્રહ ફળ આપના માટે સાનુકૂળ બનશે. શનિ મહારાજ આપની રાશિથી લાભસ્થાનેથી પસાર થશે. જેના કારણે આર્થિક વૃદ્ધિ કરી શકશો. ગૃહસ્થ જીવનમાં મનદુઃખનો પ્રસંગ બને. વર્ષના ઉત્તરાર્ધમાં સકારાત્મક વિચારસરણીને કારણે આપનાં તમામ અટકેલાં કાર્યોમાં નોંધનીય પ્રગતિ જોવા મળે.

આ વર્ષ દરમિયાન રાહુ આપની રાશિથી પાંચમા સ્થાને રહેશે. જેના કારણે આપને આપનો વિકાસ ઓછો થતો લાગે. શેરબજારમાં નુકસાની થવાની શક્યતાઓ નકારી ન શકાય. અભ્યાસમાં વિશેષ કાળજી લેવી પડે. રાહુને કારણે આ વર્ષે ભાગ્યની પરિસ્થિતિ વારંવાર બદલાતી હોય તેવું લાગે. અંગત મિત્ર સાથે અણબનાવ થઈ શકે.

દાંપત્યજીવનમાં માત્ર ને માત્ર અહંને બાજુમાં મૂકી વિચાર કરશો તો આપને વધુ ફાયદો થશે. જીવનસાથી સાથે પ્રેમભર્યા વ્યવહારને કારણે આપને લાભ થઇ શકે છે. અવિવાહિતોના વિવાહ અસાધારણ સંજોગોમાં થતા જોવા મળે. લગ્ન કદાચ વર્ષ પછી લેવાય તો નવાઈ નહિ. આમ દાંપત્યજીવનમાં અને લગ્નજીવનમાં આપના માટે આ વર્ષ મિશ્ર ફળદાયી બને. દાંપત્યજીવનમાં મધુરતા બનાવવા માટે ભગવતી માતા અંબાની પૂજા-અર્ચના કરવી. જેની સાથે છૂટાછેડા લીધા હોય તેની સાથે જ પુન: વિવાહનો યોગ બને છે.

વર્ષ દરમિયાન આપના સ્વાસ્થ્ય અંગે થોડીક ચિંતા રહ્યા કરે. નાની મોટી ઈજાઓથી સાવધાન રહેવું. વાયુ તેમજ ગેસથી પીડાતા રહેવું પડે. આપને ઊંઘનો પ્રશ્ન સતાવી શકે છે. આ વર્ષ દરમિયાન એટલું સારું છે કે કોઈ મોટી માંદગી કે ઓપરેશન થવાની શક્યતાઓ બહુ ઓછી છે. ખાસ અંધશ્રદ્ધાથી દૂર રહેવું. પ્રવાસની દૃષ્ટિએ આપને લાભ થઇ શકે છે. એકંદરે આરોગ્ય અને પ્રવાસની દૃષ્ટિએ આ વર્ષ મધ્યમ ફળદાયી બને. નાના-નાના પ્રવાસ તો થઈ શકે છે, પરંતુ વધુ દિવસોની મોટી યાત્રાઓ સમજી-વિચારીને કરવી.

પુત્ર પૌત્રાદિના કારણે આપનું ઘર હર્યુંભર્યું લાગે. આપના સંતાનની પ્રગતિને કારણે આપના દિવસો ખૂબ સારા રહે. સંતાનપ્રાપ્તિ માટે જો અત્યારે વિચાર કરતા હોવ તો સમય યોગ્ય છે. આ સમયમાં શુભ ફળની પ્રાપ્તિ અવશ્ય થાય. વાણિજ્ય શાખાના વિદ્યાર્થીઓએ વાણિજ્ય વ્યવસ્થાના તેમજ અર્થશાસ્ત્રના વિષયોમાં ધ્યાન આપવું પડે. જે વિદ્યાર્થીઓ દસ અને બારમાની પરીક્ષા આપવાના છે તે મિત્રોએ સકારાત્મક અભિગમથી મહેનત કરવી. જો ગોલ્ડ મેડલ કે પ્રથમ ક્રમાંક માટે પ્રયત્ન કરતા હોવ તો મહેનત વધુ કરવી પડે.

