• Gujarati News
  • Dvb original
  • For 16 Years, He Risked His Life To Hang A Rope 20 Feet High On A Bridge, Using A Pad That Stops Bleeding From His Throat In Seconds.

એ ઉત્તરાયણે પતંગની દોરી વાગી ને..., VIDEO:16 વર્ષથી જીવના જોખમે બ્રિજ પર 20 ફૂટ ઊંચે તાર બાંધે, ગણતરીની સેકન્ડમાં જ ગળેથી વહેતું લોહી બંધ થાય એવું પેડ વાપરે

એક મહિનો પહેલાલેખક: કમલ પરમાર

'એ સમયે પતંગની દોરીથી બચવા સેફ્ટી રિંગ બનાવી, જેને હું મારી બાઈકમાં લગાવીને ફરતો હતો. જ્યારે હું બજારમાં નીકળતો ત્યારે લોકો બૂમો પાડતાં કે જો આ ગાંડો નીકળ્યો...ગાંડો નીકળ્યો... તો કેટલાક લોકો મારી પાછળ આવીને કહેતા કે આ ગાંડાને જુઓ, જાણે એને જ પતંગની દોરી વાગી જવાની છે. તો જ્યારે લોકોના રક્ષણ માટે મેં બ્રિજ પર તાર બાંધવાનું શરૂ કર્યું ત્યારે પણ લોકો મને કહેતા કે લોકોનું જે થવું હશે એ થશે, તને શું પડી છે?' આ શબ્દો છે અમદાવાદના શાહપુર વિસ્તારમાં રહેતા અને મિશન સેફ ઉત્તરાયણ ફાઉન્ડેશન ચલાવતા મનોજભાઈ ભાવસારના.

પતંગની દોરી ગળામાં વાગીને ઘાયલ થયા
2006નું વર્ષ હતું અને સમય હતો ઉત્તરાયણનો. એ સમયે મનોજભાઈ પોતાના કામથી અમદાવાદના બ્રિજ પરથી પસાર થઈ રહ્યા હતા ને અચાનક પતંગની દોરી તેમના ગળામાં આવી ગઈ અને તેઓ ઘાયલ થઈ ગયા. તેમની સાથે બનેલી એ ઘટના પછી તેમણે સતત મનોમંથન કર્યું કે જો તેમને સામાન્ય ઈજા થઈ છે છતાં પણ મુશ્કેલી પડી છે. તો જો કોઈ ગંભીર રીતે ઘવાય તો કેટલી મુશ્કેલી પડતી હશે...? એ પછી એન્જિનિયર મનોજભાઈએ પોતાના મનોમંથન થકી વ્હીકલની આગળ લગાવી શકાય એવી સેફ્ટી રિંગ બનાવી અને તેમના વ્હીકલમાં લગાવી. આ દરમિયાન જ્યારે મનોજભાઈ બજારમાં નીકળતા હતા ત્યારે કેટલાક લોકો તેમને ગાંડો નીકળ્યો... ગાંડો નીકળ્યો... તો કેટલાક લોકો તેમની પાછળ આવીને કહેતા કે આ ગાંડાને તો જુઓ... જાણે પતંગની દોરી તેને જ વાગી જવાની છે.

'લોકોની વાત પર ધ્યાન ન આપ્યું'
આ અરસામાં કુદરતનું કરવું ને એવું થયું કે શ્રેયશ બ્રિજ ઉપરથી પસાર થઈ રહેલા એક બેનનું દોરી વાગવાને કારણે ઘટનાસ્થળ પર જ મૃત્યું થયું હતું. આ દરમિયાન મનોજભાઈને ફરી વિચાર આવ્યો કે બ્રિજ પરથી પસાર થઈ રહેલા લોકોને દોરીથી કઈ રીતે બચાવી શકાય. એ સમયે ફરી તેમના મગજમાં એક વિચાર આવ્યો ને તેમણે અમદાવાદના બ્રિજ પર તાર બાંધવાની કામગીરી શરૂ કરી. જ્યારે મનોજભાઈએ આ કામગીરી શરૂ કરી ત્યારે પણ લોકો તેમની મજાક ઉડાવતા અને કહેતા કે લોકોના જીવની તને શું પડી છે? પણ મનોજભાઈએ લોકોની વાત પર ધ્યાન આપવાની જગ્યાએ આ કામગીરી શરૂ રાખીને આજે 16 વર્ષથી આ સેવાયજ્ઞ કરી રહ્યા છે.

