ભાસ્કર માટે 3 વિદ્યાર્થીનો રિપોર્ટ:યુક્રેને બોમ્બમારામાં 1300 ભારતીયને ઢાલ બનાવ્યા

ખાર્કિવ5 મહિનો પહેલા
  • કૉપી લિંક
  • યુક્રેનના જે ખાર્કિવમાં 20 હજાર સૈનિક લડાઈ લડી રહ્યા છે ત્યાં સ્કૂલ કેમ્પસમાં ભારતીય વિદ્યાર્થીઓ છે
  • વિદ્યાર્થીઓએ કહ્યું- બે દિવસથી બધા ભૂખ્યા છીએ

ખાર્કિવથી વિદ્યાર્થી અજય, સુમન, સિમરને ભાસ્કરના સુરેન્દ્ર માવલિયાને જણાવ્યું...
યુક્રેનના બીજા સૌથી મોટા શહેર ખાર્કિવમાં 9 દિવસથી યુદ્ધ ચાલી રહ્યું છે. યુક્રેનની સેનાએ રશિયાના હુમલાથી બચવા માટે અમને ઢાલ બનાવીને રાખ્યા છે. અમે અહીં 1300 વિદ્યાર્થી છીએ. ખાર્કિવથી 20 કિમી દૂર પિશાચોણ ગામ છે. અહીં એક સ્કૂલમાં અમને રાખવામાં આવ્યા છે. અમારી સાથે 350થી વધુ છોકરીઓ છે. યુક્રેની સેના અને વોલન્ટીર્સ અમને સ્કૂલથી બહાર નથી જવા દેતા. અમને અહીં લાવતાં પહેલાં કહેવામાં આવ્યું હતું કે બોર્ડર ક્રોસ કરાવી દેશે, પરંતુ હવે જવા જ નથી દેતા. સ્કૂલની નજીક યુક્રેની સેનાનો કેમ્પ છે. અમને યુક્રેની સેના બુધવારે 9 કિલોમીટર પગપાળા ચલાવીને અહીં લાવી. બે દિવસથી અમને ખાવાનું નથી આપ્યું. કેટલીક છોકરીઓને ફળો આપ્યા હતા, એ પણ ખતમ થઈ ગયો છે. સ્કૂલની અંદર-બહાર સૈનિક ચોકી કરી રહ્યા છે. સાંજે સાત વાગ્યે વીજળી બંધ કરી દે છે. આખો દિવસ સ્કૂલ કેમ્પસના 300 મીટરના વિસ્તારમાં બોમ્બમારો થતો રહે છે. અહીં લગભગ 350 વિદ્યાર્થી રાજસ્થાનના છે.

સુપ્રીમકોર્ટમાં કેન્દ્રએ કહ્યું- યુક્રેનથી અત્યારસુધી 17 હજાર ભારતીયોને બહાર કાઢ્યા
કેન્દ્ર સરકારે સુપ્રીમકોર્ટમાં કહ્યું હતું કે યુક્રેનથી 17 હજાર ભારતીયોને લાવવામાં આવી ચૂક્યા છે. કેટલાક હજુ ફસાયેલા છે જે વિદેશ મંત્રાલયના સંપર્કમાં છે. અરજીમાં જે વિદ્યાર્થીઓ ફસાયા હોવાની વાત કહેવામાં આવી છે, કેન્દ્રીય મંત્રી જ્યોતિરાદિત્ય સિંધિયા તેમના સંપર્કમાં છે. તેમણે માલડોવા બોર્ડર ક્રોસ કરી દીધી છે. ત્યાંથી તેમને ભારત લાવવામાં આવશે.

- ચીફ જસ્ટિસ એનવી રમન્નાએ કહ્યું- એક હેલ્પલાઇન શરૂ કરવી જોઈએ, જેની પર ત્યાં ફસાયેલા અન્ય ભારતીય પણ મદદ માગી શકે. ઓપરેશન ગંગા હેઠળ શુક્રવારે 17 ઉડાનો અને 3 હજાર ભારતીય વિદ્યાર્થીઓને દેશ લાવવામાં આવ્યા.

15 શહેરમાં જંગ: અત્યારસુધી માત્ર એક શહેર આવ્યું રશિયાના કબજામાં

  • યુક્રેનનો દાવો- 9 હજાર રશિયન સૈનિકનાં મોત થયાં. 217 ટેન્ક, 900 બખ્તરબંધ વાહન, 90 તોપો, 11 એન્ટીક્રાફ્ટ સિસ્ટમ, 31 હેલિકોપ્ટર તોડી પડાયાં.
  • રશિયાનો દાવો- અત્યારસુધી યુક્રેનનાં 1600થી વધુ સૈનિક ઠેકાણાં નષ્ટ. 52 રડાર પણ ધ્વસ્ત.
  • જેલેન્સ્કી બોલ્યા- તમામ યુરોપિયન દેશ યુક્રેન પર હવાઈહુમલા રોકવાનું દબાણ ઊભું કરે
  • રશિયાએ કહ્યું- યુક્રેન વાતચીતમાં જેટલો વિલંબ કરશે, હુમલા એટલા તેજ થશે
  • અમેરિકાના રાષ્ટ્રપતિ બાઇડને કહ્યું- રશિયા હુમલા રોકી દે તો તમામ પ્રતિબંધ હટાવી દેશે

વિદ્યાર્થીઓએ વીડિયો મોકલીને જણાવી સ્થિતિ

  • અમને બુધવાર સાંજે સ્કૂલ બિલ્ડિંગમાં લઈને આવ્યા. શુક્રવાર સવારે કોન્ટ્રેક્ટરે કહ્યું હતું કે પરત ખાર્કિવ લઈને જશે, પરંતુ ત્યાં તો વધુ ખતરો છે, તેથી અમે ઇન્કાર કરી દીધો.
  • આ સ્કૂલ આર્મી ઝોનમાં છે. ચારેતરફ આર્મી વૉલન્ટીર છે. અમને મોબાઇલ પર વધુ વાત નથી કરવા દેતા. ફોટો પાડવાની સખત મનાઈ છે. માંડમાંડ બે ફોટો લઈ શક્યા. ખાવાનું માગીએ છીએ તો સવાર-સાંજનો હવાલો આપીને ટાળી દેવામાં આવે છે.
  • અમને જે સ્કૂલમાં રાખવામાં આવ્યા છે ત્યાં ધમાકાઓનો અવાજ ગુંજે છે. મિસાઇલ પસાર થતી દેખાઈ રહી છે.
  • શુક્રવાર સવારે અમે આગળ વધવાની જીદ કરી પણ અમને રોકી દીધા. ભારતીય વિદેશ મંત્રાલયે સ્વીકાર્યું કે ખાર્કિવની પાસે 900થી વધુ ભારતીય વિદ્યાર્થી છે. રૂટ સેફ ન હોવાના કારણે મુશ્કેલી થઈ રહી છે. ભારતે બંને દેશોને અપીલ કરી છે કે લોકલ સીઝફાયર જાહેર કરી વિદ્યાર્થીઓને કાઢવામાં મદદ કરવામાં આવે.
અન્ય સમાચારો પણ છે...