• Gujarati News
  • Dvb original
  • Initiative Of The Youth Of Manpura Village Of Banaskantha, Planting Medicinal Seedlings In Front Of Every House, Diverting 70% Of The Farmers Towards Natural Farming.

આજની પોઝિટિવ સ્ટોરી:બનાસકાંઠાના માનપુરા ગામના યુવાનોની પહેલ, દરેક ઘર આગળ ઔષધિય રોપા લગાવ્યા, 70% ખેડૂતોને પ્રાકૃતિક ખેતી તરફ વાળ્યા

બનાસકાંઠા6 મહિનો પહેલાલેખક:  મુકેશ ઠાકોર
વડીલો અને યુવકોએ ગામને સ્વસ્થ બનાવવા પ્રયાસો હાથ ધર્યા છે. - Divya Bhaskar
વડીલો અને યુવકોએ ગામને સ્વસ્થ બનાવવા પ્રયાસો હાથ ધર્યા છે.
  • એક ખેડૂતથી થયેલી પ્રાકૃતિક ખેતીની સફરની શરૂઆત 35 પરિવાર સુધી પહોંચી

ખર્ચાળ અને રોગને નિમંત્રણ આપતી રાસાયણિક ખેતી છોડીને ખેડૂતો પ્રાકૃતિક ખેતી તરફ આગળ વધી રહ્યા છે. વર્તમાન સમયમાં ઓર્ગેનિક રીતે પકાવેલી જણસોની માગ પણ વધુ રહે છે. ત્યારે સમયને પારખી જઈને બનાસકાંઠાના માનપુરા ગામમાં પ્રાકૃતિક ખેતીના સામૂહિક પ્રયાસ કરવામાં આવી રહ્યા છે. ગામમાં લગભગ એક દાયકા કરતાં વધુ સમય પહેલાં પ્રાકૃતિક ખેતી એક વ્યક્તિથી શરૂ થઈ હતી. એ જોઈને એક બાદ એક ખેડૂતો જોડાતાં અત્યારે લગભગ 35 પરિવાર પ્રાકૃતિક ખેતી તરફ વળ્યા છે. બીજી તરફ યુવાનોએ પણ પહેલ કરી છે. ગામમાં દરેક ઘરની આગળ ઓષધિય રોપા વાવ્યા છે, જેથી ગામને રોગમુક્ત રાખીને તંદુરસ્ત કરવાના પ્રયાસ પણ કરવામાં આવી રહ્યા છે, સાથે જ ગામને 2025 સુધીમાં સંપૂર્ણ ઓર્ગેનિક ગામ બનાવવાની દિશામાં પ્રયાસો કરવામાં આવી રહ્યા છે.

ગાય આધારિત ખેતી કરવામાં આવે છે.
ગાય આધારિત ખેતી કરવામાં આવે છે.

ગાય આધારિત ખેતી કરવામાં આવે છે
માનપુરા ગામે પ્રાકૃતિક ખેતીને લઈને ખેડૂતોમાં જાગૃતિ આવી છે. દસ વર્ષ પહેલાં ગામના યુવાન હરેશભાઈ ચૌધરીએ પ્રાકૃતિક ખેતીની શરૂઆત કરી હતી.ત્યાર બાદ આ ગામના ખેડૂતો પણ હવે પ્રાકૃતિક ખેતી તરફ વળ્યા છે. હરેશભાઈ ચૌધરીનું કહેવું છે કે, મનુષ્યને જે પ્રમાણે હવા, પાણી તેમજ ખોરાકની મહત્ત્વની જરૂરિયાત જીવનમાં હોય છે એ રીતે સારા ખોરાક, સારી હવા મળી રહે એ માટે પણ આ સમગ્ર પ્રાકૃતિક ખેતી એક મહત્ત્વનો ભાગ ભજવે છે. પ્રાકૃતિક ખેતી દેશી ગાયના છાણ તેમજ ગૌમૂત્ર થકી કરવામાં આવે છે. ગાય માતાને પોતાના ખેતરમાં રાખી તેનાં છાણ, ગૌમૂત્ર, છાસ સહિત લીમડાનાં પાનનો ઉપયોગ કરી અલગ પ્રકારનું ખાતર બનાવી એને જમીનમાં નાખી પાકનું વાવેતર કરી રહ્યા છીએ.

