મતદારોની 56ની છાતી અને 156 સીટ:ભૂપેન્દ્રએ નરેન્દ્રનો જ નહીં, માધવસિંહનો રેકોર્ડ પણ તોડ્યો, ઇતિહાસમાં પહેલીવાર કોંગ્રેસ 17 સીટ સાથે તળિયે, જાણો તમામ 182 બેઠકનું પરિણામ

દેશભરમાં હિન્દુત્વની પ્રયોગશાળા અને ભાજપના એક મોડલ સ્ટેટ તરીકે ગુજરાતની ગણના થઈ રહી છે. 14 માર્ચ 1995ના રોજ ગુજરાતમાં પહેલીવાર કેસરિયો લહેરાયો હતો અને ભાજપે સત્તા સંભાળી હતી. 6 ડિસેમ્બર 1992ના રોજ બાબરી ધ્વંસ બાદ ગુજરાતમાં હિન્દુત્વનું વાવાઝોડું ફરી વળ્યું અને 1995માં 121 બેઠકની જંગી બહુમતી સાથે ભાજપે સત્તા હાંસલ કરી. ત્યાર બાદ 2002માં ગોધરાકાંડ થયો અને ભાજપે 127 સીટ સાથે ઐતિહાસિક જીત મેળવી. પરંતુ હવે વિકાસ+હિન્દુત્વના કમાલના કોમ્બિનેશન સાથે આજે કમળ ખીલ્યું છે. આ ભાજપના ચૂંટણી સૂત્ર ‘આ ગુજરાત મેં બનાવ્યું છે’ની જેમ ગુજરાતીઓએ મતનો નાયગ્રા ધોધ વહાવી કહ્યું કે, ‘આ કમલ મેં ખીલવ્યું’ છે. ભાજપે ગુજરાતના 60 વર્ષના ઇતિહાસના તમામ રેકોર્ડ બ્રેક કરી આજે 156 સીટ જીતી જ નહીં, પણ કેસરિયો મહાસાગર ઘુઘવી રહ્યો છે. આમ આદમી પાર્ટીને 5 સીટ તેમજ અન્યને ફાળે 4 સીટ(3 અપક્ષ અને 1 સમાજવાદી પાર્ટી) આવી છે. ભાજપને 52.5 ટકા, કોંગ્રેસ 27.3 ટકા અને આમ આદમી પાર્ટીનો 12.9 ટકા વોટશેર આવ્યો છે.

માત્ર સવા વર્ષથી મુખ્યમંત્રી પદે રહેલા ભૂપેન્દ્રએ તો નરેન્દ્ર જ નહીં, માધવસિંહનો 149 સીટનો રેકોર્ડ બ્રેક કરી દીધો. જ્યારે કોંગ્રેસનો કારમો રકાસ થતા ઇતિહાસમાં પહેલીવાર 17 સીટ પર જ સમેટાઈ ગઈ અને કોંગ્રેસનો જ રેકોર્ડ બ્રેક કર્યો.

હિન્દુત્વ અને વિકાસનું પેકેજ ને ગુજરાત કોંગ્રેસમુક્ત તરફ મોદીએ 2002માં ચૂંટણી જીત્યા પછી 2003માં જ વાઇબ્રન્ટ ગુજરાત સમિટ શરૂ કરી. મોદીએ વિકાસનું એક નવું મોડલ બનાવ્યું. અનેક ક્ષેત્રોમાં તેમણે મૂડીરોકાણ માટે દેશભરના અને પછી તો વિદેશની જાયન્ટ કંપનીઓને ગુજરાતમાં આમંત્રણ આપીને તેની દેશમાં ચર્ચા જગાવી. એક રાજ્યના મુખ્યમંત્રી તરીકે મોદી દેશના પ્રધાનમંત્રી મનમોહન સિંહ કરતાં વિકાસના મામલે લાંબા ગાળાનું વિઝન ધરાવે છે એવી ઇમેજ ઊભી થઇ. મોદીએ ગુજરાતમાં મૂડીરોકાણો લાવીને ગુજરાતમાં મોટા પ્રોજેકટ શરૂ કર્યા અને 2002ના કોમી તોફાનોને ભુલાવીને બિઝનેસ અને વિકાસના મુદ્દાને ચર્ચાનું કેન્દ્ર બનાવ્યા. એ પછી મોદીએ વિકાસની વાટ પકડી. પ્રચારમાં હિન્દુત્વ અને વિકાસનું પેકેજ આપ્યું અને ગુજરાતીઓએ સતત તેમને સત્તા આપી.

