ચીનમાં જિનપિંગની તાકાત વધુ મજબૂત બની:રાષ્ટ્રપતિ કાર્યકાળ ત્રીજી વખત વધશે, PM સહિત ઘણા મંત્રીઓને પદ પરથી હટાવશે

ચીનની સંસદ નેશનલ પીપલ્સ કોંગ્રેસે રવિવારે તેની વાર્ષિક બેઠક શરૂ કરી છે. રાષ્ટ્રપતિ શી જિનપિંગે તેના ઉદઘાટન સત્રમાં હાજરી આપી હતી. બેઠકમાં શી જિનપિંગના ત્રીજી વખત રાષ્ટ્રપતિ બનવા પર મહોર લાગશે. જેના કારણે તેમની તાકાત વધુ વધશે.

આ બેઠક એક સપ્તાહ સુધી ચાલશે, જેમાં ચીન સરકારમાં બેઠેલા મંત્રીઓની બદલી કરવામાં આવશે. તેમજ ઘણી બધી નિમણૂક પણ હશે. અહેવાલો અનુસાર આ બેઠકમાં શી જિનપિંગનો કાર્યકાળ ત્રીજી વખત વધારવામાં આવશે. જેના કારણે ચીનમાં તેમની શક્તિ વધુ મજબૂત થશે.

શી જિનપિંગ વડાપ્રધાન પણ બદલશે
મીડિયા રિપોર્ટ્સ અનુસાર, કમ્યુનિસ્ટ પાર્ટી મહત્વપૂર્ણ પદો પર બેઠેલા મંત્રીઓ અને સરકારી સંસ્થાઓના અધિકારીઓની બદલી કરશે. આમાં ચીનના પ્રીમિયર એટલે કે વડાપ્રધાનને પણ બદલવામાં આવશે. હાલમાં શી જિનપિંગના વફાદાર કહેવાતા લી કેકિયાંગ આ પદ પર છે. જેને લી કિઆંગને સોંપવામાં આવશે, જે શાંઘાઈ પ્રાંતમાં પાર્ટીના વડા હતા.

આ જ બેઠકમાં ચીનના સંરક્ષણ બજેટ અંગે જાહેરાત કરવામાં આવી છે. આ વર્ષે ચીન તેના સંરક્ષણ પાછળ વર્ષ 2023માં 18 લાખ કરોડ રૂપિયા ખર્ચ કરશે. જે ભારતના સંરક્ષણ બજેટ કરતાં લગભગ 3 ગણું વધારે છે. સંરક્ષણ બજેટમાં 7.2%નો વધારો કરવામાં આવ્યો છે. આ માટે ત્યાંની સામ્યવાદી સરકારે બાહ્ય પડકારોને ટાંક્યા છે.

ચીને આર્થિક વૃદ્ધિનો ટાર્ગેટ 5% રાખ્યો
બેઠકમાં 2023 માટે ચીનની આર્થિક વૃદ્ધિનો લક્ષ્યાંક 5% રાખવામાં આવ્યો છે. જે ગયા વર્ષના ચીનના આર્થિક વિકાસ કરતાં 2% વધુ છે. પ્રીમિયર લી કેકિઆંગે વાર્ષિક વર્ક રિપોર્ટ વાંચતા કહ્યું કે અર્થવ્યવસ્થાને પાટા પર લાવવા તેમની સરકારની પ્રાથમિકતા રહેશે. આ સિવાય 1 કરોડ 20 લાખ લોકોને રોજગાર આપવાનું લક્ષ્ય રાખવામાં આવ્યું છે.