• Gujarati News
  • Dvb original
  • Surat Farmer Succeeds In Cultivating Colorful Taiwanese Watermelon, Yields 21 Lakhs In 9 Acres Of Land

પોઝિટિવ સ્ટોરી:સુરતના ખેડૂતે રંગબેરંગી તાઈવાની તરબૂચની ખેતીમાં મેળવી સફળતા, 9 એકર જમીનમાં 21 લાખનું ઉત્પાદન

સુરત7 દિવસ પહેલાલેખક: પંકજ રામાણી
સ્થાનિક કક્ષાએ ઉત્પાદિત થતાં તાઈવાનનાં રંગીન તરબૂચ હવે સામાન્ય લોકોનાં ઘર સુધી આસાનીથી પહોંચી રહ્યાં છે.
  • નર્સરીથી રોપાદીઠ 6ના ભાવે 29,000 વિશાલા અને આરોહી જાતના રોપા ઓર્ડર આપી મગાવ્યા

સામાન્ય રીતે આપણે લાલ તરબૂચ જોઈએ છીએ અને એનો સ્વાદ માણીએ છીએ, પરંતુ સુરત જિલ્લામાં સંભવત: પ્રથમ વખત પાઇનેપલ મિશ્રિત સ્વાદ ધરાવતાં પીળાં તરબૂચની ખેતી કરવામાં આવી રહી છે. ઉનાળામાં બજારમાં મીઠાં-મધુરાં તરબૂચની હાટો જોવા મળે છે. ગરમીમાં ઠંડીનો અહેસાસ કરાવતાં તરબૂચનું સેવન તમામ વયના લોકો માટે પહેલી પસંદ રહે છે. ત્યારે સુરત જિલ્લાના કામરેજ તાલુકાના ઘલા ગામના 42 વર્ષીય યુવા ખેડૂત પ્રવીણભાઈ વલ્લભભાઈ માંગુકિયાએ દેશી તરબૂચના સ્થાને તાઈવાનના રંગીન અને સ્વાદિષ્ટ તરબૂચ ઉગાડીને આધુનિક ખેતીને અનોખો આયામ આપ્યો છે. તેમણે ખેતરમાં મલ્ટીક્રોપ કોન્સેપ્ટથી આંબા કલમોની સાથે તરબૂચની ખેતીનો સફળ પ્રયોગ કર્યો છે. વિદેશી તરબૂચની પ્રગતિશીલ ખેતીને કારણે આજુબાજુનાં ત્રણ ગામના શ્રમિકોને રોજગારી પણ આપી રહ્યા છે, સાથે જ 9 એકર જમીનમાં રૂ. 21 લાખના ઉત્પાદનની આશા છે.

ટેક્નોલોજીનો ઉપયોગ કરીને આધુનિક રીતે ખેતી કરવામાં આવે છે.
ટેક્નોલોજીનો ઉપયોગ કરીને આધુનિક રીતે ખેતી કરવામાં આવે છે.

ટેક્નોલોજીનો ઉપયોગ કર્યો
સુરત જિલ્લાના પ્રગતિશીલ ખેડૂતો ન માત્ર કૃષિમાં વૈવિધ્યકરણ કરી રહ્યા છે, બલકે આધુનિક ખેતીમાં અદ્યતન ટેકનોલોજીનો સહારો લઈને અન્ય ખેડૂતોને નવી રાહ પણ ચીંધી રહ્યા છે. આવા જ એક ખેડૂત પ્રવીણભાઈ માંગુકિયાએ આધુનિક ટેકનોલોજીના માધ્યમથી ઉનાળુ સીઝનમાં રંગબેરંગી અને રસીલાં તાઈવાની તરબૂચનું વાવેતર કરીને જેકપોટ સમાન ઉત્પાદનનો અંદાજ સેવતા તા.21મી માર્ચે પ્રથમ જ દિવસે જ 20 ટન તરબૂચનું ઉત્પાદન પણ મેળવી લીધું છે.

ટૂંકા ગાળામાં લાખેણી કમાણી
તરબૂચ વાવેતર કર્યાના માત્ર 90 દિવસ બાદ રૂ.21 લાખનું ઉત્પાદન થવાની સંભાવના વ્યક્ત કરી હતી. એ પૈકી 7 લાખના દવા, મજૂરી તથા અન્ય ખર્ચને બાદ કરતાં તેમને 14 લાખનો ચોખ્ખો નફો થશે એમ તેમણે કહ્યું હતું. વિશેષ વાત એ છે કે તેમણે નવ એકર જમીનમાં મલ્ટીક્રોપનો પ્રયોગ કરતાં 4400 આંબાની કલમો પણ વાવી છે. વચ્ચેના ભાગમાં તરબૂચ ઉગાડ્યાં છે. જમીનનો સદુપયોગ કરી બે આંતરપાકો થકી વધુ આવક મેળવવાનો માર્ગ અખત્યાર કર્યો છે. આ ઉપરાંત તેમણે સોલર પાવર, ખેત તલાવડી અને ટપક પદ્ધતિથી સિંચાઈ સુવિધા ઊભી કરી છે, જેથી ભરઉનાળે સિંચાઈના પ્રશ્નનું કાયમી નિરાકરણ પણ મળ્યું છે.