ગાંધીનગરના હેલિપેડ ગ્રાઉન્ડમાં 12મીએ શપથવિધિ
આવતીકાલે અથવા 10મી ડિસેમ્બરે કમલમ ખાતે મળશે ભાજપના નવા ચૂંટાયેલા ધારાસભ્ય દળની બેઠક યોજાશે. 12 ડિસેમ્બરના રોજ ગાંધીનગરના હેલિપેડ ખાતે થશે. નવી સરકારની શપથવિધિની શક્યતા.

પાર્ટીની હાર બાદ કાર્યકરે કોંગ્રેસ ઓફિસે હોબાળો મચાવ્યો
કોંગ્રેસના મોવડી મંડળથી નારાજ કાર્યકરે અમદાવાદના કોંગ્રેસના કાર્યાલયમાં નારાજગી વ્યકત કરી હતી. અંદર અંદર ટિકિટ આપવાનું નક્કી કરીને કોંગ્રેસને ખાડામાં લઈ જવામાં આવી હોવાનો આક્ષેપ કર્યો છે. કોંગ્રેસ કાર્યકરોની કેવી હાલત છે, એક વાર જોવા આવો. અમે વફાદારી કરી છે. લોકોમાં કોંગ્રેસના નેતાઓ એકવાર જાઓ તો ખબર પડે કે લોકો કેવા પ્રશ્ન કરે છે. કાર્યકર કોંગ્રેસ ઓફિસની સામે જ કૉંગ્રેસને આડે હાથે લીધી હતી તેમજ કાર્યાલયમાં ઘડિયાળ તોડી નાખી હતી.

3.40ઃ કોંગ્રેસમાંથી ભાજપમાં ગયેલા અશ્વિન કોટવાલની ખેડબ્રહ્મા સીટ પર તુષાર ચૌધરી સામે હાર

3.10ઃ મહીસાગર જિલ્લાની સંતરામપુર બેઠક પર ભાજપના કુબેર ડિંડોરની જીત.

3.6ઃ થરાદ સીટ પરથી ભાજપના શંકર ચૌધરીની જીત

3.5ઃ ભિલોડા સીટ પરથી પૂર્વ IPS અને ભાજપના ઉમેદવાર પી.સી.બરંડાની જીત

3.4ઃ ઇડર સીટ પરથી પૂર્વ શિક્ષણમંત્રી રમણલાલ વોરાની જીત

3.00ઃ અલ્પેશ ઠાકોરની ગાંધીનગર દક્ષિણ સીટ પરથી જીત

2.59ઃ 6 ટર્મથી જીતી રહેલા ભાજપના કેશુ નાકરાણીની ગારિયાધાર સીટ પરથી આપના સુધીર વાઘાણી સામે હાર

2.57ઃ ઝઘડિયા સીટ પર 1990થી જીતતા આવતા છોટુ વસાવાની જીત, ઇતિહાસમાં પહેલીવાર ભાજપનો વિજય

2.53ઃ આંકલાવ સીટ પરથી કોંગ્રેસના અમિત ચાવડાની જીત

2.50: સાવરકુંડલા સીટ પર ભાજપના મહેશ કસવાલાની જીત

2.40ઃ બોરસદમાં 1967 બાદ પહેલીવાર કોંગ્રેસની હાર અને ઇતિહાસમાં પહેલીવાર ભાજપની જીત