પતંગની દોરીથી ઘાયલ થયેલી વ્યક્તિની પ્રાથમિક સારવાર કરી રહેલા મનોજભાઈ
પતંગની દોરીથી ઘાયલ થયેલી વ્યક્તિની પ્રાથમિક સારવાર કરી રહેલા મનોજભાઈ

એક મિનિટમાં જ બ્લડ બંધ થઈ જાય એવું પેડ વાપરે
મનોજભાઈ તાર બાંધવાની સાથે સાથે પતંગની દોરીથી ઘાયલ થયેલા લોકોની પણ મદદ કરી રહ્યા છે. આ દરમિયાન કેટલાક લોકો એટલા ગંભીર રીતે ઘાયલ થાય છે કે તેમનું બ્લડ રોકાવાનું નામ નથી લેતું, ત્યારે આવા લોકોનો જીવ બચાવવા માટે મનોજભાઈ છેલ્લાં 7 વર્ષથી હેમોસ્ટેટિક જેલ પેડનો ઉપયોગ કરે છે. એના ઉપયોગથી માત્ર એક જ મિનિટમાં લોહી બંધ થઈ જાય છે. અત્યારસુધીમાં તેમણે હેમોસ્ટેટિક જેલ પેડની મદદથી 160થી 170 લોકોનો જીવ બચાવ્યો છે. મહત્ત્વનું છે કે મનોજભાઈ જે હેમોસ્ટેટિક જેલ પેડનો ઉપયોગ કરે છે, એના એક પેડની કિંમત 2500 રૂપિયા છે અને એનો ઉપયોગ મોટી મોટી હોસ્પિટલમાં કરવામાં આવે છે, પરંતુ તેમની આ કામગીરી જોઈને એક દવાની કંપની તેમને હેમોસ્ટેટિક જેલ પેડ ફ્રીમાં પૂરાં પાડી રહી છે.

'...અને AMCએ મારી અરજીને મંજૂરી આપી દીધી'
મનોજભાઈ ભાવસારે દિવ્ય ભાસ્કર સાથેની વાતચીતમાં જણાવ્યું હતું કે પહેલીવાર જ્યારે તાર બાંધવાની કામગીરી કરવાનું નક્કી કર્યું ત્યારે AMCમાં મેં મંજૂરી માટે અરજી કરી હતી, જેને અધિકારીઓએ તાત્કાલિક મંજૂરી આપી હતી. એ પછી મને લાઈટ ખાતાની ગાડી પૂરી પાડવામાં આવી હતી. તો વચ્ચે વચ્ચે ફાયર વિભાગની ગાડી પણ અપાઈ હતી. જ્યારે છેલ્લાં 4 વર્ષથી બગીચા ખાતાની હાઈડ્રોલિક વેનની મદદથી આ કામગીરી કરી રહ્યો છું. એટલું જ નહીં, આ કામગીરી દરમિયાન મને કોઈ પણ ઈજા ન થાય એ માટે 108ની એક એમ્બ્યુલન્સ પણ સતત અમારી સાથે હોય છે. આ સાથે જ જ્યારે હું તાર બાંધવા જાઉં છું ત્યારે મારા હાથમાં ખાસ પ્રકારના મોજા અને માથે હેલ્મેટ હોય છે.

'માત્ર 15 દિવસમાં 3 લાખથી વધુનો ખર્ચ થાય'
તેમણે દિવ્ય ભાસ્કરને વધુમાં જણાવ્યું હતું કે ઉત્તરાયણના 15 દિવસ પહેલાંથી જ અમદાવાદમાં અલગ અલગ વિસ્તારમાં આવેલા 30 બ્રિજ ઉપર તાર બાંધવાની કામગીરી શરૂ કરું છું. આ કામગીરી દરમિયાન 1 હજાર કિલો કરતાં પણ વધુ તારની જરૂરિયાત પડે છે. એ માટે અંદાજે 3 લાખ કરતાં પણ વધુનો ખર્ચ થાય છે, જે હું મારી કમાણીમાંથી ખર્ચું છું. તો કેટલાક એવા પણ મિત્રો છે, જે મને દર વર્ષે આ કામગીરીમાં થતા ખર્ચમાં મદદ કરી રહ્યા છે. જોકે આ ખર્ચની સામે કોઈને જીવનદાન મળશે અને કોઈકના લાડકવાયાનું જીવન બચી જશે એ મારા માટે સૌથી મહત્ત્વની વાત છે.