પ્રાકૃતિક ખેતીથી ગામડાં ફરી બેઠાં થશે
રાસાયણિક ખાતર તેમજ દવાઓ નાખ્યા વગર પાક લઈ શકાય છે, જેનાથી આવનારા ભવિષ્યમાં બાળકો માટે પણ એક મહત્ત્વની બાબત ગણી શકાય એ રીતની આ પ્રાકૃતિક ખેતી થકી કામ થાય છે. એ પ્રમાણે રાસાયણિક ખાતર તેમજ કેમિકલ દવાઓ દ્વારા ખેતી કરવામાં આવતી હોય છે. ત્યારે આ ખેતીને લઈને અનેક રોગોનો લોકો ભોગ બન્યા હોવાના કિસ્સા પણ સામે આવ્યા હોવાના અહેવાલ છે. ત્યારે પ્રાકૃતિક ખેતીને લઈને હાલ જ્યારે દેશના વડાપ્રધાન તેમજ રાજ્યની સરકારો પણ પ્રયત્નો કરી રહી છે. ત્યારે ખેડૂતોએ પણ આ પ્રાકૃતિક ખેતી એક દેશી ગાય આધારિત એટલે કે દરેક ઘર આગળ ખેતરમાં દેશી ગાય અને તે થકી જો ખેતી કરવામાં આવે તો ભારત વર્ષનાં જે ગામડાં છે, જે જૂની પરંપરા મુજબનાં જે ગામડાં હતાં એ ફરીથી એકવાર એ જ ગામડાં જોવા મળી શકે એવું આ પ્રાકૃતિક ખેતી તરફથી લાગી રહ્યું છે.

જાતે જ ખાતર સહિતની વસ્તુઓ તૈયાર કરવામાં આવે છે.
જાતે જ ખાતર સહિતની વસ્તુઓ તૈયાર કરવામાં આવે છે.

વિદેશમાં માગ વધી
પ્રાકૃતિક ખેતીથી તૈયાર કરવામાં આવતા પાકોની માગ દિવસે દિવસે વધી રહી છે. ઘઉં, વરિયાળી, કઠોળના પાકો હળદર જેવા પાકો હરેશભાઈએ પ્રાકૃતિક ખેતીથી તૈયાર કર્યા હતા, જેના બજારમાં ઊંચા ભાવે વેચી સારી કમાણી પણ ખેડૂત તરીકે કરી રહ્યા છે. લોકો હવે પ્રાકૃતિક ખેતીથી તૈયાર થતા પાકો લેવા માટે સામેથી ફોન કરતા હોય છે. કુદરતે આપેલી અનેક અમૂલ્ય ભેટો પૈકી ઔષધિઓ, વનસ્પતિ, હવા, પાણીનો માણસ જો યોગ્ય રીતે ઉપયોગ કરતો થાય તો મનુષ્યજીવનને ખૂબ જ ફાયદો થાય એવું પ્રાકૃતિક ખેતી પરથી લાગી રહ્યું હોવાનું ખેડૂતે જણાવ્યું હતું.

પ્રાકૃતિક ખેતી તરફ ગામના ખેડૂતો વળ્યા છે.
પ્રાકૃતિક ખેતી તરફ ગામના ખેડૂતો વળ્યા છે.

સોશિયલ મીડિયાનો ઉપયોગ
પ્રાકૃતિક ખેતી કરનાર હરેશભાઈ ચૌધરી જણાવ્યું હતું કે ઓર્ગેનિક ઉત્પાદનોમાં વેલ્યુ એડિશન, પેકેજિંગ કરીને સોશિયલ મીડિયાથી પ્રચાર કર્યો હતો. આજે મને અલગ અલગ જિલ્લાઓમાંથી સરળતાથી વેચાણનું માર્કેટ મળ્યું છે. આજે ખેતરમાંથી માલનું વેચાણ થઈ જાય છે. મારા પાકના ભાવ હું જ નક્કી કરું છું. આ વર્ષે મેં હળદર પકાવી હતી. હળદરનો પાઉડર થશે, જે ડિમાન્ડ પ્રમાણે પહોંચાડવામાં આવશે. અગાઉ મેં વિચારેલું કે હું એકલો પ્રાકૃતિક ખેતી કરીશ તો આનું રિજલ્ટ નહિ મળે, મારા ખેતરના પાડોશી પણ પ્રાકૃતિક ખેતી કરતો હોવો જોઈએ, કારણ કે એનું ઝેર મારા ખેતરમાં ના આવે એ માટે મેં ગામની અંદર પણ પ્રયાસ કર્યો. ગામ સમિતિ સાથે મળી એ પ્રયાસ કરવાથી પાંચ વર્ષની અંદર ગામના એકપણ દેશી ગાય નહોતી. ત્યારે દેશી ગાય આધારતી ખેતી કરતા આજે 20થી 35 પરિવારો એના આધારિત પ્રાકૃતિક ખેતી કરી રહ્યા છે. એ પ્રાકૃતિક ખેતી કરવાને કારણે આવનારા સમયની અંદર અમારા ગામનું વાતાવરણ પણ ચોક્કસ બદલાઈ જશે.

