ભાસ્કર ઓપિનિયનરાહુલની યાત્રાનો વીડિયો વાઇરલ:ભારત જોડો યાત્રામાં વાગ્યું નેપાળી રાષ્ટ્રગીત, રાહુલ ગાંધી કંઈપણ કરે છે તો ઊલટું જ કેમ થાય છે?

રાહુલ ગાંધી જે પણ કરવા જાય છે એનાથી કંઈક ઊલટું થઈ જાય છે. હવે એ સમયની વાત છે કે નસીબ, એ કહી શકાય નહીં, પણ આમ જ થયું છે. ગુરુવારની જ ઘટના લઈ લો. તેમની ભારત જોડો યાત્રા મહારાષ્ટ્રના વાશિમમાં હતી. સ્ટેજ પર ભાષણ આપતાં પહેલાં તેમણે જાહેરાત કરી હતી - હવે રાષ્ટ્રગીત વાગશે, પરંતુ થયું એનાથી ઊલટું. નેપાળનું રાષ્ટ્રગીત વાગવા લાગ્યું. જોકે તેમણે પોતે તરત જ એને અટકાવી દીધું.

પ્રશ્ન એ થાય છે કે આવું માત્ર તેમની સાથે જ કેમ થાય છે? શું તેમના પક્ષના નેતાઓ કે કાર્યકરો તેમને ગંભીરતાથી લેતા નથી? અથવા તેઓ પોતે સાવચેતી રાખતા નથી. કંઈપણ કરતાં પહેલાં એને શા માટે ચકાસતા નથી? BJPની સોશિયલ મીડિયા ટીમ હંમેશાં તેમને ફોલો કરતી રહે છે. નાનકડી ભૂલ પણ વાઇરલ થવા લાગે છે, એવી જ રીતે નેપાળી રાષ્ટ્રગીતનો આ વીડિયો વાઇરલ થઈ રહ્યો છે.

બીજી તરફ રાજસ્થાનમાં કોંગ્રેસનું રાજકીય સંકટ અટકવાનું નામ નથી લતું. અજય માકનના રાજીનામા બાદ પાઇલટ જૂથના ધારાસભ્યો અશાંત બન્યા છે. આ ભાઈઓ સંમત નથી થઈ રહ્યા. તેઓ કહી રહ્યા છે કે રાહુલ ગાંધીની યાત્રા રાજસ્થાન પહોંચે એ પહેલા નેતાના પદનો મુદ્દો જે પેન્ડિંગ છે એનો ઉકેલ લાવવો જોઈએ. તેમનો અર્થ એ છે કે પછી બે નિરીક્ષકો રાજસ્થાનમાં આવીને એક પછી એક ધારાસભ્યો પાસેથી અભિપ્રાય લે કે તેઓ કોને મુખ્યમંત્રી તરીકે જોવા માગે છે! પાઇલટને કે અશોક ગેહલોતને?

અત્યારે ગેહલોત કેમ્પે મૌન જાળવી રાખ્યું છે, પરંતુ તેઓ મૌન સાધીને બધું જોઈ રહ્યા છે. નિરીક્ષક આવે કે અન્ય કોઈ, ગેહલોત જાણે છે કે તેમની સાથે કેવી રીતે વ્યવહાર કરવો. સવાલ એ છે કે સચિન પાઇલટ પોતે શા માટે પોતાના ધારાસભ્યોને આવાં નિવેદનો કરતાં રોકતા નથી? અને જો તેઓ રોકતા નથી તો આમાંથી કોની રાજકીય પરિપક્વતા દેખાય છે?

પાર્ટીલાઇન કહે છે કે સામે સમસ્યા ઊભી થઈ છે, હાઈકમાન્ડે જે કરવું હોય એ કરે. કોઈ અન્યાય થયો હોય તો વાત કરો. જો તમે બિનજરૂરી રીતે ઢોલ વગાડતા રહેશો તો શું થશે? એમ પણ, કોંગ્રેસમાં આ બધું ચાલે છે અને કોંગ્રેસીઓ હવે સામાન્ય માણસની સમસ્યા માટે રસ્તા પર આવવાને બદલે જૂથબંધીનું રાજકારણ કરવા રસ્તા પર આવવાનું પસંદ કરે છે. આ એવો સમય છે, જ્યારે રાજસ્થાન ભાજપ પહેલીવાર વેરવિખેર થતી જોવા મળી રહી છે.