ઘણીવાર સમડી જેવા પક્ષીઓ તેમના પર હુમલો પણ કરે છે.
ઘણીવાર સમડી જેવા પક્ષીઓ તેમના પર હુમલો પણ કરે છે.

'...અને સમડી ચાંચ મારવા આવી'
16 વર્ષની આ કામગીરી દરમિયાન થયેલા કેટલાક કડવા અનુભવોને વાગોળતાં મનોજભાઈ કહે છે, એકવાર જ્યારે તાર લગાવવા માટે હું બ્રિજની હાઈટ ઉપર ગયો, એ સમયે જ મારા ગળામાં પતંગની દોરી આવી ગઈ, પરંતુ ત્એયારે મારા હાથમાં જે મોજા હતા એનાથી એ દોરી તોડીને નીચે નાખી દીધી. એ દિવસે હું કોઈકની જિંદગી બચાવવા ગયો, પણ મારી જ જિંદગી જોખમમાં મુકાઈ હતી. આવા જ બીજા કિસ્સા વિશે કહું તો બ્રિજથી 20 ફૂટ હાઈટ પર જ્યારે તાર બાંધવાની કામગીરી કરતા હોઈએ ત્યારે સમડી અને કાગડાઓને એમ થતું હોય છે કે તેમના માળાને નુકસાન કરી રહ્યા છીએ, એટલે એ ચાંચ મારવા આવતાં હોય છે, પરંતુ એ સમયે આવીને તેમનો સામનો કરીને પણ આ કામગીરી કરીએ છીએ.

'તાર બાંધવાને કારણે હવે કેસોનું પ્રમાણ ઘટ્યું'
તેમણે દિવ્ય ભાસ્કરને જણાવ્યું હતું કે એક સમયે ઉત્તરાયણ દરમિયાન દોરીથી થતા અકસ્માતમાં ત્રણથી ચાર ડિઝિટમાં આંકડા આવતા હતા, જે હવે માત્ર સિંગલ ડિઝિટમાં આવી રહ્યા છે. એ મારા માટે ખૂબ જ ગર્વની વાત છે, સાથે સાથે દુઃખ એ વાતનું પણ છે કે હજી પણ લોકો પ્લાસ્ટિકની અને ચાઈનીઝ દોરીથી પતંગ ચગાવી રહ્યાં છે, જેને કારણે આજ વર્ષમાં અત્યારસુધીમાં 13થી વધુ લોકોને પતંગની દોરી વાગી છે, જેમાં 2થી 3 લોકોને પોતાનો જીવ ગુમાવવાનો વારો આવ્યો છે.

'બે હાથ જોડીને વિનંતી કરું છું'
મનોજભાઈએ લોકોને બે હાથ જોડીને અપીલ કરતાં જણાવ્યું હતું કે લોકો સારી રીતે ઉત્તરાયણની ઉજવણી કરી શકે એ માટે અમે જોખમ લઈને પણ નિઃસ્વાર્થ ભાવે આ કામગીરી કરીએ છીએ છતાં પણ જ્યારે તમે બહાર નીકળો ત્યારે ગળામાં મફલર પહેરી રાખો, આ સાથે જ એ વાતનું ખાસ ધ્યાન રાખો કે જો વ્હીકલ ઉપર બાળકને લઈને મુસાફરી કરતા હોવ તો એને આગળ બેસાડવાની જગ્યાએ પાછળ બેસાડવાનું રાખો અને ચાઈનીઝ દોરીનો ઉપયોગ કરવાનું ટાળો, જેથી કોઈનો જીવ જોખમમાં ન મુકાય.

(ગ્રાફિક્સઃ- સોએબ મન્સૂરી)

અન્ય સમાચારો પણ છે...