ભાસ્કર ઇન્ટરવ્યૂચૂંટણી જીતતાંની સાથે જ મસ્જિદોમાંથી લાઉડસ્પીકર હટાવીશું:અલ્લાહને બહેરા કહેનારા બીજેપી નેતા ઇશ્વરપ્પાએ કહ્યું- જે મંદિરો પર મસ્જિદો બની છે તેને તોડી પડાશે

કેએસ ઇશ્વરપ્પા. ઉંમર 75 વર્ષ. કર્ણાટકના ભાજપના લીડર જેને કટ્ટર હિંદુવાદી કહેવામાં આવે છે. 13મી માર્ચે એક સભામાં કહ્યું- 'શું અલ્લાહ બહેરા છે, જેને બોલાવવા માટે લાઉડસ્પીકર પર બૂમો પાડવી પડે છે. અઝાનના અવાજથી મને માથાનો દુખાવો થાય છે.

ઇશ્વરપ્પા રાજ્યમાં રથયાત્રા પર છે અને કર્ણાટકમાં થોડા મહિના પછી ચૂંટણી થવાની છે. તેઓ રથયાત્રામાં સતત મુસ્લિમો પર બોલતા રહે છે. આ મુદ્દાઓ પર દૈનિક ભાસ્કર સાથે વાત કરતા ઈશ્વરપ્પાએ કહ્યું- 'જો ચૂંટણી પછી અમારી સરકાર સત્તામાં આવશે તો તરત જ તમામ મસ્જિદોમાંથી લાઉડસ્પીકર હટાવીશું. જેના કારણે વિદ્યાર્થીઓથી લઈને દર્દીઓ સુધી સૌ કોઈ પરેશાન છે. કર્ણાટકમાં પરીક્ષાઓ ચાલી રહી છે અને લાઉડસ્પીકરના અવાજથી વિદ્યાર્થીઓ પરેશાન થઈ રહ્યા છે.

અન્ય એક પ્રશ્નના જવાબમાં ઇશ્વરપ્પાએ એમ પણ કહ્યું કે ટૂંક સમયમાં જ ભગવો દેશનો રાષ્ટ્રધ્વજ હશે. આ તમામ મુદ્દાઓ પર દૈનિક ભાસ્કર સાથે ઈશ્વરપ્પાની વાતચીત…

પ્રશ્ન: તમે કહ્યું હતું કે 'અલ્લાહ બહેરા છે, તેને બોલાવવા માટે લાઉડસ્પીકર પર બૂમો પાડવી પડે છે'. મુસ્લિમો કહે છે કે અઝાન લોકોને પ્રાર્થના માટે બોલાવવા માટે છે. તમે આટલું જાણતા જ હશો?
ઈશ્વરપ્પા: અમારી વિજય સંકલ્પ યાત્રા ચાલી રહી છે. તમામ નેતાઓ રાજ્યમાં ફરી રહ્યા છે. હું રથયાત્રાનું નેતૃત્વ પણ કરી રહ્યો છું. હું સોમવારે મેંગલુરુમાં હતો. અઝાન શરૂ થતાં જ મારું ભાષણ શરૂ થયું હતું અને બધું જ ગરબડ થઈ ગયું. તે સમયે મેં આ નિવેદન આપ્યું હતું. સુપ્રીમ કોર્ટ પણ લાઉડસ્પીકર વિશે કહી ચૂકી છે.

પ્રશ્ન: જો તમને લાઉડસ્પીકરથી આટલી બધી સમસ્યા હોય તો તેના પર પ્રતિબંધ લગાવો. કેન્દ્રથી રાજ્યમાં તમારી સરકાર છે? નિવેદનબાજી દ્વારા શું પ્રાપ્ત થશે?
ઈશ્વરપ્પા: મેં જે કહ્યું તે અચાનક નથી બન્યું. આગામી દિવસોમાં તમે જોશો કે અમે શું પગલાં લઈ શકીએ છીએ. હું કેન્દ્ર અને રાજ્ય સરકારને વિનંતી કરીશ આ અંગે તાત્કાલિક પગલાં લેવામાં આવે. લોકોને પરેશાની ન થવી જોઈએ.

સવાલઃ યુપીમાં ચૂંટણી દરમિયાન લાઉડસ્પીકરનો મુદ્દો ઊઠ્યો હતો. યોગી આદિત્યનાથ ત્યાં જીતી ગયા, મોટાભાગની જગ્યાએ આજે પણ લાઉડસ્પીકર વાગી રહ્યાં છે?
ઈશ્વરપ્પા: મને ખબર નથી કે યુપી કે અન્ય જગ્યાએ શું થયું. જાહેરસભા દરમિયાન સમસ્યા થઈ, તેથી મેં મારા મનની વાત કરી.

