• Gujarati News
  • Dvb original
  • An Estimated 1 Million Visitors Will Come To Salangpur, The Celebrations Will Be Colorful For Two Days In A Row, Preparation Of Accommodation And Parking For The People.

16મીએ હનુમાનજયંતી:સાળંગપુરમાં દાદાનાં દર્શન માટે અંદાજે 10 લાખથી વધુ ભક્તો ઊમટશે, તંત્ર દ્વારા ખાસ રૂટ સાથે રહેવા-જમવા અને પાર્કિંગની ખાસ વ્યવસ્થા

એક મહિનો પહેલા

બે વર્ષ બાદ સાળંગપુરના શ્રીકષ્ટભંજનદેવ મંદિરમાં હનુમાનજયંતીની ભવ્યાતિભવ્ય ઉજવણી થશે. એ માટે મંદિરના સંતો દ્વારા વિશેષ તૈયારીઓ કરી લેવામાં આવી છે. અંદાજે 10 લાખથી વધુ દર્શનાર્થીઓ હનુમાનજંયતીના દિવસે આવશે, તેથી દર્શનાર્થીઓને મુશ્કેલી ના થાય એ માટે મંદિર પરિસરમાં રહેવા તથા જમવાની ખાસ વ્યવસ્થા કરવામાં આવી છે. આ ઉપરાંત એકસાથે દસ હજારથી વધુ વાહન પાર્ક થઈ શકે એ માટે 6 વિશાળ પાર્કિંગ એરિયા બનાવવામાં આવ્યા છે. દાદાના જન્મોત્સવની રંગેચંગે ઉજવણી થાય એ માટે અહીં બે દિવસ સુધી વિવિધ કાર્યક્રમો પણ યોજાશે.

સાળંગપુરમાં નીકળેલી શોભાયાત્રાની ફાઇલ તસવીર.
સાળંગપુરમાં નીકળેલી શોભાયાત્રાની ફાઇલ તસવીર.

પંચમુખી હનુમાનજીની ભવ્ય શોભાયાત્રા નીકળશે
શાસ્ત્રી હરિપ્રકાશ દાસ સ્વામીએ દિવ્યભાસ્કર (ડિજિટલ) સાથે ખાસ વાતચીત કરતાં જણાવ્યું કે ''શુક્રવારે 15મી તારીખે બપોરે 3થી 7 વાગ્યા સુધી નરાયણ કુંડથી મંદિરના પરિસર સુધી પંચમુખી હનુમાનજીની હાથી પર ભવ્ય શોભા યાત્રા નીકળશે. આ શોભાયાત્રામાં હજારો બહેનો મસ્તક પર દાદાના અભિષેકનું જળ ધારણ કરશે. 251 પુરુષ અને મહિલા સાફા ધારણ કરીને શોભાયાત્રમાં જોડાશે. તો 108 બાળકો ધ્વજ લહેરાવી શોભાયાત્રાને મહેકાવશે. શોભાયાત્રામાં નાશિક ઢોલ, DJ અને બેન્ડવાજા પણ લોકોને મંત્રમુગ્ધ કરશે. આ ઉપરાંત દેશી ઘોડાગાડી અને બળદગાડું પણ શોભાયાત્રામાં ખાસ આકર્ષણ જમાવશે. આ દરમિયાન સંતો દ્વારા 251 કિલો ફૂલ અને 25 હજાર કિલો ચોકલેટનો દર્શનાર્થીઓ પર વરસાદ કરાશે.''

મંદિર પરિસરમાં ભવ્ય લોકડાયરો યોજાશે
આ અંગે હરિપ્રકાશ સ્વામીએ જણાવ્યું હતું કે ''15 તારીખે રાત્રે 8.30 વાગ્યાથી મોડે સુધી અહીં ભવ્ય લોકડાયરો યોજાશે, જેમાં લોકસાહિત્યકાર બ્રિજરાજદાન ગઢવી, હાસ્યકલાકાર હિતેશભાઈ અંટાળા અને જાદુગર અમિતભાઈ સોલંકી શ્રદ્ધાળુઓને જમાવટ કરાવશે.''

સાળંગપુરમાં યોજાયેલા સમૂહ યજ્ઞની ફાઇલ તસવીર.
સાળંગપુરમાં યોજાયેલા સમૂહ યજ્ઞની ફાઇલ તસવીર.

