રાહુલ ગાંધીના હાલ જુઓ:9 વર્ષમાં કૉંગ્રેસ વિધાનસભાની 40 ચૂંટણી હારી, 13 વખત હાર સ્વીકારી અને એકની એક વાત કહી

ગુજરાત વિધાનસભાની ચૂંટણી હારતાં કોંગ્રેસના રાહુલ ગાંધીએ હાર સ્વીકારીને સંગઠનમાં ફેરફાર કરવાનું કહ્યું અને તેમણે છેલ્લાં 9 વર્ષમાં આવું 13 વાર કહ્યું. મહત્ત્વનું છે કે આ 9 વર્ષમાં કૉંગ્રેસનો વિધાનસભાની એક-બે નહીં, પરંતુ 40 ચૂંટણીમાં રકાસ થયો છે. આ દરેક વખતે હાર સ્વીકારવામાં આવે છે અને એકની એક વાત કરવામાં આવે છે. ચૂંટણીમાં હાર થાય છે, નિવેદન આવે છે અને બધું ભુલાઈ જાય છે. જોકે હાર પછીની તૈયારી કે બોધપાઠ લેવાની વાતો થઈ હશે, પણ એનું ઠોસ પરિણામ ક્યાંક જોવા મળ્યું નથી.

કઈ ચૂંટણીમાં હાર બાદ રાહુલે કર્યું ટ્વીટ….

1. ગુજરાત ચૂંટણી 2022- ગુજરાતમાં 182 બેઠક સાથે કોંગ્રેસને માત્ર 17 બેઠક મળી. હાર સ્વીકારીને રાહુલે લડાઈ ચાલુ રાખવાની વાત કરી હતી. જોકે ગુજરાતમાં કોંગ્રેસ 27 વર્ષથી સત્તાથી બહાર છે.

2. યુપી, પંજાબ અને ગોવા ચૂંટણી 2022- આ વર્ષની શરૂઆતમાં યુપી-પંજાબ 5 રાજ્યની ચૂંટણીમાં કોંગ્રેસ ખરાબ રીતે હારી. રાહુલે હાર સ્વીકારી અને કહ્યું, સંગઠન મજબૂત કરો.

3. બંગાળ અને આસામ ચૂંટણી 2021- આસામમાં કોંગ્રેસને કમબેકની આશા હતી, પરંતુ હાર થઈ. રાહુલે ટ્વીટ કર્યું અને નવેસરથી લડવાની વાત કહી.

4. લોકસભા ચૂંટણી 2019- અમારી ચૂંટણીમાં કોંગ્રેસ ફરી ધારાશાયી થઈ. આ ચૂંટણીમાં રાહુલ ગાંધી પોતે અમેઠીથી ચૂંટણી હાર્યા હતા

5. મેઘાલય, ત્રિપુરા અને નાગાલેન્ડ 2018- નોર્થ-ઈસ્ટનાં ત્રણ રાજ્યમાં જીતવા માટે કોંગ્રેસે પૂરી તાકાત લગાવી હતી, પરંતુ સફળતા મળી નહોતી. રાહુલને તેના પછી પણ હાર સ્વીકારી

6. યુપી, ગોવા અને ઉત્તરાખંડ 2017- યુપીમાં સપાની સાથે ચૂંટણી મેદાનમાં ઊતરી અને છતાં કોંગ્રેસનો હારનો સામનો કરવો અને ઉત્તરાખંડમાં સરકાર ગઈ. આ રાજ્યનાં પરિણામો પછી રાહુલે ટ્વીટ કર્યું.

7. ગુજરાત અને હિમાચલ 2017- ગુજરાતમાં સારા પ્રદર્શન બાદ હારને અને હિમાચલમાં સરકાર ગુમાવ્યા પછી રાહુલને સંગઠનમાં સુધારવાની વાત કરી હતી અને હાર સ્વીકારી હતી

8. બંગાળ અને આસામ 2016- આસામ ચૂંટણીમાં કોંગ્રેસ ભૂંડી રીતે હાર્યું હતું. બંગાળમાં પણ મમતા સામે કોંગ્રેસ હારી હતી. રાહુલે હાર સ્વીકારીને ટ્વીટ કર્યું હતું.

9. દિલ્હી ચૂંટણી 2015- દિલ્હી ચૂંટણી 2015માં કોંગ્રેસનું સૂપડાં સાફ થઈ ગયું. રાહુલે દિલ્હી કોંગ્રેસ ફરીથી મજબૂત કરવા સાથે ઊભા રહેવાની વાત કરી.

10. હરિયાણા અને મહારાષ્ટ્ર ચૂંટણી 2014- હરિયાણા અને મહારાષ્ટ્રમાં સરકાર ગયા બાદ તેમને પાર્ટીને ફરીથી મજબૂત કરવા માટે પ્રણ પણ લીધો.

11. લોકસભા ચૂંટણી 2014- મોદી લહેરમાં કોંગ્રેસ પાર્ટીનો સંપૂર્ણ સફાયો થઈ ગયો. પરિણામ આવ્યાં બાદ રાહુલે કહ્યું- કોંગ્રેસે બહુ ખરાબ કર્યું છે. વિચારવા જેવું ઘણું છે. હું આ હાર માટે જવાબદાર છું.

12. રાજસ્થાન, એમપી અને દિલ્હી 2013- લોકસભા 2014 પહેલાં કોંગ્રેસ 5 રાજ્યની ચૂંટણીમાં ખરાબ રીતે હારી હતી. દિલ્હીમાં હાર બાદ રાહુલે આમ આદમી પાર્ટી પાસેથી શીખવાની વાત કરી હતી.

સતત ચૂંટણી હારતી કોંગ્રેસને પુનઃજીવિત કરવાના અનેક પ્રયાસો કરવામાં આવ્યા હતા, પરંતુ બધા અનિર્ણીત રહ્યા હતા. 2019માં હાર બાદ વરિષ્ઠ નેતા એકે એન્ટનીની અધ્યક્ષતામાં એક સમિતિની રચના કરવામાં આવી હતી. સમિતિએ રિપોર્ટમાં હાર માટે 3 મુખ્ય કારણને જવાબદાર ગણ્યા હતા.

ત્યારે ચાલો... જાણીએ કોંગ્રેસની હાર પાછળનાં ત્રણ મુખ્ય કારણ

1) નિર્ણય લેવામાં વિલંબ

રિપોર્ટમાં કહેવામાં આવ્યું છે કે ચૂંટણી વ્યવસ્થાપન અને ટિકિટ વિતરણ જેવા મહત્ત્વપૂર્ણ નિર્ણયોમાં વિલંબ થાય છે, જેને કારણે ચૂંટણીમાં હારનો સામનો કરવો પડે છે.

2) સંગઠન સ્તરે જૂથવાદ

અહેવાલમાં જણાવાયું છે કે રાજ્ય અને જિલ્લા સ્તરે સંગઠનમાં ખૂબ જૂથવાદ છે. તેને સમાપ્ત કર્યા વિના ચૂંટણી જીતી શકાતી નથી.

3) લોકપ્રિય ચહેરાનો અભાવ

રિપોર્ટ અનુસાર, પાર્ટીમાં લોકપ્રિય અને ભરોસાપાત્ર ચહેરાઓની ભારે અછત છે, જેને કારણે લોકો કોંગ્રેસની નીતિઓ પર વિશ્વાસ કરી શકતા નથી.