બહારથી પીળાં અને અને અંદરથી લાલ હોય એવી જાતિનાં તરબૂચ પકવવામાં આવ્યાં છે.
બહારથી પીળાં અને અને અંદરથી લાલ હોય એવી જાતિનાં તરબૂચ પકવવામાં આવ્યાં છે.

પ્રથમ પ્રયાસ સફળતા મળી
અતિઘનિષ્ઠ ફળપાક યોજના હેઠળ આંબા કલમો વાવવા સાથે અંદરથી લાલ અને બહારથી પીળાં હોય એવી વિશાલા જાત અને બહારથી લીલાં દેખાતાં તથા અંદરથી પીળાં હોય એવી આરોહી જાતનાં ઓછાં બીજવાળાં અને અતિસ્વાદિષ્ટ તાઈવાની તરબૂચની ખેતીનો આ વર્ષે પ્રયોગ કર્યો છે. પ્રવીણભાઈને પ્રથમ પ્રયાસે જ સફળતા મળી છે. અધૂરામાં પૂરું, કેન્દ્ર અને રાજ્ય સરકારની 31 લાખની યોજનાકીય સબસિડી મળતાં તેમને કૃષિમાં અવનવા પ્રયોગો કરવા માટે પાંખો મળી છે.

પુણેથી બીજની ખરીદી કરી
પ્રવીણભાઈના જણાવ્યા અનુસાર, તરબૂચનું વાવેતર કર્યાના 75થી 90 દિવસના સમયગાળામાં તરબૂચનું ઉત્પાદન થવા લાગે છે, જેથી 9 એકરમાંથી અંદાજે 140 ટન જેટલાં તાઈવાની તરબૂચ પાકશે. પ્રવીણભાઈએ સાહસ કરીને જોખમભરી ખેતી હોવા છતાં રંગબેરંગી તરબૂચ ઉગાડ્યાં છે. તેમણે કહ્યું હતું કે 'નાન્યુ ઈન્ડિયા' મૂળ તાઈવાનની કંપની છે. એનાં બીજમાંથી બનતા રોપા પુણેથી ખરીદીને વાવેતર કર્યું છે. આ તરબૂચ સામાન્ય તરબૂચ કરતાં વધુ મોંઘાં વેચાય છે. વિશાલા, આરોહી વરાઇટીની વધુ માગ છે. ખાસ કરીને હોટલોમાં આ તરબૂચની વધુ માગ રહે છે, તેથી એ મોંઘાં પણ છે. એ 20થી 30 રૂપિયા પ્રતિ કિલોના ભાવે વેચાય છે, જેનું વજન 4થી 5 કિલો રહે છે. સામાન્ય રીતે હોટલ-રેસ્ટોરાંમાં જોવા મળતાં તાઈવાનના રંગીન તરબૂચ હવે કિફાયતી દરે ઉપલબ્ધ થતાં સુરત અને દક્ષિણ ગુજરાતના લોકોને સ્વાદમાં નવી વરાઇટી મળશે.

તરબૂચનું વાવેતર કર્યાના 75થી 90 દિવસના સમયગાળામાં એનું ઉત્પાદન થવા લાગે છે
તરબૂચનું વાવેતર કર્યાના 75થી 90 દિવસના સમયગાળામાં એનું ઉત્પાદન થવા લાગે છે

બે તબક્કામાં રોપા મગાવ્યા
ગત તા.10મી જાન્યુઆરીએ મહારાષ્ટ્રના પુણેની નર્સરીથી રોપાદીઠ 6ના ભાવે 29000 વિશાલા અને આરોહી જાતના રોપા ઓર્ડર આપી મગાવ્યા હતા. આ તરબૂચના રોપાને માટીને બદલે નારિયેળના પાઉડરમાં તૈયાર કરવામાં આવે છે. પહેલા સ્લોટમાં 5 એકરમાં વાવેતર કર્યા બાદ ફરીવાર બીજા સ્લોટમાં તા.2 ફેબ્રુઆરીએ વધુ 15000 રોપા મગાવ્યા હતાં, જેને વધુ 4 એકર જમીનમાં વાવેતર કર્યું હતું. બે હરોળ વચ્ચે 12 ફૂટ અને બે રોપા વચ્ચે 6 ઈંચના અંતરે વાવેતર કર્યું. કુલ 9 એકરમાં પ્લાન્ટ રોપ્યા બાદ પોલિપ્રોપિલીન કવર(ગ્રો કવર) ઢાંકવામાં આવ્યું હતું, જેના થકી શિયાળાના ધુમ્મસ અને ઉનાળાના તડકાથી પાકને રક્ષણ મળે છે.

