કેનેડાની સત્તાવાર પુષ્ટિ:અમેરિકા-કેનેડા બોર્ડર પર મૃત્યુ પામેલાં ચારેય ગુજરાતના ડિંગુચાનાં વતની, 10 દિવસ પહેલાં ઠંડીમાં થીજી જવાથી મૃત્યુ થયાં હતાં

યુએસ-કેનેડા બોર્ડર પર ગત 19 જાન્યુઆરીએ અમેરિકામાં ગેરકાયદે રીતે ઘૂસવા જતાં ભારે ઠંડીને કારણે થીજી જવાથી મૃત્યુ પામેલાં એક બાળક સહિતની ચારેય વ્યક્તિ ગુજરાતના ડિંગુચા ગામની હોવા અંગેની પુષ્ટિ કેનેડાની મોનિટોબાની રોયલ કેનેડિયન માઉન્ટેડ પોલીસે (RCMP) કરી છે. આ અંગેની માહિતી તેણે ભારતના હાઈ કમિશનને આપી છે.

ભારતના હાઈમિશને એક નિવેદનથી માહિતી આપી
ભારતના હાઈકમિશને ગુરવારે આ અંગે આપેલા નિવેદનમાં જણાવ્યું હતું કે કેનેડાના અધિકારીઓએ ચાર મૃતકના મૃતદેહોની ઓળખ કરી લીધી છે. તેમનાં નામ જગદીશ બળદેવભાઈ પટેલ (ઉંમર-39), વૈશાલીબેન જગદીશકુમાર પટેલ( ઉંમર-37), વિહંગી જગદીશકુમાર પટેલ( ઉંમર-11) અને ધાર્મિક જગદીશ કુમાર પટેલ (ઉંમર-3) છે.

RCMPએ 19 જાન્યુઆરીએ મૃતદેહો મળ્યા હોવાની માહિતી આપી હતી
ગત 19 જાન્યુઆરીએ મોનિટોબા રોયલ કેનેડિયન માઉન્ટેડ પોલીસે જણાવ્યું હતું કે અમેરિકા-કેનેડાની બોર્ડર નજીક મોનિટોબાના ઈમરસન વિસ્તારમાંથી બે બાળક અને બે આધેડના મૃતદેહો મળ્યા આવ્યા છે. ગેરકાયદે રીતે કેનેડામાંથી અમેરિકામાં ઘૂસવા જઈ રહેલા આ ગુજરાતી પરિવારના સભ્યોની ઠંડીમાં થીજી જવાથી મૃત્યુ થયું હતું. ઈન્ડિયાના હાઈકમિશને વધુમાં જણાવ્યું હતું કે કેનેડાની ઓથોરિટીઝે મૃતકોના મૃતદેહોની મેડિકલ તપાસ કરી હતી. અને એ તપાસમાં જણવા મળ્યું છે કે તમામ વ્યક્તિઓનાં મૃત્યુ ઠંડીમાં થીજી જવાને કારણે થયાં છે.

RCMPના ચીફ સુપરિન્ટેન્ડેન્ટ રોબ હિલે આ બાબતે શું કહ્યું?

મૃતકોના પહેરવેશને કારણે ઓળખ જાહેર કરવામાં સમય લાગ્યો

મોત મામલે એન્ટી હ્યુમન ટ્રાફિકિંગ યુનિટની તપાસ ચાલુ
કલોલ તાલુકાના ડિંગુચા ગામના પટેલ પરિવારના ચાર સભ્યનાં કેનેડાથી ગેરકાયદે અમેરિકા જતા રસ્તામાં ભારે બરફ વર્ષામાં માઇનસ 35 ડીગ્રીના વાતાવરણમાં થીજી જવાથી મોત થવાની ઘટનામાં ગુજરાત પોલીસવડાએ સીઆઈડી ક્રાઈમની એન્ટી હ્યુમન ટ્રાફિકિંગ યુનિટને તપાસ સોંપી દીધી છે. એમાં પ્રાથમિક તપાસ શરૂ થઈ ગઈ છે અને ગામના તલાટી પાસેથી મૃતકોનાં નામની મતદારયાદી વગેરે દસ્તાવેજો લઈ તપાસ આદરી છે.

