તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો
  • Gujarati News
  • Dvb original
  • Explainer
  • Ujjawal Nikam News | Sushant Singh Rajput Suicide CBI Investigation Update | Senior Lawyer Ujjawal Nikam Speaks To Dainik Bhaskar Over Sushant Death Case

ભાસ્કર એક્સપ્લેનર:શું સુશાંત કેસમાં CBI તપાસનો આદેશ કાયદાકીય રીતે યોગ્ય છે? મહારાષ્ટ્ર સરકાર એવી ફસાઈ કે જવાબ પણ માગી શકે તેમ નથી; તપાસમાં વિલંબ થતાં પુરાવાઓ નાશ થવાનું જોખમ

એક વર્ષ પહેલા
  • કૉપી લિંક
  • મહારાષ્ટ્ર સરકાર CBI તપાસને લઈ વિરોધ કરે તો એમ લાગશે કે તે કોઈને બચાવવાનો પ્રયાસ કરે છે
  • રિયા ચક્રવર્તી પણ CBI તપાસનો વિરોધ કરી શકે તેમ નથી, કારણ કે શરૂઆતમાં તેણે જ CBI તપાસની માગણી કરી હતી

એક્ટર સુશાંત સિંહ રાજપૂતની આત્મહત્યા કેસનો હાલ કોઈ ઉકેલ આવે તેમ લાગતું નથી. કેન્દ્ર સરકારે સુશાંતની ગર્લફ્રેન્ડ રિયા ચક્રવર્તીની અરજીની સુનાવણી દરમ્યાન સુપ્રીમ કોર્ટમાં કહ્યું કે, બિહાર સરકારની ભલામણ સ્વીકારીને તેઓ આ કેસની તપાસ CBIને સોંપે છે. નોટિફિકેશન પણ જાહેર કરી દેવામાં આવ્યું છે.

CBI તપાસ પર અનેક સવાલ ઊઠાવવામાં આવ્યા છે. શું આ કાયદાકીય રીતે યોગ્ય છે? શું CBI રાજ્ય સરકારની પરવાનગી વગર મુંબઈમાં તપાસ શરૂ કરી શકે છે? હવે મહારાષ્ટ્ર સરકારે શું કરવું જોઈએ? આ તમામ સવાલોના જવાબ શોધવામાં વરિષ્ઠ સરકારી વકીલ ઉજ્જવલ નિકમે મદદ કરી.

શરૂઆતમાં સ્થાપિત કલાકારો પર આંગળી ચીંધવામાં આવી હતી
સુશાંતે 14 જૂન, 2020ના રોજ આત્મહત્યા કરી હતી. આત્મહત્યાના કારણોમાં એક વાત એ સામે આવી હતી કે બોલિવૂડમાં કામ કરતાં કેટલાંક સીનિયર, સ્થાપિત કલાકારોએ જાણી જોઈને એવી પરિસ્થિતિ ઊભી કરી કે સુશાંત ડિપ્રેશનમાં જતો રહ્યો. તેણે આત્મહત્યા જેવું પગલું ભરવું પડ્યું. આ કારણે દેશે એક સારો કલાકાર ગુમાવ્યો, શરૂઆતમાં આમ જ લાગતું હતું.

પટનામાં FIR થયા બાદ તપાસની દિશા બદલાઈ
મહારાષ્ટ્ર પોલીસે CRPCના સેક્શન 174 હેઠળ તપાસ શરૂ કરી હતી. કેટલાંક જાણીતા ડિરેક્ટર તથા પ્રોડ્યુસરની પૂછપરછ પણ કરવામાં આવી હતી. બોલિવૂડમાં ખાન ત્રિપુટીનું વર્ચસ્વ છે. સુશાંતના મૃત્યુ પાછળ ખાન ત્રિપુટી જવાબદાર હોવાની ચર્ચા સોશિયલ મીડિયામાં થવા લાગી હતી.

સુશાંતના મૃત્યુના 45 દિવસ પછી એક્ટરના પિતા કૃષ્ણકુમાર સિંહે બિહારના પાટનગર પટનાના રાજીવ નગર પોલીસ સ્ટેશનમાં ફરિયાદ નોંધાવી હતી. સુશાંતની સાથે રહેતી તેની ગર્લફ્રેન્ડ રિયા ચક્રવર્તી પર શંકા વ્યક્ત કરીને તેની વિરુદ્ધ ગંભીર આક્ષેપો મૂકવામાં આવ્યાં હતાં. FIR દાખલ થયા બાદ બિહાર પોલીસ તપાસ માટે મુંબઈ ગઈ હતી.