પંચમુખી યજ્ઞમાં 1 હજાર ભક્તો પાટલે બેસવાનો લાભ લેશે
હરિપ્રકાશ સ્વામીએ કહ્યું કે ''16 તારીખે એટલે કે હનુમાનજયંતીના દિવસે દાદાના દરબારમાં પંચમુખી સમૂહ મારુતિ યજ્ઞ યોજાશે, જેમાં વડતાલ ગાદીના આચાર્ય રાકેશપ્રસાદ દાસ, સંતો અને 1 હજારથી વધુ હરિભક્તો યજ્ઞમાં બેસવાનો લાભ લેશે. દેશના વિવિધ પ્રાંતમાંથી આવેલા 50થી વધુ બ્રાહ્મણો આ યજ્ઞ કરાવશે.''

શ્રીકષ્ટભંજન દેવ મંદિર દ્વારા કરવામાં આવેલી પાર્કિંગ અને રહેવાની વ્યવસ્થાનો મેપ.
શ્રીકષ્ટભંજન દેવ મંદિર દ્વારા કરવામાં આવેલી પાર્કિંગ અને રહેવાની વ્યવસ્થાનો મેપ.

મંદિર તરફ પ્રવેશવા માટેનો રૂટ
- અમદાવાદ - ધંધૂકા - બરવાળા તરફથી તથા ભાવનગર - વલ્લભીપુર તરફથી સાળંગપુર - બોટાદ તરફ જતાં ફક્ત કેરિયાઢાળથી વાહનો જ પ્રવેશી શકશે.
- કેરિયાઢાળ - લાઠીદડ - સમઢિયાળા - સેંથળી - સાળંગપુર (પાર્કિંગ) તરફનો રૂટ વનવે રહેશે.
- બોટાદથી સાળંગપુર તરફ જતાં તમામ વાહનો માટે ફક્ત જ્યોતિગ્રામ સર્કલ, બોટાદ (ભાવનગર રોડ) - સમઢિયાળા - સેંથળી - સાળંગપુર (પાર્કિંગ) તરફનો રૂટ વનવે રહેશે.
- અમદાવાદ - ધંધૂકા - બરવાળા તરફથી તથા ભાવનગર - વલ્લભીપુર તરફથી બોટાદ તરફ જતાં વાહનો માટે કેરિયાઢાળ - લાઠીદળ - જ્યોતિગ્રામ સર્કલ (બોટાદ)નો રૂટ વનવે રહેશે.
- સાળંગપુરથી અમદાવાદ - ધંધૂકા -બરવાળા તરફ તથા ભાવનગર - વલ્લભીપુર તરફ જતાં વાહનો માટે સાળંગપુર -ખાંભડા -બરવાળા (સાળંગપુર રોડ T પોઇન્ટ) તરફનો રૂટ વનવે રહેશે.
- સાળંગપુરથી બોટાદ તરફ આવતાં વાહનો માટે સાળંગપુર - સેંથળી - એસ્સાર પેટ્રોલપંપ, બોટાદ (મિલિટરી રોડ T રોડ) રૂટ તરફથી વાહનો પસાર થઈ શકશે.
- બોટાદથી અમદાવાદ તરફ જતાં વાહનો માટે બોટાદ - મિલિટરી રોડ - રાણપુર - ધંધૂકા રૂટ પરથી વાહનો પસાર થઈ શકશે.
- બોટાદથી બરવાળા તરફ જતાં વાહનો માટે સમઢિયાળા - લાઠીદડ - કેરિયાઢાળ તરફથી વાહનો પસાર થઈ શકશે.

આ રૂટ પર વાહનો પ્રવેશી શકશે નહીં
- અમદાવાદ - ધંધૂકા - બરવાળા તરફથી તથા ભાવનગર - વલ્લભીપુર તરફથી સાળંગપુર - બોટાદ તરફ જતાં વાહનો બરવાળા - સાળંગપુર T પોઇન્ટથી પ્રવેશી શકશે નહીં.
- બોટાદ એસ્સાર પેટ્રોલપંપ, મિલિટરી રોડ T પોઇન્ટથી સેંથળી - સાળંગપુર રોડ પર વાહનો પ્રવેશી શકશે નહીં.

અન્ય સમાચારો પણ છે...