દિવ્ય ભાસ્કરે કેનેડાના બિઝનેસમેન હેમંતભાઈ સાથે વાત કરી હતી
કેનેડાના વિનીપેગમાં સ્થાયી થયેલા બિઝનેસમેન હેમંતભાઈ શાહે દિવ્ય ભાસ્કર સાથે વાત કરતાં કહ્યું હતું કે આ વર્ષોથી ગુજરાતીઓ કેનેડામાંથી અમેરિકામાં ગેરકાયદે ઘૂસે છે, ત્યારે હવે આ સંદર્ભે ભારત સરકાર અને કેનેડા સરકારે મહત્ત્વ રોલ ભજવવો પડશે અને આ પરિવાર અહીં કેનેડા આવ્યો કેવી રીતે એ તપાસ કરવી પડશે. ભારતીય દૂતાવાસ અને સ્થાનિક તંત્ર એના પર કામ કરી રહ્યું છે. દૂતાવાસે આ અંગે પણ સ્ટેટમેન્ટ આપી દીધું છે, રોયલ કેનેડિયન માઉન્ટેડ પોલીસ સાથે કામ કરી રહ્યા છે. અહીંના કાયદા એવા છે કે તેઓ માહિતી કે મૃતદેહ એટલા જલદી નહીં સોંપે.

કલોલના પટેલ પરિવાર સાથે એજન્ટે 1.65 કરોડનું સેટિંગ કર્યું હોવાની ચર્ચા
અમેરિકા-કેનેડા બોર્ડર ક્રોસ કરતી વેળાએ ભારે હિમવર્ષાને કારણે બરફના મોતની ચાદરમાં પોઢી ગયેલા ગાંધીનગર કલોલના ડિંગુચા ગામના પટેલ પરિવારના સભ્યોનાં અકાળે મોતના સમાચાર વહેતા થતાં ગામમાં શોકનું મોજું ફરી વળ્યું હતું. ત્યારે ગામમાં વહેતી થયેલી વાતો મુજબ પટેલ પરિવારે કેનેડાથી અમેરિકા બોર્ડરમાં એન્ટ્રી કર્યા પછી સ્થાનિક એજન્ટને 1 કરોડ 65 લાખ ચૂકવવાનું નક્કી કર્યું હતું, એટલે કે અમેરિકા ઊતર્યા પછી જિજ્ઞેશ પટેલ ફોન કરીને જાણ કરવાનો હતો, પરંતુ ફોનની રાહ જોઈને બેઠેલા પરિવારને તેના મોતના સમાચાર મળતાં તેમના પર આભ તૂટી પડયું હતું.

શું છે સમગ્ર મામલો?
કેનેડામાં ભારે હિમવર્ષાને કારણે જનજીવન ઠપ થઈ ગયું છે. ત્યારે કેનેડા-યુએસની બોર્ડર પર માઈનસ 35 ડીગ્રી ઠંડીમાં થીજી જતાં 4 મૃતદેહ મળ્યા હતા અને આ ગુજરાતનો પટેલ પરિવાર હોવાનું બહાર આવ્યું હતું. કલોલના ડિંગુચાનો એક પટેલ પરિવાર હોવાની વાત વહેતી થતાં દિવ્ય ભાસ્કર દ્વારા કલોલના પટેલ પરિવારના મોભી સાથે વાત કરતાં તેમણે જણાવ્યું હતું કે તેમનો પરિવાર 4 દિવસથી ગુમ છે, પુત્ર 10 દિવસ પહેલાં કેનેડા જવાનું કહીને નીકળ્યો હતો. પરિવારના અન્ય સભ્ય સુરેશભાઈએ જણાવ્યું હતું કે અમે એમ્બેસીમાં સંપર્ક કરી રહ્યા છે. સોમવારે હકીકત જાણવા મળશે.