કાબુલમાં ચીની હોટલ પર હુમલો:લોકો જીવ બચાવવા બારીમાં લટકતા દેખાયા, મુંબઈ આતંકી હુમલાની યાદ અપાવી, ચીની લોકો નિશાને હતા

અફઘાનિસ્તાનની રાજધાની કાબુલમાં ચીની હોટલના નામથી પ્રખ્યાત એક રેસ્ટોરન્ટ અને ગેસ્ટ હાઉસ પર હુમલો થયો છે. મીડિયા રિપોર્ટ અનુસાર, આ હોટલમાં ઘણા ચીની નાગરિક હાજર હતા. કેટલાક ફૂટેજ પણ સામે આવ્યા છે. જેમાં હોટલના એક ભાગમાં આગ જોવા મળી રહી છે. તાલિબાન સરકાર કે ચીની દૂતાવાસે હજુ સુધી આ મામલે કંઈ કહ્યું નથી.

રિપોર્ટ્સ અનુસાર- હોટલની અંદર કેટલાક ફિદાયીન હુમલાખોરો હાજર છે. આવી સ્થિતિમાં તાલિબાનના સુરક્ષા દળોને અંદર જવા માટે ઘણો સંઘર્ષ કરવો પડી રહ્યો છે. હોટલની અંદરથી ગોળીબારના અવાજો આવી રહ્યા છે. ચીનના ઘણા રાજદ્વારીઓ અવારનવાર અહીં આવે છે.

આ હુમલો એવા સમયે થયો છે જ્યારે ચીની રાજદૂતે શુક્રવારે કાબુલમાં પોતાના દૂતાવાસની સુરક્ષાને લઈને તાલિબાન અધિકારીઓ સાથે વાતચીત કરી હતી. બે અઠવાડિયા પહેલાં પણ આ જ વિસ્તારમાં પાકિસ્તાનના દૂતાવાસ પર ફાયરિંગ કરવામાં આવ્યું હતું. જેમાં એક પાકિસ્તાની રાજદ્વારી ઘાયલ થયો હતો. સોમવારના હુમલા વિશે વધુ વિગતોની રાહ જોવાઈ રહી છે.

બિલ્ડિંગનું નામ ચીની હોટલ કેમ
રિપોર્ટ્સ અનુસાર, આ હોટલનું અસલી નામ શેર-એ-નો છે. અહીંથી થોડે દૂર એક ગેસ્ટ હાઉસ છે અને મોટાભાગે ચીનના નાગરિકો અને રાજદ્વારીઓ અહીં આવે છે. આથી આ હોટલનું નામ જ ચાઈનીઝ હોટેલ પડ્યું. આ બિલ્ડિંગમાં સ્નૂકર હોલ અને સ્વિમિંગ પૂલ જેવી સુવિધાઓ છે. હાલમાં આ હોટલમાંથી આગ અને ધુમાડો નીકળતો દેખાઈ રહ્યો છે.

મોટો વિસ્ફોટ થયો
ન્યૂઝ એજન્સી એપીએ એક પ્રત્યક્ષદર્શીના હવાલાથી કહ્યું - હોટલની અંદર જોરદાર બ્લાસ્ટ થયો. આ પછી આગ ફાટી નીકળી હતી. ચીન અને અફઘાનિસ્તાન વચ્ચે 76 કિલોમીટર લાંબી સરહદ છે. તાલિબાન સત્તામાં આવ્યા બાદ અહીં ચીનીઓની અવરજવર વધી છે. ચીન અહીં મૂળિયાં ઉખેડવાની કોશિશ કરી રહ્યું છે.

ચીન સરકારને ડર છે કે અફઘાન તાલિબાન અને ISIS ખોરાસાન જૂથ ચીનમાં ઉઇગર મુસ્લિમોને મદદ કરી શકે છે. આથી જિનપિંગ સરકાર તાલિબાન સરકારને ખુશ રાખવાના તમામ પ્રયાસો કરી રહી છે. થોડા દિવસો પહેલાં પાકિસ્તાનના દૂતાવાસ પર થયેલા હુમલાની જવાબદારી ISISના ખોરાસાન જૂથે લીધી હતી.

ઓગસ્ટમાં મસ્જિદમાં થયેલા હુમલામાં 20નાં મોત થયાં હતાં
ઓગસ્ટમાં અફઘાનિસ્તાનની રાજધાની કાબુલમાં એક મસ્જિદમાં બ્લાસ્ટ થયો હતો, જેમાં 20 લોકોનાં મોત થયાં હતાં. ટોલો ટીવીની ટેલિગ્રામ ચેનલ અનુસાર, કાબુલના ખૈરખાના વિસ્તારમાં આવેલી 'અબુબકીર સેદિક' મસ્જિદમાં મગરીબની નમાજ દરમિયાન વિસ્ફોટ થયો હતો.

તાલિબાનના સુરક્ષા અધિકારીઓએ જણાવ્યું હતું કે કાબુલના પીડી-17 વિસ્તારમાં થયેલા વિસ્ફોટમાં મસ્જિદના મૌલવી અમીર મોહમ્મદ કાબુલીનું પણ મોત થયું હતું. આ વિસ્તારની હોસ્પિટલ ઈમર્જન્સી એનજીઓએ જણાવ્યું કે ત્યાં 5 બાળકો સહિત 27 લોકોને દાખલ કરવામાં આવ્યાં છે. આ બાળકોમાંથી એક બાળક 7 વર્ષનો પણ હતો.

ભારતીય દૂતાવાસ પણ નિશાના પર છે
અફઘાનિસ્તાનમાં ભારતીય દૂતાવાસને પણ નિશાન બનાવવામાં આવ્યું છે. ઓગસ્ટ 2013માં જલાલાબાદમાં દૂતાવાસ પર હુમલો કરનારા ત્રણ આત્મઘાતી હુમલાખોરો માર્યા ગયા હતા. જેમાં અફઘાન સેનાના કેટલાક જવાનો પણ માર્યા ગયા હતા. તે દરમિયાન, અફઘાનિસ્તાનમાં ભારતીય રાજદૂત અમરસિંહાએ માર્યા ગયેલા અને ઘાયલ લોકો સાથે વ્યક્તિગત રીતે મુલાકાત કરી અને સુરક્ષા પ્રદાન કરવા બદલ તેમનો આભાર માન્યો.

એટલું જ નહીં, તેમની તમામ તબીબી જરૂરિયાતોનો ખર્ચ પણ ભારતીય દૂતાવાસ દ્વારા ઉઠાવવામાં આવ્યો હતો. 2010માં કાબુલમાં બે ગેસ્ટ હાઉસ પર થયેલા હુમલામાં છ ભારતીયોનાં મોત થયાં હતાં. જુલાઈ 2008માં બ્રિગેડિયર અને બે આઈટીબીપીના જવાનો કાર બ્લાસ્ટમાં માર્યા ગયા હતા.