આપનું  આ વર્ષ નોકરીમાં ખૂબ મહેનત કરાવે. દિનપ્રતિદિન આપની જવાબદારીઓમાં વધારો થતો જાય. કેટલીક વખત એવું બને કે વધારે કાર્યભારને કારણે, માનસિક દબાણને કારણે આપને મુશ્કેલીઓનો સામનો કરવો પડે. જે લોકોને નોકરી છૂટી ગઈ છે તેવા મિત્રોને સંઘર્ષ કરવો પડે. જોકે, વર્ષના મધ્યભાગમાં નવી નોકરી મળી રહે. પોતાના ધંધા પ્રત્યે અરુચિ ઊભી થાય. એવું લાગ્યા કરે કે ધંધો બંધ કરી દઈએ, પરંતુ સમયની સાથે આપની પ્રગતિ થશે માટે ખોટા કોઈ નિર્ણય લેવા નહિ.

વર્ષ દરમિયાન જમીન ઈત્યાદિનાં ક્ષેત્રોમાં આપને લાભ થાય. લોન કે ગીરવે મૂકેલી જગ્યાઓ છોડાવી શકાય. જોકે, આપની જમીનમાં કાગળ-દસ્તાવેજ સંબંધિત અંતરાયો આવી શકે. બિનઅધિકૃત મકાનનું બાંધકામ કર્યું હશે તો સરકારી દંડ ભરવાની તૈયારી રાખવી પડશે. મકાન જો ભાડે આપ્યું હશે તો તેના ભાડાકરાર ઈત્યાદિ બરાબર ચકાસી લેવા. પોતાનું ઘર ખરીદવા કે બનાવવાના યોગ પ્રબળ બને. સોના કે ચાંદીમાં આપનું રોકાણ વધારે લાભદાયી બને.

આ વર્ષે કોઈ એવી ખરીદેલી જગ્યાની મુસીબત આવી પડે કે કોર્ટ-કચેરીના ધક્કા ખાવા પડે. સમગ્ર વર્ષ દરમિયાન મનથી તેમજ ધનથી વધારે ઘસાવું પડે. ગેેરસમજને કારણે વાદ-વિવાદ થઇ શકે છે. જો શાંતિથી સમજણપૂર્વક તેને જોવા-સમજવાની કોશિશ કરશો તો મુદ્દાનું નિરાકરણ લાવી શકશો. આ વર્ષે શત્રુઓમાં બુદ્ધિહીનતાને કારણે તેમના વિચારોનું ખંડન કરી શકો છો. એકંદરે એવું કહી શકાય કે બની શકે એટલા વિવાદો ટાળવા. કોઈ કાર્ય માટે સરકારી કચેરીઓના ધક્કા ખાઈ રહ્યા હોવ તો તે કાર્ય આ વર્ષે સરળતાથી થઈ જશે.

મહિલાઓ માટે આ વર્ષ વિશેષ લાભવાળું રહેશે. સમગ્ર વર્ષ દરમિયાન નાણાકીય મુશ્કેલી નહીં વર્તાય. વર્ષના મધ્ય ભાગમાં કેટલાક જરૂર વગરના અને ખોટા વિચારો આપની જીવનશૈલી બગાડશે, પરંતુ મન ઉપર પોતાનો કાબૂ રાખવો. કૌટુંબિક દૃષ્ટિએ આપનો સુમેળ સારો જણાય. સાથ-સહકાર સારો મળે. જો આપ નોકરી કરતા હોવ તો આપની ઉત્તરોત્તર પ્રગતિ થાય. નોકરી અને પરિવાર વચ્ચે સામંજસ્ય સાધી શકશો. આપ જો વ્યવસાય કરતા હશો તો આવકમાં બમણી વૃદ્ધિ થશે. નારીશક્તિનું ઉત્તમ ઉદાહરણ આપ સાબિત થઈ શકો છો.

