હોંગકોંગમાં 42 માળની બિલ્ડિંગમાં ભીષણ આગ, VIDEO:9 કલાકની જહેમત બાદ આગ પર કાબુ મેળવાયો, 170 લોકોને બચાવી લેવાયા, કોઈ જાનહાની નહીં

હોંગકોંગના સિમ શા સુઈ જિલ્લામાં એક 42 માળની બિલ્ડિંગમાં ભીષણ આગ લાગી હતી. આ આગ એટલી ભયાનક હતી કે આગ પર કાબુ મેળવવામાં 9 કલાક જેટલો સમય લાગી ગયો હતો. જે બિલ્ડિંગમાં આગ લાગી હતી તે શોપિંગ વિસ્તારમાં આવેલી છે અને તેમાં કન્સ્ટ્રક્શનનું કામ ચાલી રહ્યું હતું. દુર્ઘટનાની જાણ થતા જ ફાયરની ટીમ ઘટનાસ્થળે પહોંચી ગઈ હતી. જો કે સદનસીબે આ આગમા કોઈ જાનહાની થઈ નહોતી.

ફાયર વિભાગના એક અધિકારીએ જણાવ્યું હતું કે ગુરુવારે રાત્રે 11 વાગે એક બિલ્ડિંગમાં આગ લાગી હોવાના સમાચાર મળ્યા હતા. અમે તરત જ ફાયરની એક ટીમ રવાના કરી દીધી હતી. જો કે આગ એટલી ભયાનક હતી કે 250 જેટલા ફાયર ફાઈટરોએ ભારે જહેમત બાદ શુક્રવારે સવારે લગભગ 8 વાગે આગ પર કાબુ મેળવ્યો હતો. આગની આ દુર્ઘટના મોડી રાત્રે બની હતી, જેથી આસપાસના વિસ્તારોમાં વધુ લોકો નહોતા. અમે 170 લોકોને બચાવી લીધા હતા.

સૌથી પહેલા જુઓ દુર્ઘટનાની 2 તસવીરો

બિલ્ડિંગમાં સમારકામ ચાલી રહ્યું હતું
એક અધિકારીએ જણાવ્યું હતું કે જે બિલ્ડિંગમાં આગ લાગી હતી, ત્યાં એક મોટી ક્લબ અને લક્ઝરી હોટલ હતી. આ બિલ્ડિંગને રિનોવેટ કરવામાં આવી રહી હતી, માટે કેટલાક માળ પર કન્સ્ટ્રક્શન કામ ચાલી રહ્યું હતું. આ માટે 2019માં રી-ડેવલપમેન્ટ પ્રોજેક્ટ મંજુર કરવામાં આવ્યો હતો. આ કામ જુન 2023 સુધીમાં પુરુ થવાનું હતું.

જો કે કયા કારણોસર આટલી વિકરાળ આગ ભભુકી ઉઠી હતી, તે જાણી શકાયું નથી. આ બાબતે તપાસ કરવામાં આવી રહી છે.

ભયાનક આગની અન્ય તસવીરો પણ જુઓ...