• Gujarati News
  • Dvb original
  • Bharuch Farmer Started Cultivating Sugarcane And Banana In 4 Acres Of Land Using Organic Manure, Increased Production By 25% And Earned Rs 17 Lakh.

આજની પોઝિટિવ સ્ટોરી:ભરૂચના ખેડૂતે જૈવિક ખાતરના ઉપયોગથી 4 એકર જમીનમાં શેરડી-કેળાંની ખેતી શરૂ કરી, ઉત્પાદન 25 ટકા વધારીને 17 લાખની આવક મેળવી

ભરૂચ5 મહિનો પહેલા
જૈવિક ખાતરના ઉપયોગથી કેળાંની ખેતીના ઉત્પાદનમાં 20 ટકા વધારો થવાની આશા ખેડૂત સેવી રહ્યા છે.
  • 4000 કેળને જૈવિક ખાતરોનું પોષણ મળતાં કેળાંની લંબાઈમાં વધારો થયો

ભરૂચ જિલ્લાના ભરૂચના શુક્લતીર્થના પ્રગતિશીલ ખેડૂત હિતેશભાઈ પટેલ છેલ્લાં અઢી વર્ષથી જૈવિક ખાતરના ઉપયોગથી શેરડી અને કેળાંની ખેતી કરી રહ્યા છે, જેને કારણે શેરડીના ઉત્પાદનમાં 25 ટકાનો વધારો મેળવ્યો છે. શેરડીની ખેતીમાં 17 લાખની આવક મેળવી છે. આ ઉપરાંત કેળાંની ખેતીના ઉત્પાદનમાં 20 ટકા વધારો થવાની આશા રાખી રહ્યા છે.

ખેડૂતે અઢી વર્ષ પહેલાં જૈવિક ખાતરો તથા જૈવિક જંતુનાશકોનો ઉપયોગ શરૂ કર્યો હતો.
ખેડૂતે અઢી વર્ષ પહેલાં જૈવિક ખાતરો તથા જૈવિક જંતુનાશકોનો ઉપયોગ શરૂ કર્યો હતો.

કૃત્રિમ ખાતરથી જમીનને નુકસાન પહોંચ્યું
જમીનનો ખોરાક વૃક્ષ અને વૃક્ષનો ખોરાક જમીન! આ પ્રકૃતિના સાર્વત્રિક નિયમને કૃત્રિમ ખાતરોને કારણે નુકસાન પહોંચ્યું છે. હવે કૃષિમાં ખાતરો અને કીટ નાશકોનો ઉપયોગ સંદતર અથવા નહિવત કરવાનો ખરો સમય આવી ગયો છે. જળ-જમીન ઉપરાંત માનવ શરીરને નુકસાન પહોંચાડતાં કેમિકલ ખાતરો અને દવાઓને બદલે પ્રાકૃતિક ખેતી વળવા તથા જૈવિક ખાતરોનો ઉપયોગથી આવનારી આપદાથી બચી શકાય છે. ખાસ કરીને પ્રાકૃતિક ખેતીની સમાંતર જૈવિક ખાતરો પણ એક સારો વિકલ્પ બની શકે છે.

અઢી વર્ષથી જૈવિક ખાતરોનો ઉપયોગ શરૂ કર્યો
મધ્ય ગુજરાતમાં ઘણા ખેડૂતોએ કેમિકલ ખાતરોનો ઉપયોગ ઓછો કરી જૈવિક ખાતરો અપનાવવા લાગ્યા છે. દેથાણા નજીક આવેલી પોતાની વાડીમાં જૈવિક ખાતરોના ઉપયોગથી શેરડીના ઉત્પાદનમાં 25 ટકા જેટલો વધારો લેનારા 37 વર્ષીય ખેડૂત હિતેશભાઇ ગોવિંદભાઇ પટેલ આવા કૃષિકારો પૈકી એક છે. અઢી વર્ષ પહેલાં તેમણે જૈવિક ખાતરો તથા જૈવિક જંતુનાશકોનો ઉપયોગ શરૂ કર્યો અને હવે એનો લાભ હવે મળી રહ્યો છે અને શેરડીના પાકમાં 13 લાખથી વધીને 17 લાખ આવક થઈ છે.

કેળાંની લૂમ લાંબી થવાની સાથે વજનમાં વધારો થયો છે.
કેળાંની લૂમ લાંબી થવાની સાથે વજનમાં વધારો થયો છે.

પહેલાં કેમિકલ ખાતરોનો બહુ જ ઉપયોગ થતો હતો
કોલેજના બીજા વર્ષ સુધી અભ્યાસ કરનારા હિતેશભાઇ કહે છે, હું 12 વર્ષથી ખેતી કરૂ છું. એ પહેલાં મારા પિતા ખેતી કરતા હતા. મારી ચાર એકર જમીનમાં પહેલેથી જ કેમિકલ ખાતરોનો બહુ જ ઉપયોગ થતો હતો. આપણે જે કૃત્રિમ ખાતર જમીનમાં નાખીએ છીએ એનો માત્ર 28થી 32 ટકા ખાતરનો વાસ્તવિક રીતે ઉપયોગ થાય છે, બાકીનું એમને એમ પડ્યું રહે છે.