1.51: પાવી જેતપુર સીટ પરથી વિપક્ષના નેતા સુખરામ રાઠવાની હાર

1.42ઃ બાયડ સીટ પરથી અપક્ષના ધવલસિંહ ઝાલાની જીત

1.40ઃ આંકલાવમાં અમિત ચાવડાની જીત બાદ રિકાઉન્ટિંગ થયું

13.38ઃ મહુધા સીટ પર ઇતિહાસમાં પહેલીવાર ભાજપની જીત, 1975 બાદ કોંગ્રેસનો કિલ્લો ધ્વસ્ત

13.22: ભાજપના કંચનબેન રાદડિયાની ઠક્કરબાપાનગર સીટ પરથી 63647 મતોથી જીત

13ઃ 19 આંકલાવ સીટ પરથી અમિત ચાવડાની જીત

13ઃ15ઃ આરોગ્ય મંત્રી ઋષિકેશ પટેલ 30 હજાર મતથી આગળ

13ઃ01ઃ પૂર્વ મંત્રી કુમાર કાનાણીની જીત

12ઃ 46ઃ વિસાવદર સીટ પરથી પક્ષપલટુ હર્ષદ રીબડિયાની AAP સામે હાર

12ઃ45 ઇસુદાન ગઢવીનો ખંભાળિયા સીટ પર પરાજય

12ઃ42 પરેશ ધાનાણીની અમરેલી સીટ પરથી હાર

12ઃ41ઃ પૂર્વ મંત્રી જવાહર ચાવડાની માણાવદર સીટ પરથી હાર

12ઃ40ઃ ગોપાલ ઇટાલિયા અને અલ્પેશ કથીરિયાની હાર

12ઃ32ઃ AAPએ ગુજરાતમાં ખાતું ખોલ્યું, જામજોધપુરમાં આપના હેમંત ખવાએ ભાજપના પૂર્વ મંત્રીને હરાવ્યા

12ઃ27ઃ કોંગ્રેસના જિજ્ઞેશ મેવાણી 5000 મતથી આગળ

12ઃ19ઃ દસમાં રાઉન્ડના ભાવનગર ગ્રામ્ય બેઠકના ભાજપના પુરુષોત્તમ સોલંકી 42,179 મતથી આગળ.

12ઃ 19ઃ ભાવનગર પશ્ચિમ વિધાનસભા બેઠક પર બારમાં રાઉન્ડના અંતે ભાજપના જિતુ વાઘાણી 21000 મત કરતાં વધુ મતથી આગળ.

12: 15: કુતિયાણામાં સતત ત્રીજીવાર કાંધલ જાડેજાની જીત

12ઃ08ઃ ગારિયાધાર, બોટાદ, જામજોધપુર, ભિલોડા, વિસાવદર, ડેડીયાપાડામાં AAP આગળ

12ઃ 07ઃ ઇસુદાન ગઢવી 11 હજાર મતથી પાછળ

12ઃ 05ઃ 10 વર્ષ બાદ પોરબંદરથી અર્જુન મોઢવાડિયાની જીત

11ઃ03ઃ મુખ્યમંત્રી ભૂપેન્દ્ર પટેલની 60 હજાર મતે જીત, જમાલપુર-ખાડિયાથી ઇમરાન ખેડાવાલા અને અસારવા સીટ પરથી દર્શના વાઘેલાની જીત

11.03ઃ ડેડિયાપાડા સીટ પરથી આપના ચૈતર વસાવા 8,120 મતથી આગળ

10ઃ 51ઃ ભાજપ 156+1(જીત), કોંગ્રેસ 14, આમ આદમી પાર્ટી 6 અને અન્ય 4 સીટ પર આગળ છે.

10: 27 સત્તાવાર રીતે ધોરાજીમાં ભાજપના ડો.મહેન્દ્ર પાડલિયાની જીત

10ઃ 20ઃ ભાજપ 151 તો કોંગ્રેસ 18, આપ 7 અને અન્ય 6 સીટ પર આગળ ચાલી રહ્યા હતા.

