માર્કેટ વ્યૂ:આ સપ્તાહે શેરબજારમાં બેતરફી અફરાતફરી જોવા મળી શકે છે, દરેક ઉછાળે સાવચેતી જરૂરી બની રહેશે

નાણામંત્રી નિર્મલા સીતારમણના બજેટ અને રિઝર્વ બેન્કના ચાવીરૂપ દર તેમજ સકારાત્મક વૈશ્વિક સંકેતો જાળવી રાખવાના નિર્ણયને પગલે ભારતીય શેરબજારમાં તેજી જોવા મળી હતી, પરંતુ અમેરિકામાં યુ.એસ. ફેડરલ રિઝર્વ દ્વારા ફુગાવા-મોંઘવારીના 40 વર્ષની ઊંચાઈએ પહોંચી ગયેલા આંકને લઈ માર્ચમાં વ્યાજદરમાં વધારો કરવાનો સંકેત અને ક્રૂડ ઓઈલના સતત વધતા ભાવ સાથે સપ્તાહના અંતે મહારથીઓ, ફંડો, હાઈ નેટવર્થ ઈન્વેસ્ટરો દ્વારા દરેક ઉછાળે નફારૂપી વેચવાલી કરતાં ભારતીય શેરબજારમાં નોંધપાત્ર ઘટાડો જોવા મળ્યો હતો.

ટેક્નિકલ ચાર્ટ મુજબ આ પ્રકારની મૂવમેન્ટ જોવા મળી શકે છે

બજારની ભાવી દિશા
ભવિષ્યના સંભવિત ઘટનાક્રમ ચાલુ વર્ષે ક્રૂડ ઓઇલની કિંમત 93 ડોલર પ્રતિ બેરલને પાર થતાં ઉદ્યોગજગત માટે નેગેટિવ ફેક્ટર તેમજ રશિયા-યુક્રેનના તણાવ સાથે દુનિયાના વિકસિત રાષ્ટ્રોમાં મોંઘવારી વધતાં મધ્યસ્થ બેન્કો વ્યાજદર વધારી રહી છે. ઉપરાંત સૌની નજર અમેરિકાની ફેડ રિઝર્વ બેન્ક કેટલા પ્રમાણમાં વ્યાજદર વધારશે તેના પર છે એની ઊંડી અને વ્યાપક અસર ઊભરતા દેશોનાં બજાર પર થશે, જેને ધ્યાનમાં રાખીને વિદેશી સંસ્થાઓ રોકાણની રણનીતિ અપનાવી રહ્યા છે, ત્યારે ખાસ કરીને સ્થાનિક સંસ્થાકીય રોકાણકારો, મ્યુ. ફંડો અને રિટેલ રોકાણકારો તરફથી શેરબજારને મજબૂત સપોર્ટ મળી રહ્યો છે.

સરકાર માટે મોંઘવારીને અંકુશમાં લેવાનું અનિવાર્ય બની ગયું છે, ત્યારે રિઝર્વ બેંક ઓફ ઈન્ડિયાએ પણ વ્યાજદરમાં વધારો કરવાનું મોકૂફ રાખ્યું છે, રાજ્યોની ચૂંટણીઓ સુધી બજારનું સેન્ટિમેન્ટ ખરડાય નહીં અને ભારતમાં એલઆઈસીના મેગા આઈપીઓ સુધી પ્રત્યક્ષ કે પરોક્ષ રીતે તેજીના ખેલાડીઓ દ્વારા તેજી જાળવી રાખવા પ્રયાસો થઇ રહ્યા છે. આગામી દિવસોમાં વૈશ્વિક બજારોની સાથે ભારતીય શેરબજારમાં બેતરફી અફરાતફરી જોવા મળી શકે છે, તેથી દરેક ઉછાળે સાવચેતી જરૂરી બની રહેશે.

લેખક નિખિલ ભટ્ટ - સેબી રજિસ્ટર્ડ રિસર્ચ એનાલિસ્ટ અને ઇન્વેસ્ટમેન્ટ પોઈન્ટના પ્રોપરાઇટર છે.

ડિસ્ક્લેમર : આ માત્ર અભ્યાસલક્ષી ટેક્નિકલ ચાર્ટ મુજબ આર્ટિકલ છે. દિવ્યભાસ્કર કોઈ સ્ટોક ભલામણ કરતું નથી.