• Gujarati News
  • Dvb original
  • If A Child Has Diabetes, In How Many Years Will He Become Blind? How Can You Save Your Child? Dr. Tiwen Marwah Explained Step By Step

ચિલ્ડ્રન્સ ડે EXCLUSIVE:ગુજરાતી બાળકોમાં ટાઈપ-2 ડાયાબિટીસનો પગપેસારો, તમારા સંતાનને આનાથી કેમ બચાવવું? ડૉ. તિવેન મરવાહનું સ્ટેપ બાય સ્ટેપ ગાઈડન્સ

16 દિવસ પહેલા

ગુજરાતના બાળકોમાં ટાઈપ-2 ડાયાબિટીસે પગ પગપેસારો કરી દીધો છે. એટલે કે, 40-50 વર્ષની વ્યક્તિને જે ડાયાબિટીસ થાય છે એ જ ડાયાબિટીસ આજે ગુજરાતના બાળકોને પણ થવા લાગ્યો છે. આ શૉકિંગ વાત કરી છે જાણીતા ડાયાબિટોલૉજિસ્ટ અને એન્ડોક્રાઈનોલૉજિસ્ટ ડૉ. તિવેન મરવાહે. વર્લ્ડ ડાયાબિટીસ ડે નિમિત્તે દિવ્ય ભાસ્કરે ડૉ. તિવેન મરવાહનો એક્સક્લૂઝિવ ઈન્ટરવ્યૂ કર્યો. આ એક્સપ્લેનર વીડિયોમાં ડૉ. મરવાહે બાળકો અને ડાયાબિટીસ અંગેની વાતને સ્ટેપ બાય સ્ટેપ સમજાવી.

બાળકો અને ડાયાબિટીસ
ડાયાબિટીસના બે પ્રકાર છે, એક ટાઈપ-1 અને બીજો ટાઈપ-2. ટાઈપ-1 ડાયાબિટીસ બાળકોને થતો ડાયાબિટીસ છે જ્યારે ટાઈપ-2 ડાયાબિટીસ મોટી ઉંમરના લોકોને થતો ડાયાબિટીસ છે. બાળકોને જે ટાઈપ-1 ડાયાબિટીસ થાય છે તેમાં શરીરમાં ઈન્સ્યૂલીન બનવાનું સાવ બંધ થઈ જાય છે.

ગુજરાતમાં કેટલા બાળકોને ડાયાબિટીસ?
ડૉ. તિવેન મરવાહ કહે છે કે, મેડિકલ સાયન્સ મુજબ ડાયાબિટીસના દર્દીઓમાં બાળકોનું પ્રમાણ 1થી 1.5 ટકા છે. સીધી રીતે સમજીએ તો ગુજરાતમાં ડાયાબિટીસના કુલ દર્દીઓની સંખ્યા 50થી 60 લાખ છે, એ હિસાબે બાળ દર્દીઓની સંખ્યા અંદાજે 50થી 60 હજાર આસપાસ હોય શકે છે.

બાળકોને થતો ડાયાબિટીસ મટી શકે?
બાળકોને થતો ડાયાબિટીસ ખુબ જ ખતરનાક છે. આ ડાયાબિટીસમાં દર્દીના શરીરમાં ઈન્સ્યૂલીન બિલકૂલ બનતું નથી. આ એક પ્રકારે પેનક્રિયાઝ એક્સિડેન્ટ જ છે. આ ડાયાબિટીસને સંપૂર્ણ પણે મટાડી શકાતો નથી.

ઈન્સ્યૂલીન બનતું કેમ બંધ થઈ જાય?
બાળકોમાં ઈન્સ્યૂલીન બનવાનું બંધ થવાના અનેક કારણ છે. વાઇરલ ઈન્ફેક્શન કે ઈમ્યૂન સિસ્ટમના ડિસઓર્ડર થવાથી આવું થઈ શકે છે. આ સ્થિતિમાં પેનક્રિયાઝના બિટા સેલ છે કે જ્યાંથી ઈન્સ્યૂલીન બને છે તે કામ કરતાં બંધ થઈ જાય છે. જેને કારણે બાળકોમાં સુગર લેવલ, એસિટોન ખુબ જ વધી જાય છે. આ સ્થિતિમાં સમયસર સારવાર ના મળે તો બાળક કોમામાં જતું રહે છે.