બાયોફર્ટિલાઇઝર ઉપયોગ શરૂ કર્યો
એના પર બીજું ખાતર નાખવાથી રાસાયણિક પ્રક્રિયા થાય છે અને અંતે જમીનની માટી કડક થઇ જાય છે. આ ઉપરાંત જમીનમાં ટીડીએસ અને પીએચનું પ્રમાણ વધી જાય છે. માટી ઉપર સફેદ પરખ જોવા મળે છે. આવી સમસ્યા મોટા ભાગના ખેડૂતો અનુભવે છે. આ કૃત્રિમ ખાતરોનું પરિણામ છે. આ પ્રકોપથી બચવા માટે કાં તો પ્રાકૃતિક ખેતી અથવા તો જૈવિક ખાતરોનો ઉપયોગ જ કરવાનો વિકલ્પ અમારી પાસે હતો. અમે કેમિકલના ખાતરનો ઉપયોગ ઘટાડી હવે બાયોફર્ટિલાઇઝર ઉપયોગ શરૂ કર્યો છે.

ખેડૂતે કેમિકલના ખાતરનો ઉપયોગ ઘટાડી હવે બાયોફર્ટિલાઇઝર ઉપયોગ શરૂ કર્યો છે.
ખેડૂતે કેમિકલના ખાતરનો ઉપયોગ ઘટાડી હવે બાયોફર્ટિલાઇઝર ઉપયોગ શરૂ કર્યો છે.

ટપક સિંચાઇ પદ્ધતિ અપનાવી
અમે ટિશ્યૂ કલ્ચરથી 4 હજાર જેટલી કેળ વાવી છે. એને અમે ટપક સિંચાઇ પદ્ધતિથી પાણી પાઇએ છીએ,. સાથે જૈવિક ખાતરનો વપરાશ કર્યો છે, જેનાથી ફળની લંબાઇ વધુ જોવા મળી છે. લૂમ પર લીલી ચમક વધુ અને ટપકા ઓછા જોવા મળ્યા છે. શેરડીના પાકમાં ગાંઠો સામાન્ય રીતે 8થી 12 જેટલી હોય છે પણ, આ પાકમાં ગાંઠનું પ્રમાણમાં 16થી 22 રહ્યું હતું. શેરડી વાવ્યા બાદ બાજુમાં રહેલી ગાંઠમાંથી પણ શેરડી ઊગે છે, જે જેટલું વધુ હોય એટલું વધુ ઉત્પાદન મળે છે.

સૂકારો, કાળી ફૂગ અને સફેદ ફૂગ, ઉત્સુક, ગુલાબી ઇંયળ, મુંડા, લીલા તડતડિયા, મોલો મસી, સફેદ માખી લીલી ઇંયળ, ચૂસિયા પર નિયંત્રણ લાવી શકાય છે.
સૂકારો, કાળી ફૂગ અને સફેદ ફૂગ, ઉત્સુક, ગુલાબી ઇંયળ, મુંડા, લીલા તડતડિયા, મોલો મસી, સફેદ માખી લીલી ઇંયળ, ચૂસિયા પર નિયંત્રણ લાવી શકાય છે.

જીવાણુ જૈવિક ખાતરો થકી મળે છે
હવે મૂળ વાત... સામાન્ય રીતે ખેડૂતો મુખ્યત્વે ડાઇએમોનિયમ ફોસ્ફેટ, યુરિયા અને પોટાશના કેમિકલ ખાતરોનો ઉપયોગ કરે છે. આ ખાતરને પાકના છોડને લાયક બનાવે એવા જીવાણુનું અસ્તિત્વ જમીનમાં હોઇ એ ખૂબ જ જરૂરી છે. એ જીવાણુ જૈવિક ખાતરો થકી મળે છે. ડીએપીના વિકલ્પે ફોસ્ફરસ સોલ્યુબિલાઇઝિંગ બેક્ટરિયા, યુરિયાના વિકલ્પે એઝેટોબેક્ટર (વાતાવરણમાંથી નાઇટ્રોઝન લઇ છોડને આપવા) અને એસેટોબેક્ટર (જમીનમાં નાઇટ્રોઝનને સ્થાપિત કરે છે) નામના બેક્ટેરિયા, પોટાશના બદલે પોટાશ મોબિલાઇઝિંગ બેક્ટરિયાનો ઉપયોગ કરી શકાય.

ટિશ્યૂ કલ્ચરથી 4 હજાર જેટલી કેળ વાવી છે.
ટિશ્યૂ કલ્ચરથી 4 હજાર જેટલી કેળ વાવી છે.

બાયો પેસ્ટિસાઇડ, બાયો ફન્ગીસાઇડ, બાયો ઇન્સેક્ટિસાઇડનો ઉપયોગ કરી શકાય
આટલું જ નહીં, બાયો પેસ્ટિસાઇડ, બાયો ફન્ગીસાઇડ અને બાયો ઇન્સેક્ટિસાઇડ કેમિકલયુક્ત જંતુનાશક દવાના વિકલ્પે ઉપયોગ કરી શકાય છે. એમાં એવા પ્રકારની ફૂગ વિકસાવી હોય છે, જે ખાવાથી પાકને નુકસાન કરતા કીટકો મૃત્યું પામે છે. બ્યુવેરા બાસિયાના, મેટારિઝયમ એનિસ્લોપી, ટ્રાયકોડર્મા વિરડી પિસ્યુડોમોનસ, વર્સ્ટિસિલિય લેકાની, આઈસેરિયા નામની ફૂગ અને જીવાણુના કલ્ચર બજારમાં સરળતાથી મળે છે, જે કેમિકલ જંતુનાશકો કરતાં સાવ સસ્તી કિંમતના હોય છે. એનાથી સૂકારો, કાળી ફૂગ અને સફેદ ફૂગ, ઉત્સુક, ગુલાબી ઇંયળ, મુંડા, લીલા તડતડિયા,મોલો મસી, સફેદ માખી લીલી ઇંયળ, ચૂસિયા પર નિયંત્રણ લાવી શકાય છે.

અન્ય સમાચારો પણ છે...