મહારાષ્ટ્ર પોલીસની ભૂમિકા શંકાના ઘેરામાં
મુંબઈ પોલીસના વલણથી એવું લાગ્યું કે બિહાર પોલીસને આ કેસની તપાસનો અધિકાર જ નથી. તેમનું આ જ સ્ટેન્ડ રહ્યું હતું. તો બિહાર પોલીસે આક્ષેપ કર્યો હતો કે મુંબઈ પોલીસ સહયોગ આપતી નથી. આ જ કારણે બિહારના DGPએ SP વિનય તિવારીને મુંબઈ મોકલ્યા હતા. જોકે, અહીંયા BMCએ કોરોના ગાઇડલાઇન્સનું કારણ આપીને તેમને ક્વોરન્ટીન કરી દીધા હતા.

આ વાત પર અંગ્રેજી તથા હિંદી ન્યૂઝ ચેનલે આ કેસમાં કંઈક તો ગરબડ છે, મુંબઈ પોલીસ કંઈક છુપાવી રહી છે, એવી શંકાઓ લોકોના મનમાં જગાવી. પરિણામ એ આવ્યું કે સુશાંત સિંહે આત્મહત્યા નથી કરી પરંતુ તેને ઉશ્કેરવામાં આવ્યો હોવાની ચર્ચા દેશભરમાં થવા લાગી. સોશિયલ મીડિયામાં યુઝર્સ એવી વાતો કરવા લાગ્યા કે સુશાંત આત્મહત્યા કરી શકે નહીં, તેની હત્યા થઈ છે.

દિશા સલિયન આત્મહત્યા કેસની પણ ચર્ચા
આ દરમિયાન સુશાંતની ફાઈનાન્સ મેનેજર રહી ચૂકેલી દિશા સલિયનની આત્મહત્યાને પણ સુશાંતની આત્મહત્યા સાથે જોડવામાં આવી. એક અંગ્રેજી ચેનલે તો કેટલાંક લોકોને બોલાવીને જવાબ પણ માગ્યા હતા. ખરી રીતે તો જે કામ પોલીસે કરવાનું હતું તે કામ ન્યૂઝ ચેનલે પોતાના હાથમાં લઈ લીધું છે.

સુશાંતના મિત્રો કેમેરાની સામે પોત-પોતાની વાતો કહી રહ્યાં છે. સુશાંતના મિત્રોએ દાવો કર્યો હતો કે સુશાંતે તેમને એમ કહ્યું હતું કે દિશાની આત્મહત્યા બાદ આ લોકો તેને જીવતો છોડશે નહીં. સાચી વાત એ છે કે સુશાંતની આત્મહત્યાના સમયે એક પણ વ્યક્તિએ આવી વાત કરી નહોતી.

બિહારના DGP મેદાનમાં ઊતર્યા
બિહારના DGP જાતે જ મેદાનમાં આવ્યા. તેમણે હિંદી તથા અંગ્રેજી ન્યૂઝ ચેનલને ઈન્ટરવ્યૂ આપવાના શરૂ કરી દીધા. શંકાસ્પદ આરોપી રિયા ચક્રવર્તીએ સુપ્રીમ કોર્ટમાં કહ્યું કે બિહાર પોલીસ પાસે સુશાંત કેસની તપાસ કરવાનો અધિકાર નથી. મહારાષ્ટ્ર પોલીસ આની તપાસ કરી શકે છે. આ વાત સામે આવતા જ બિહારના DGPએ મહારાષ્ટ્ર પોલીસને આડે હાથ લીધી હતી. મુંબઈ પોલીસ રિયાની ભાષા બોલી રહી છે, આ ભ્રમ જનતાના મનમાં ઊભો કરવામાં આવ્યો. તેમણે એવો આક્ષેપ કર્યો કે મુંબઈ પોલીસ કોઈના ડરથી કંઈક છુપાવી રહી છે. આ આક્ષેપોનો ફાયદો ઉઠાવીને કેટલાંક વિરોધ પક્ષના નેતાઓએ બેફામ નિવેદનો આપવાનું શરૂ કર્યું.