10ઃ 19ઃ આરોગ્યમંત્રી ઋષિકેશ પટેલ પાછળ

10ઃ10ઃ ભાજપે ટ્રેન્ડમાં માધવસિંહની 149 સીટનો રેકોર્ડ તોડ્યો, 151 સીટ પર આગળ

10ઃ00 પરેશ ધાનાણી 7 હજાર મતથી આગળ

9ઃ 40ઃ ઇસુદાન ગઢવી 3100 મતે આગળ

9ઃ24ઃ ગારીયાધારમાં આપના સુધીર વાઘાણી આગળ

9ઃ 13: જીતુ વાઘાણી આગળ

9ઃ 10: કોંગ્રેસના મેવાણી આગળ

9ઃ 07ઃ કોંગ્રેસના મેવાણી પાછળ

9ઃ 05ઃ બીજા રાઉન્ડમાં હાર્દિક પટેલ આગળ

9ઃ 03ઃ ગાંધીનગર દક્ષિણથી અલ્પેશ ઠાકોર આગળ

8ઃ55ઃ આપના ચૈતર વસાવા આગળ

8ઃ 55ઃ ધાનેરામાં અપક્ષ ઉમેદવાર માવજી દેસાઈ આગળ

8ઃ 52ઃ ગાંધીનગર દક્ષિણથી અલ્પેશ ઠાકોર પાછળ

8ઃ 49ઃ શિક્ષણ મંત્રી જીતુ વાઘાણી

8ઃ 48ઃ વાવ સીટ પરથી કોંગ્રેસના ગેની બેન ઠાકોર અને થરાદમાં ભાજપના શંકર ચૌધરી આગળ

8: 39ઃ વિરમગામમાં હાર્દિક પટેલ પાછળ અને આપ આગળ

8: 37 મોરબીમાં ભાજપના કાંતિ અમૃતિયા, ડભોઈમાં શૈલેષ સોટ્ટા આગળ

8: 26 AM: EVMની મતગણતરી શરૂ થઈ

8: 26 AM: ભાવનગર ગ્રામ્ય સીટ પરથી ભાજપના પુરુષોત્તમ સોલંકી આગળ

8: 23 AM: વરાછાથી આપના અલ્પેશ કથીરિયા પાછળ

: 22 AM: ધાનાણી, વિરજી ઠુંમર અને અંબરિષ ડેર આગળ

8: 18 AM: કતારગામથી આપના પ્રદેશ અધ્યક્ષ ગોપાલ ઇટાલિયા આગળ

8: 13 AM: પોસ્ટલ બેલેટમાં ઇસુદાન ગઢવી અને પબુ ભા માણેક આગળ

2017માં ભાજપને 99, કોંગ્રેસને 77, NCP-1, BTP-2 અને 3 સીટ અપક્ષને મળી હતી. આ ત્રણ અપક્ષમાં જીજ્ઞેશ મેવાણી(હાલ કોંગ્રેસમાં), રતનસિંહ રાઠોડ(ભાજપના સાંસદ) અને ભૂપેન્દ્ર ખાંટ(નિધન થઈ ગયું)નો સમાવેશ થાય છે.

સમગ્ર મતગણતરી પ્રક્રિયા માટે 182 કાઉન્ટિંગ ઓબ્ઝર્વર્સ, 182 ચૂંટણી અધિકારી અને 494 મદદનીશ ચૂંટણી અધિકારી ફરજ બજાવશે. આ મતગણતરી અંતર્ગત રિટર્નિંગ ઑફિસર/આસિસ્ટન્ટ રિટર્નિંગ ઑફિસર, ઉમેદવાર-કાઉન્ટીંગ એજન્ટ્સ તથા ચૂંટણી પંચ દ્વારા નિમણૂંક પામેલા ઑબ્ઝર્વર્સની હાજરીમાં સ્ટ્રોંગરૂમમાંથી EVM બહાર કાઢી કાઉન્ટીંગ હૉલમાં ગોઠવવામાં આવ્યા છે.

જાણો તમામ બેઠકનું પરિણામ, કોની સામે કોણ જીત્યું