અતિની ગતિ નહીં:રશિયામાં 1.5 લિટર વોડકા પીધા બાદ લાઇવ સ્ટ્રીમિંગ દરમિયાન વૃદ્ધનું મોત

રશિયામાં 60 વર્ષના એક વૃદ્ધનું સોશિયલ મીડિયા પર લાઇવ સ્ટ્રીમિંગ દરમિયાન મોત થયું. તેમણે 1.5 લિટર વોડકા લાઇવ પીવાની ચેલેન્જ સ્વીકારી હતી. જોકે, વોડકા પી લીધા બાદ તેઓ તરત જ ઢળી પડ્યા. બાદમાં તેમનું મોત થયું.

સમગ્ર ઘટના દર્શકોએ લાઇવ જોઇ. આ ઘટના રશિયાના ચર્ચિત ‘થ્રેશ સ્ટ્રીમિંગ’નો ભાગ હતી, જેમાં વિવિધ ચેલેન્જ સ્વીકારીને ઇનામ જીતી શકાય છે. તેમાં લોકો પૈસા ડોનેટ કરીને સ્પર્ધકોને વધુમાં વધુ વોડકા પીવા પ્રોત્સાહિત કરે છે. પોલીસે મૃતકની ઓળખ યૂરી ડશેચેકિન તરીકે કરી છે.

તેઓ સ્મોલેંસ્ક શહેરના રહેવાસી હતા. તેમણે અંદાજે 2 લાખ રૂ.ના ઇનામ માટે ચેલેન્જ સ્વીકારી હતી. નોંધનીય છે કે રશિયાના સેનેટર એલેક્સી પુશ્કોવે થ્રેશ સ્ટ્રીમિંગ પર પ્રતિબંધ લાદવા માગ કરી છે.