બાળકોને ડાયાબિટીસ થવાનું કારણ?
ડૉ. મરવાહના મતે આનું મુખ્ય કારણ લાઈફ સ્ટાઈલ છે. આ જ કારણે ઓબેસિટી આવે છે અને તે અનેક રોગને નોતરે છે. વજન વધારે હોવાના કારણે જ આજે બાળકોમાં પણ ટાઈપ-2 ડાયાબિટીસ જોવા મળી રહ્યો છે.

બાળકોને થતો ડાયાબિટીસ માનવજન્ય
ખરેખર આ માનવજન્ય ડાયાબિટીસ જ છે. આના માટે સૌથી મહત્ત્વનું પરિબળ લાઈફ સ્ટાઈલ જ છે. ગમે તે ખાવું, જંક ફૂડ, ફાસ્ટ ફૂડ, આઈસ્ક્રીમ, અનિયમિત ઊંધ આ બધા જ કારણોથી બાળકો પર ડાયાબિટીસનું જોખમ વધી રહ્યું છે.

બાળકોમાં ટાઈપ-2 ડાયાબિટીસ ચિંતાજનક
મોટી ઉંમરના લોકોને જે ડાયાબિટીસ થાય તે આજે નાના બાળકોને થઈ રહ્યો છે. આ વાત જેટલી આઘાતજનક છે એટલી જ સાચી છે. જે ડાયાબિટીસ 40-50 વર્ષની ઉંમરે જોવા મળે છે એ ડાયાબિટીસ 15 વર્ષની ઉંમરે જોવા મળે છે. આનાથી ચિંતાજનક વાત બીજી કઈ હોય શકે?

જો 15 વર્ષે ટાઈપ-2 ડાયાબિટીસ થાય તો?
આ કલ્પના પણ ખુબ જ ડરામણી છે. જો 15 વર્ષની ઉંમરે ટાઈપ-2 ડાયાબિટીસ થયો અને 20 વર્ષે કોમ્પ્લીકેશન થવાનું શરૂ થયું તો 35 વર્ષની ઉંમર સુધીમાં આંખે અંધાપો આવી શકે છે. હૃદય અને કિડની કામ કરતાં બંધ થઈ શકે છે. આ ઉંમરમાં જ ડાયાલિસીસ આવે અને હાર્ટ એટેક આવે તો જીવન કેવું હોય તેની કલ્પના કરી શકાય છે.

ડાયાબિટીસથી બાળકો કેમ બચી શકે?
ડૉ. મરવાહના જણાવ્યા મુજબ બધો જ દારોમદાર વાલીઓ પર છે. જંક ફૂડ અને ફાસ્ટ ફૂડથી બાળકોને દૂર રાખવા જોઈએ. નિયમિત એક્સર્સાઈઝ કરાવવી જોઈએ અને નિયમિત રૂટીન જાળવવું જોઈએ.

ટાઈપ-1 ડાયાબિટીસના દર્દી લાંબુ જીવી શકે?
ટાઈપ-1 ડાયાબિટીસ એટલે જીવનનો અંત નથી. આ દર્દીઓ પણ નોર્મલ જિંદગી જીવી શકે છે. આજે ટાઈપ-1 ડાયાબિટીસના એવા હજારો દર્દીઓ છે જે અનેક ક્ષેત્રોમાં આગળ આવ્યા છે. કોઈ નોબલ પ્રાઈઝ વિનર છે, તો કોઈ ફૂટબોલ વર્લ્ડકપમાં રમે છે, અને કોઈએ મોટા મોટા માઉન્ટ પણ સર કર્યા છે.