પ્રશ્ન: તમારા નિવેદનના ટાઈમિંગ પર પ્રશ્નો ઉઠાવવામાં આવી રહ્યા છે. આરોપ છે કે ચૂંટણીનું ધ્રુવીકરણ કરવા તમે જાણી જોઈને આ નિવેદન આપ્યું છે.
ઈશ્વરપ્પા: એવું નથી. ચૂંટણીઓ આવતી અને જતી રહે છે. હિન્દુ-મુસ્લિમે સાથે મળીને કામ કરવું પડશે. પીએમ મોદીએ પણ અમને આ જ વાત કહી છે, પરંતુ પરીક્ષાના સમયે વિદ્યાર્થીઓ અને હોસ્પિટલમાં દર્દીઓને પરેશાન કરવા યોગ્ય નથી.

સવાલ: ગત વર્ષે તમે કહ્યું હતું કે 36 હજાર મંદિરો તોડીને તેના પર મસ્જિદો બનાવાઈ છે. તમે કયાં મંદિરોની વાત કરો છો? કોઈ સર્વે કરવામાં આવ્યો છે, 36 હજારનો આંકડો તમારી પાસે કેવી રીતે આવ્યો?
ઈશ્વરપ્પા: હું નવી મસ્જિદો તોડવાની વાત નથી કરી રહ્યો. મેં કહ્યું કે જ્યાં હિંદુ મંદિરો તોડીને મસ્જિદો બનાવવામાં આવી છે ત્યાં ફરી મંદિરો બનાવીશું. મેં એક લેખમાં વાંચ્યું હતું કે 36 હજાર મંદિરો તોડીને મસ્જિદો બનાવવામાં આવી હતી. મને ખબર નથી કે વાસ્તવિક સંખ્યા શું છે. મેં હજી સુધી તેના વિશે કંઈ કર્યું નથી. ચાલો જોઈએ આગળ શું કરી શકાય. મારા મનમાં જે હતું તે કહ્યું.

સવાલ: તમે કહ્યું હતું કે RSSનો ભગવો એક દિવસ રાષ્ટ્રધ્વજ બનશે. શું તમને પણ તિરંગા સાથે સમસ્યા છે?
ઈશ્વરપ્પા: મેં તિરંગા વિશે કંઈ કહ્યું નથી. મેં કહ્યું હતું કે હજાર વર્ષ પછી ફરી એકવાર દેશનો રાષ્ટ્રધ્વજ ભગવો હશે. ભારત હજાર વર્ષ પછી ફરી એકવાર હિન્દુરાષ્ટ્ર બનશે.

સવાલ: ભાજપના સમર્થકો કહી રહ્યા છે કે મોદીજીની સરકારમાં જ ભારત હિન્દુરાષ્ટ્ર બનશે? તમે હજાર વર્ષ પછી કહો છો?
ઈશ્વરપ્પા: આ વિશે મને ખબર નથી કે પીએમ મોદી, બીજેપી અને અન્ય લોકો શું કહે છે. હું સ્વયંસેવક છું. આજે નહીં તો કાલે દેશનો રાષ્ટ્રધ્વજ ભગવો હશે, આ વાત નિશ્ચિત છે.

સવાલઃ તમે થોડાં વર્ષો પહેલાં મુસ્લિમોને પાકિસ્તાન જવાની સલાહ આપી હતી. ક્યારેક તેમને ગુંડા કહો છે. શું તમને મુસ્લિમો સાથે કોઈ સમસ્યા છે?
ઈશ્વરપ્પાઃ મેં ક્યારેય મુસ્લિમોને પાકિસ્તાન જવા કહ્યું નથી. ગુંડા પણ નથી કહ્યું.

(જો કે, એક વીડિયો સામે આવ્યો છે જેમાં ઇશ્વરપ્પા મુસ્લિમોને ગુંડા કહેવા પર સ્પષ્ટતા કરી રહ્યા છે. તેઓ કહે છે- 'મેં બધા મુસ્લિમોને ગુંડા નથી કહ્યા, જે ગુંડાગીરી કરી રહ્યા છે તેમને ગુંડા કહ્યા છે.')

સવાલઃ તમે યેદિયુરપ્પા પર ભ્રષ્ટાચારનો આરોપ લગાવ્યો હતો. જે બાદ તેમને પદ પરથી હટાવવામાં આવ્યા હતા, પરંતુ આ વખતે ભાજપ તેમને ફરી ચહેરો બનાવી રહી છે. શું તેઓ હવે ભ્રષ્ટ નથી રહ્યા?
ઇશ્વરપ્પા: યેદિયુરપ્પાને તમામ કેસમાં ક્લીનચીટ મળી છે. તેથી જ તેમને રાષ્ટ્રીય ચૂંટણી સમિતિમાં લેવામાં આવ્યા છે. તે અમારા મોટા નેતા છે. કર્ણાટકમાં બધા તેમને ઓળખે છે, તેથી જ તેઓ તેમના ચહેરા પર ચૂંટણી લડી રહ્યા છે.

સવાલઃ સર્વે જણાવે છે કે તમારી પાર્ટીને માત્ર 70થી 75 સીટો જ મળી રહી છે?
ઈશ્વરપ્પા: હું આખા રાજ્યમાં ફરી રહ્યો છું. હું દાવા સાથે કહી છું કે કર્ણાટકમાં ફરી એકવાર ભાજપ સરકાર બનાવવા જઈ રહી છે.