વર્ષના પ્રારંભમાં આપના પ્રિય વ્યક્તિ સાથેની આપના સંબંધ સારા રહે, પરંતુ ધીરે ધીરે આપના ગુસ્સાને કારણે જે વ્યક્તિને પ્રેમ કરો છો તે વ્યક્તિને ગુમાવવી પડી શકે છે. કેટલીક વખત કારણ વગરની ચર્ચાને લીધે પ્રિયપાત્ર પરથી ભરોસો ઊઠી જાય. જો આપની ઉંમર પ્રેમ કરવાની અને સમજવાની નથી તો આ વિષયથી દૂર રહેવું. પ્રેમના સંદર્ભમાં વધુ ને વધુ મુલાકાતને કારણે એકબીજાને સારી રીતે ઓળખી શકાય. વર્ષના ઉત્તરાર્ધમાં એકબીજાને સારી રીતે સમજતા હોવાથી લગ્ન પણ કરી શકો છો. ટૂંકમાં પ્રેમ વિવાહમાં પરિણમી શકે છે.

આપનું આ વર્ષ વિદેશ સંદર્ભમાં આપને ઘણું બધું શીખવી જાય. જોકે, વિદેશ જવાની ઇચ્છામાં કોઈ ખોટા માર્ગે કે દિશામાં નાણાનો વ્યય ન થાય તેની ખાસ કાળજી રાખવી. જો વિદેશમાં રહેતા હોવ તો ગુનાહિત પ્રવૃત્તિને કારણે કે કાયદાભંગને કારણે આપની મુશ્કેલીઓ વધી શકે છે. વિદ્યાભ્યાસ માટે વિદેશ જવાની તૈયારી કરતા હોવ તો આપને સફળતા મળે. આપના કુટુંબના કે પરિવારના સ્વજન જો વિદેશમાં હોય તો તેમના થકી આપને લાભ થઇ શકે છે.

કુંભ રાશિના મિત્રોએ દિવ્યાંગો તથા ગરીબોને ભોજન કરાવવું. હનુમાનજીનું દર શનિવાર અને મંગળવારે પૂજન કરવું. હનુમાન ચાલીસાનો પાઠ કરી કોઈ પણ નવા કાર્યનો પ્રારંભ કરવો. દર મંગળવારે લવિંગ, ગૂગળ, જવ, તલથી ઘરમાં નાનો હોમ કરવો લાભદાયી રહેશે. કોઈ તકલીફ હોય તો દરરોજ કાગડાને રોટલી નાખવી. પોતાના ઈષ્ટદેવને દર શનિવારે સરસવના તેલનો દીવો કરવો. ‘ૐ દર્માં દર્મીં દર્મૌં દમ: શનિદેવાય નમ: સ્વાહા|’ મંત્રનો 3 માળાજાપ કરવો.

આ સમય આપની ઇચ્છાઓ અને લાગણીઓને વાચા આપવાનો છે. ઘણી વખત માનસિક અને વૈચારિક રીતે મૂંઝવણ થઇ શકે છે. જેના કારણે આપના મનમાં કેટલાક પ્રશ્નો ઉપસ્થિત થાય જેનું નિરાકરણ તમે જાતે ન લાવી શકો. ગુરુની મદદથી પોતાની માનસિક સ્થિતિને કાબૂમાં લઇ શકો. એકંદરે માનસિક સ્થિતિ સારી રહેશે.

પ્રભુકૃપાથી આવનારા આ વર્ષમાં આપની નાણાકીય સ્થિતિ ઘણી બળવાન રહેશે. ગુરુ દસમા સ્થાને રહી પોતાના જ ઘર એટલે કે ધન સ્થાનને જોતો હોવાથી વિશેષ લાભની પ્રાપ્તિ થઇ શકે છે. કોઈ ગુપ્ત ધન કે લોટરી આપને પ્રાપ્ત થઇ શકે છે. આ વર્ષ દરમિયાન આપનું ભાગ્ય આપને સંપૂર્ણ રીતે સાથ આપશે.

(વાર્ષિક ભવિષ્યફળ રજૂ કરી રહ્યા છે જ્યોતિષાચાર્ય ડૉ. જલ્પેશ મહેતા. acharyajalpeshmehta@gmail.com)