એક સમયે બાળ દર્દી 6 મહિના જ જીવતાં
આ વાત આજથી બરાબર સો વર્ષ પહેલાની છે. 1921માં ઈન્સ્યૂલીનની શોધ થઈ. આ પહેલાં જે બાળકોને ડાયાબિટીસ થતો હતો તેનું આયુષ્ય સાવ ટૂંકું હતું. નિદાન થયાના 6 મહિનામાં જ આવા બાળકોનાં મોત થતાં હતાં. જો કે ઈન્સ્યૂલીનની શોધ થયા બાદ આજે બાળકો વર્ષો સુધી નોર્મલ જિંદગી જીવી શકે છે.

બાળકોને બચાવવાની સંજીવની કઈ?
ડાયાબિટીસના બાળકોને બચવવા માટે ઈન્સ્યૂલીન સિવાય કોઈ વિકલ્પ નથી. ટાઈપ-1 ડાયાબિટીસના દર્દીઓ માટે ઈન્સ્યૂલીન એ જ સંજીવની છે.

કરિઅરનો એ કેસ જે ક્યોર થઈ ગયો
આ વાત લગભગ 15-20 વર્ષ પહેલાંની છે. શ્રીમંત પરિવારના બાળકે 9 વર્ષની ઉંમરે સુગર લેવલ ખુબ જ વધી ગયું, એસિટોન વધી ગયું. આ બાળક બેભાન થઈ જતાં તેને તાત્કાલિક હૉસ્પિટલમાં દાખલ કરવો પડ્યો. આ સમયે બાળકનું સુગર લેવલ 500થી 700 હતું અને સાવ બેભાન અવસ્થામાં હતો. જો કે, સારવાર શરૂ થતાં જ ધીમે ધીમે તેની સ્થિતિ સુધરી. ત્યારબાદ તેને ઈન્સ્યૂલીન ચાલુ રાખ્યું. આ દરમિયાન તેમણે મુંબઈના નામાંકિત એન્ડોક્રાઈનોલૉજિસ્ટને પણ બતાવ્યું. જો કે એમણે પણ એ જ સલાહ આપી અને દિવસમાં ત્રણ-ચાર વખત ઈન્સ્યૂલીન લેવાનું ચાલું રાખ્યું. ધીમેધીમે બાળક અને પરિવારે હતાશા દૂર કરી. ભણવામાં હોશિયાર હોવાને કારણે તે ચાર્ટર્ડ એકાઉન્ટ બન્યો. ત્યારબાદ તેણે IIMમાંથી MBA કર્યું અને વિદેશની કંપનીમાં જોડાઈ ગયો. આ જે આ યુવક મલ્ટી નેશનલ કંપનીનો CEO છે. આનું એકમાત્ર કારણ યોગ્ય માર્ગદર્શન મળવું અને તેનું પાલન કરવાનું છે.

વાલીઓએ બાળકો માટે શું કરવું જોઈએ?
વાલીઓએ શરૂઆતથી જ બાળકોની જીવનશૈલી પ્રત્યે વિચારવું જોઈએ. બાળકો જંક ફૂડ, ફાસ્ટ ફૂડથી દૂર રહે, નિયમિત એક્સર્સાઈઝ કરે એ અંગે પ્રોત્સાહન આપવું જોઈએ. બાળકોની પહેલાં વાલીઓએ જ જંક ફૂડ, ફાસ્ટ ફૂડ, આઈસ્ક્રીમ, વધુ પડતાં ગળ્યા પદાર્થોથી દૂર રહેવું જોઈએ. જો માતા-પિતા આ પ્રકારે સજાગ રહેશે અને તેનું પાલન કરશે તો જ બાળકો તે કરવા પ્રેરાશે. ડાયાબિટીસના દર્દી હોય એવા બાળકોના વાલીઓની જ નહીં દરેક લોકોની આ ફરજ છે.