કેન્દ્રે બિહાર સરકારની ભલામણનો સ્વીકાર કર્યો
તપાસ પર આરોપ-પ્રત્યારોપ ચાલતા હતા અને બિહાર સરકારે સુશાંત આત્મહત્યા કેસની તપાસ CBI કરે તેવી ભલામણ કેન્દ્રને કરી હતી. કેન્દ્રે પણ સુપ્રીમ કોર્ટમાં સોગંદનામું આપીને કહ્યું કે તેઓ આ તપાસ CBIને આપી રહ્યાં છે. કેન્દ્રે તાત્કાલિક નોટિફિકેશન પણ જાહેર કર્યું. સુપ્રીમ કોર્ટે સુનાવણી દરમિયાન એક અઠવાડિયામાં મહારાષ્ટ્ર તથા બિહાર પોલીસની સાથે જ કેન્દ્ર સરકારને સોગંદનામું દાખલ કરવાનું કહ્યું છે.

બે રાજ્યોની શત્રુતા દેશ માટે સારી નથી
લોના વિદ્યાર્થી તરીકે આ પ્રકરણ અમુક મુદ્દા ઉઠાવે છે. મહત્ત્વનું એ છે કે અમુક લોકો બિહાર વિરુદ્ધ મહારાષ્ટ્ર પોલીસ વચ્ચે શત્રુતા સ્થાપિત કરવામાં સફળ રહ્યા. આ શત્રુતા રાજ્યો માટે જ નહીં પણ દેશ માટે ઘાતક છે. બિહાર પોલીસ પાસેથી જો મુંબઈ પોલીસને કંઈક શીખવું પડે તો તેને બંધ જ કરી દેવી જોઈએ, આવા સ્ટેટમેન્ટ પણ આવ્યા. અમારી પોલીસ બેસ્ટ, તમારી નકામી, આવું સ્ટેટમેન્ટ અથવા માહોલ બનાવવો દુર્ભાગ્યપૂર્ણ છે. પરંતુ, આરોપી ક્યાંય પણ છુપાઈને બેઠો હશે અને કોઈપણ હશે તો પણ અમે શોધી લેશું, આવો દાવો કરવામાં બિહારના DGP પણ પાછળ રહ્યા નથી.

ક્ષેત્રાધિકારને લઈને કાયદો શું કે છે?
પરંતુ કાયદો એમ કહે છે કે જે જગ્યાએ અપરાધ થાય છે ત્યાંની કોર્ટને જ કેસની સુનાવણી કરવાનો અધિકાર છે. સુશાંતે આત્મહત્યા મુંબઈમાં કરી છે, તેને આત્મહત્યા કરવા માટે ઉશ્કેરવામાં આવ્યો કે તેની હત્યા કરવામાં આવી આ વાતનો નિર્ણય લેવાનો અધિકાર માત્ર મુંબઈ કોર્ટને જ છે. પરંતુ સુશાંતના પરિવારના વકીલ કહી રહ્યા છે કે આ ગુનાનો અમુક ભાગ પટનામાં પણ ઘટ્યો હતો. જોકે, આ લોજિક જ હાસ્યાસ્પદ છે. આજસુધીની પરંપરા રહી છે કે જે જગ્યાએ ગુનો થયો છે, ત્યાંની પોલીસ તપાસ કરે છે. જો બીજી જગ્યાની પોલીસ કોઈ કેસ ફાઈલ કરે છે તો તે તપાસ માટે ત્યાં જ મોકલે છે જ્યાં ગુનો થયો છે. પરંતુ સુશાંતના પિતાએ મુંબઈ પોલીસ પર ભરોસો ન કર્યો અને બિહાર પોલીસમાં ફરિયાદ નોંધાવી.

મહારાષ્ટ્ર પોલીસે સ્થિતિ સ્પષ્ટ ન કરી, જેનાથી પરિસ્થિતિ વણસી
મહારાષ્ટ્ર પોલીસે ક્યાંય પણ ક્યારેય તેનો પક્ષ ઓન રેકોર્ડ નથી રાખ્યો. આ કારણે લોકોને લાગ્યું કે બિહાર પોલીસ જ સાચું બોલે છે. મુંબઈ પોલીસની ઇમેજ ખરાબ થશે તેવી ડિબેટ શરૂ થઇ ગઈ. આવી રીતે કાલે કોઈ અપરાધ મહારાષ્ટ્રમાં થયો અને અપરાધી બિહાર ભાગી ગયો તો બિહારની પોલીસ મહારાષ્ટ્રની મદદ નહીં કરે. આવામાં આ વિવાદ યોગ્ય સમયે પૂરો થઇ જવો જોઈતો હતી પરંતુ આવું ન થયું. જે સમયે બિહારના DGP ન્યૂઝ ચેનલ્સને ઇન્ટરવ્યૂ આપી રહ્યા હતા ત્યારે તેમને બિહાર સરકારની સહમતી હતી. બિહાર સરકારની સહમતી રાજનીતિથી પ્રેરિત છે એવો આરોપ મહારાષ્ટ્રના ઘણા નેતાઓએ લગાવ્યો છે.