પ્રવીણભાઈએ સાહસ કરીને જોખમભરી ખેતી હોવા છતાં રંગબેરંગી તરબૂચ ઉગાડ્યા છે.
પ્રવીણભાઈએ સાહસ કરીને જોખમભરી ખેતી હોવા છતાં રંગબેરંગી તરબૂચ ઉગાડ્યા છે.

મલ્ચિંગથી ભેજ જળવાઈ રહે છે
મલ્ચિંગને કારણે જમીનમાં ભેજ અને પોષકતત્ત્વો જરૂરિયાત પ્રમાણે જળવાઈ રહે છે તેમજ નિંદણનો પ્રશ્ન પણ ઓછો રહે છે. જ્યારે પ્લાસ્ટિકના ગ્રો કવર દ્વારા પાકનું અનેક રીતે રક્ષણ થતાં રોગ-જીવાતનો ઉપદ્રવ ઓછો રહે છે. ગ્રોકવર ભીની માટી સાથે ફળોનો સંપર્ક ટાળે છે. તેથી ફળોમાં થતી ઈજા અટકે છે. માખી સહિતની જીવાતો તથા અન્ય વાઇરસથી રક્ષણની સાથે ઝાકળ, ભેજ અને કમોસમી વરસાદ જેવા વાતાવરણની પ્રતિકૂળ અસરની સામે પાકને રક્ષણ મળે છે. રાજ્ય સરકાર દ્વારા ટ્રેક્ટર સાથે પાવરટીલર, ઓટોમેટિક હળ, પાંચિયા સહિતનાં સાધનો તેમજ ડ્રિપ ઈરિગેશન માટે માતબર સબસિડી મળી છે.

તરબૂચની ખેતીમાં પ્રવીણભાઈને પ્રથમ પ્રયાસે જ સફળતા મળી છે.
તરબૂચની ખેતીમાં પ્રવીણભાઈને પ્રથમ પ્રયાસે જ સફળતા મળી છે.

માર્કેટમાં વેચાણ કરવા જવું પડતું નથી
હાલના સમયમાં પરંપરાગત ખેતીમાં ખર્ચ વધવાને કારણે ખેડૂતોને નફો ઘણો ઓછો થાય છે, તેથી ખેતીની હાઈટેક પદ્ધતિઓ અપનાવવી જોઈએ. એને કારણે ખેતી નુકસાનને બદલે નફાકારક સાબિત થશે અને યુવા ખેડૂતોનો ખેતી પ્રત્યેનો મોહભંગ પણ અટકશે. આજ સુધી માર્કેટ યાર્ડ સુધી પાકને લઈ જવાની જરૂર જ પડી નથી, પણ સોશિયલ મીડિયા અને મિત્રો-પરિચિતોના ગ્રુપમાં સીધું જ વેચાણ થઈ જતું હોવાનું પ્રવીણભાઈએ કહ્યું હતું.

સોલર દ્વારા ખેતરમાં જ વીજળી મેળવવામાં આવી રહી છે.
સોલર દ્વારા ખેતરમાં જ વીજળી મેળવવામાં આવી રહી છે.

ખેતીથી શ્રમિકોને રોજગારી મળી
દક્ષિણ ગુજરાતના લોકોને રંગબેરંગી અને રસીલાં તાઈવાની તરબૂચના સ્વાદનું ઘેલું લાગ્યું છે, ત્યારે પ્રવીણભાઈ જણાવે છે, એક્ઝોટિક વોટરમેલન તરીકે ઓળખાતાં વિશાલા અને આરોહી તરબૂચ પાઈનેપલનો સ્વાદ પણ આપે છે. મને એ વાતનો પણ હર્ષ છે કે આજુબાજુનાં ત્રણ ગામના શ્રમિકોને રોજગારી મળી રહી છે, જેમને લેવા-મૂકવા માટે પણ ટેમ્પો-પિકઅપ વાનની દરરોજ નિ:શુલ્ક વ્યવસ્થા કરું છું. આમ, ઓછા સમયગાળામાં વધુ નફો આપતી મીઠા-મધુરા તરબૂચની ખેતી દક્ષિણ ગુજરાતના પ્રગતિશીલ ખેડૂતોને નવી ઓળખ આપી રહી છે. પ્રવીણભાઈ જેવા યુવા કિસાનો અથાગ મહેનત અને કોઠાસૂઝથી નફાકારક ખેતીને વધુ ઉચ્ચતા બક્ષી રહ્યા છે.

અન્ય સમાચારો પણ છે...