બોક્સ ઓફિસની દિવાળી:3 દિવસમાં 11 ફિલ્મની રિલીઝ ડેટ જાહેર, ટ્રેડ એક્સપર્ટ બોલ્યા- માત્ર આ ફિલ્મ્સથી જ 1500 કરોડથી વધુનું કલેક્શન થશે

કોરોનાવાઈરસ તથા લૉકડાઉનને કારણે થિયેટર છેલ્લાં 11 મહિનાથી બંધ હતા. જોકે, ત્રણ ચાર દિવસ પહેલાં જ બોલિવૂડના બિગ પ્રોડક્શન હાઉસે નવી ફિલ્મની રિલીઝ ડેટ જાહેર કરી છે. યશરાજ, ટી સિરીઝ, જેકી ભગનાની, દિનેશ વિજન, ધર્મા પ્રોડક્શન, રિલાયન્સ એન્ટરટેઈનમેન્ટ તથા આનંદ એલ રાયે પોતાની ફિલ્મ રિલીઝની નવી તારીખોની જાહેરાત કરી છે. ટ્રેડ એનાલિસ્ટના મતે, આ ફિલ્મથી બોક્સ ઓફિસને 1500 કરોડ રૂપિયાથી વધુનું કલેક્શન થાય તેવી શક્યતા છે.

ફિલ્મનું લિસ્ટ તથા રિલીઝ ડેટ

સલમાન-યશરાજને કારણે ફિલ્મ રિલીઝની ડેટ અનાઉન્સ થઈ
ટ્રેડ એનાલિસ્ટ તરણ આદર્શે કહ્યું હતું, ‘થિયેટરમાં ફિલ્મ રિલીઝ કરવાની શરૂઆત સલમાન ખાન તથા યશરાજ સ્ટૂડિયોએ કરી હતી. એક્ઝિબિટર્સે સલમાન ખાનને પત્ર લખીને થિયેટરમાં ફિલ્મ રિલીઝ કરવામાં આવે તેવી વિનંતી કરી હતી. ત્યારબાદ સલમાન ખાને પોતાની ફિલ્મ ‘રાધે’ ઈદ પર થિયેટરમાં રિલીઝ થશે તેવી જાહેરાત કરી હતી. પછી યશરાજ બેનરે પાંચ ફિલ્મની રિલીઝ ડેટ જાહેર કરી હતી. ત્યારબાદ અન્ય પ્રોડ્યુસર્સને હિંમત મળી હતી અને પછી એક પછી એક ફિલ્મની રિલીઝ ડેટ જાહેર કરવામાં આવી હતી.’

બોકસ ઓફિસની રોનક પાછી આવી
વધુમાં તરણ આદર્શે કહ્યું હતું, ‘કોરોનાવાઈરસ તથા લૉકડાઉનને કારણે બોક્સ ઓફિસને તાળાં વાગી ગયા હતા. જોકે, હવે દિવાળી પાછી આવી હોય એમ લાગે છે. માત્ર 11 ફિલ્મથી 1500 કરોડથી વધુ બિઝનેસ શક્ય બનશે. આ રકમ નાની છે, કારણ કે તમામ ફિલ્મ મોટી છે. બધામાં બિગ સ્ટાર કાસ્ટ છે. સ્ટાર પાવર દર્શકોને થિયેટર સુધી લાંબા કરશે.’

અક્ષયની બે ફિલ્મનો મેજર ક્લેશ
ટ્રેડ પંડિતોના મતે, ‘અક્ષય કુમારની 5 ફિલ્મ આ વર્ષે આવી રહી છે, જેમાં ‘સૂર્યવંશી’, ‘બેલબોટમ’, ‘પૃથ્વીરાજ’, ‘બચ્ચન પાંડે’ તથા ‘અતરંગી રે’ સામેલ છે. ‘બેલબોટમ’ તથા ‘પૃથ્વીરાજ’ની બીજી ફિલ્મ સાથે ટક્કર થશે તેમાં કોઈ બેમત નથી. ‘બેલબોટમ’ હોલિવૂડની ફિલ્મ ‘ફાસ્ટ એન્ડ ફ્યૂરિસ 9’ સાથે ટકરાશે અને ‘પૃથ્વીરાજ’ શાહિદની ફિલ્મ ‘જર્સી’ની સાથે રિલીઝ થશે. આવતા અઠવાડિયે હજી છ નવી ફિલ્મ રિલીઝની જાહેરાત કરવામાં આવશે.’