રથયાત્રા દરમિયાન ઇશ્વરપ્પા સતત ઉશ્કેરણીજનક નિવેદનો આપી રહ્યા છે
સોમવાર જ નહીં રવિવાર, 12 માર્ચે કાવૂરના શાંતિનગરમાં ઈશ્વરપ્પાએ ઉશ્કેરણીજનક વાતો કહી હતી. તેમણે કહ્યું- 'અમારી સરકાર દેશદ્રોહીઓને લાત મારી ચૂકી છે. PFI પર પ્રતિબંધ મૂકવામાં આવ્યો છે અને ગૌહત્યા કરનારાઓનાં ઘરો પર બુલડોઝર ચાલી રહ્યાં છે. અમે હિન્દુઓને એકલા નહીં છોડીએ. જો અમારા કાર્યકરોને સ્પર્શ કરવામાં આવશે તો અમે તેમને પણ છોડીશું નહીં.

હિંદુઓ જાગૃત થઈ રહ્યા છે, મુસલમાનોએ સમજવું જોઈએ કે જો હિંદુ ભાઈઓ પીઠ ફેરવશે તો તેનો કોઈ ફાયદો નથી. અમે માત્ર હિંદુઓ પાસેથી મત માંગીએ છીએ, અમારે મુસ્લિમ મત નથી જોઈતા. કાશી વિશ્વનાથની બાજુમાં, મથુરામાં પણ મંદિરની બાજુમાં એક મસ્જિદ બનાવી દીધી. તેને તોડીને ફરી મંદિર બનાવીશું.

ઇશ્વરપ્પાએ કર્ણાટકમાં ભાજપનાં મૂળિયાં સ્થાપિત કરવાનું કામ કર્યું
ઈશ્વરપ્પા સંઘની પૃષ્ઠભૂમિમાંથી આવે છે. તેઓ કર્ણાટકમાં ભાજપના પ્રથમ પેઢીના નેતા છે. 1980-90ના દાયકામાં જ્યારે કર્ણાટકમાં ભાજપ માટે કોઈ લેનાર ન હતું, ત્યારે ઈશ્વરપ્પાએ તેમના બે મિત્રો બીએસ યેદિયુરપ્પા અને એચએન અનંત કુમાર સાથે પાર્ટીને આગળ ધપાવી હતી. આ ત્રણ મિત્રોમાં, ઈશ્વરપ્પાની છબી હંમેશાં તેમનાં નિવેદનોને કારણે કટ્ટર હિન્દુત્વવાદી નેતાની રહી.

1989માં તેમણે શિમોગાથી પ્રથમ વિધાનસભા ચૂંટણી જીતી હતી. પછી ક્યારેક તે જીતી ગયા અને ક્યારેક જીત્યા વિના પણ તે એક યા બીજા સ્થાન પર રહ્ય. જ્યારે તેઓ વિધાનસભાની ચૂંટણી હારી ગયા, ત્યારે તેઓ નોમિનેશન માટે કાઉન્સિલના સભ્ય બન્યા. 1999માં એક સમય એવો આવ્યો જ્યારે ઇશ્વરપ્પાની રાજકીય સફરમાં ગહન સંકટ આવ્યું હતું. તેઓ ચૂંટણી પણ હારી ગયા હતા, પરંતુ તે સમયે કેન્દ્રમાં NDAની સરકાર હતી. ભાજપના અટલ બિહારી વાજપેયી વડાપ્રધાન હતા. સરકારે ઇશ્વરપ્પાને સેન્ટ્રલ સિલ્ક બોર્ડના ચેરમેન બનાવ્યા.

કોન્ટ્રાક્ટરની આત્મહત્યાના કેસમાં ફસાયા, મંત્રી પદ ગુમાવ્યું
ગત વર્ષે કર્ણાટકના કોન્ટ્રાક્ટર સંતોષ પાટીલના આત્મહત્યા કેસમાં ઈશ્વરપ્પા ફસાયા હતા. તેમના પર સંતોષને આત્મહત્યા માટે ઉશ્કેરવાનો આરોપ હતો. વાસ્તવમાં સંતોષે આત્મહત્યા પહેલાં પીએમ મોદીને એક પત્ર લખ્યો હતો. જેમાં એવો આક્ષેપ કરવામાં આવ્યો હતો કે ઈશ્વરપ્પા આ કામ માટે તેમની પાસેથી 40 ટકા કમિશન માંગી રહ્યા છે. તે સમયે ઈશ્વરપ્પાએ આ આરોપોને નકારી કાઢ્યા હતા, પરંતુ સંતોષની આત્મહત્યા બાદ તેમને કેબિનેટમાંથી હટાવી દેવામાં આવ્યા હતા. સરકારે તપાસ સમિતિ પણ બનાવી, પરંતુ પોલીસ તપાસમાં તેમને ક્લીનચીટ આપવામાં આવી.