ગાયના છાણમાંથી ખાતર બનાવવામાં આવે છે.
ગાયના છાણમાંથી ખાતર બનાવવામાં આવે છે.

દર મહિને મીટિંગ મળે છે
સ્થાનિક અગ્રણી અને પ્રાકૃતિક ખેતી કરનાર ધનરાજભાઈ ચૌધરીએ જણાવ્યું હતું કે પ્રાકૃતિક ખેતી તરફ રાજ્યપાલ પણ ખૂબ પ્રોત્સાહન આપે છે, ત્યારે અમે ગામમાં દર મહિને મીટિંગ કરીએ છીએ. આજુબાજુનાં ગામમાં પ્રાકૃતિક ખેતી તરફ લોકો વળે એ માટે પણ પ્રયાસ કરીએ છીએ. છેલ્લાં પાંચ વર્ષથી ગામમાં સિત્તેર ટકા લોકો પ્રાકૃતિક ખેતી તરફ લોકો વળ્યાં છીએ. દરેક જણને દેશી ગાય અપાવી અને ગાયમાંથી જ જીવા અમૃત વગેરે જાતે બનાવતા શિખવાડ્યું, આખા ગામમાં આ પ્રકારે ખેતી કરવી છે. ગામમાં 50 ટકા જેટલું રાસાયણિક ખાતર લાવવાનું ઓછું કરી દેવાયું છે, જેના કારણે રોગ પણ ગામમાં આવનારા સમયમાં ઓછા મળશે.

ગામની પડતર જમીન પર પણ વૃક્ષો રોપવામાં આવી રહ્યા છે.
ગામની પડતર જમીન પર પણ વૃક્ષો રોપવામાં આવી રહ્યા છે.

યુવાનોની પહેલ
માનપુરા ગામમાં ત્રણ વર્ષ અગાઉ દરેક સમાજના યુવાનો દ્વારા એક નવી પહેલ શરૂ કરાઈ હતી. દરેક ઘર આગળ તુલસી, અરડૂસી, અજમો જેવા રોપા વાવવામાં આવ્યા હતા. કોરોના સમયે આ ગામના લોકોએ પોતાના ઘર આગળ વાવેલી ઔષધિઓથી ઉકાળા બનાવી રક્ષણ મેળવ્યું હતું તેમજ ઘર આગળ ફળનાં વૃક્ષો પણ લગાવવામાં આવ્યાં છે. આવનારા સમયમાં બાળકો કુપોષણથી મુક્ત થાય એ માટે ઘર આગળ વાવેલાં વૃક્ષોનાં ફળ માતા-બાળકો ખાય શકે એ માટે આ ફળાઉ વૃક્ષો વાવવામાં આવ્યાં હોવાનું યુવાનોએ જણાવ્યું હતું.

ગામમાં વધુમાં વધુ વૃક્ષોના ઉછેર માટે કાર્ય કરવામાં આવી રહ્યું છે.
ગામમાં વધુમાં વધુ વૃક્ષોના ઉછેર માટે કાર્ય કરવામાં આવી રહ્યું છે.

મીઠાઈના વેચાણથી નફો રળી વૃક્ષોની માવજત કરી
માનપુરા ગામે યુવાનો દ્વારા દિવાળીના સમયે ફાળો ઊઘરાવી મીઠાઈ બનાવી હતી. આ મીઠાઈનું સમગ્ર ગામ સહિત અન્ય જગ્યાએ પણ વેચાણ કર્યું હતું. મીઠાઈ વેચાણના નફાથી ગામના સ્મશાનમાં ટ્યૂબવેલ બનાવી પાણીની વ્યવસ્થા કરી હતી. જેથી ત્યાં 3 વર્ષ પહેલાં વૃક્ષારોપણ કરવામાં આવ્યું હતું. દર વર્ષે થતી આ પ્રવૃત્તિથી સ્મશાનગૃહમાં 400થી વધુ તેમજ 60 જાતિનાં વૃક્ષો વાવવામાં આવ્યાં છે, જેમાં ફળાઉ વૃક્ષો પણ વાવવામાં આવ્યાં છે. યુવાનો દ્વારા જાત મહેનતથી આ કાર્ય કરવામાં આવી રહ્યું છે. ગામના યુવાનોનું માનવું છે કે ગામને શુદ્ધ હવા પૂરી પાડવી હોય તો ગામની આજુબાજુ વૃક્ષારોપણ કરવું ખૂબ જ જરૂરી છે તેમજ જે સ્મશાનમાં જતા લોકો ડરતા હોય છે એને અમે એક મિની જંગલ બનાવીને પર્યાવરણના જતનનું કામ પણ કરી રહ્યા છીએ.

અન્ય સમાચારો પણ છે...