તપાસમાં વિલંબ થવાથી પ્રૂફ નષ્ટ થઇ જાય છે
સુશાંત અને દિશા, બંનેએ કોઈ સુસાઇડ નોટ અથવા આત્મહત્યા કરવાનું કારણ જણાવતો લેટર રાખ્યો ન હતો. આ કારણે અજગ-ગજબ તર્ક સામે આવી રહ્યા છે. સુશાંત અને દિશાની આત્મહત્યા ખરેખર આત્મહત્યા છે કે કોઈએ તેમને ઉશ્કેર્યા હતા, આ વાત પોલીસ તપાસમાં સ્પષ્ટ થઇ શકતી હતી. ન્યાયશાસ્ત્ર કહે છે કે જ્યારે તપાસમાં વિલંબ થાય છે તો પ્રૂફ પણ નષ્ટ થતા રહે છે. દિશાની આત્મહત્યા બાદ સુશાંતની પ્રતિક્રિયા શું હતી, તેનું વર્તન કેવું હતું, તેમાં કોઈ ફેરફાર હતો કે નહીં, આ પોલીસે તપાસ કરવાની હતી. સુશાંત સિંહ ડિપ્રેશનમાં જતો રહ્યો હતો અને અમુક દવા લઇ રહ્યો હતો, આવું કાઉન્સેલરે જણાવ્યું છે. સુશાંત કયા કારણે ડિપ્રેશનમાં હતો, માનસિક તણાવમાં કેમ હતો, આ બાબતે કોઈ તપાસ કરવામાં ન આવી.

કાયદા સામે મોટા પ્રશ્નો ઊઠ્યા
રિયા ચક્રવર્તીએ તેની યાચિકામાં કહ્યું કે સુશાંત આત્મહત્યાની તપાસનો અધિકાર બિહાર પોલીસને નહીં પણ મહારાષ્ટ્ર પોલીસને છે. આજે આ પ્રકરણ CBIને સોંપી દેવામાં આવ્યું છે, આવામાં રિયાની યાચિકાની શું યોગ્યતા રહેતી? આખરે, રિયાએ યાચિકામાં CBI સંબંધિત કોઈપણ સવાલ ન કર્યો. રિયાએ તો શરૂઆતમાં જ હોમ મિનિસ્ટર અમિત શાહને CBI તપાસ માટે અપીલ કરી હતી. તપાસ કરવાનો અધિકાર CBIને નથી, આવું મહારાષ્ટ્ર સરકાર કહી શકે છે. વાત એમ છે કે CBIની સ્થાપના દિલ્હી સ્પેશિયલ પોલીસ એસ્ટાબ્લિશમેન્ટ એક્ટ હેઠળ થઇ છે. તેના સેક્શન - 6 અનુસાર કોઈપણ કેસની તપાસ હાથમાં લેતા પહેલાં CBIએ સંબંધિત રાજ્યની અનુમતિ લેવાની હોય છે. બિહાર સરકારને સુશાંત આત્મહત્યાની તપાસનો અધિકાર નથી અને આવામાં તેમની ભલામણ યોગ્ય છે? નહીં તો શું કેન્દ્ર સરકાર મહારાષ્ટ્ર સરકારને પૂછ્યા વગર તપાસ CBIને સોંપી શકે છે? આવા ઘણા પ્રશ્નો કાયદા સામે છે. એટલે કે આના માટે મહારાષ્ટ્ર સરકારે સુપ્રીમ કોર્ટમાં યાચિકા ફાઈલ કરવાની રહેશે. પરંતુ, જો આવું કર્યું તો સવાલ થશે કે મુંબઈ પોલીસ કોને બચાવવા માટે આટલી બધી મહેનત કરી રહી છે.

અન્ય સમાચારો પણ છે...